12
Tamwarrit n Ayub x Ṣufar
1 Yarra-dd Ayub, inna:
2 D tidett, kenniw d ijj n ddarb n řgens,
aqa tiɣit ad temmet akidwem!
3 Necc ɣari řeɛqeř am kenniw,
necc war weṭṭiɣ deg umquddi akidwem.
Wi war issinen marra aya?
4 Necc am wenni iǧan i tseḍḥac
i umeddukkeř nnes,
necc d wenni tuɣa ittřaɣan ɣar Arebbi
uca xenni Netta isřa ɣari,
necc d amsegged d nican,
aqa dewřeɣ d řqecɛet n tseḍḥact.
5 ‘Řḥegra d tasɣart n wenni ittwarẓan!’,
ammu i ittxarraṣen yinni
umi ittɣiř aqa aten di řaman,
ittɣiř asen aya ittraja
inni ittneqraḍen deg iḍaren nsen.
6 Iqiḍan n imteḥḥayyen arsan,
u inni iseɛɛaren Arebbi
ɣarsen aṭṭas n řaman.
Maca wi izemmaren
ad yawi Arebbi s ufus nnes?
7 Seqsa xenni řmař,
ad ac t ssřemden,
ijḍaḍ n ujenna ad cek t ḥajan.
8 Niɣ xezzareɣ mliḥ ɣar temmurt,
nettat ad cek tessɣar,
uřa d iseřman n řebḥar
ad ac t ɛawden.
9 Man wen war issinen marra aya,
aqa afus n SIDI i t iggin?
10 Netta d wenni deg ufus nnes iǧa
řeɛmar n marra min iddaren,
uřa d buḥbeř n kuř arrimet n bnadem.
11 Ma war ittqeǧib umezzuɣ awařen,
am ittqasa waneɣ macca?
12 Ɣar iwessura i teǧa tiɣit
u di tudart tazirart teǧa řefhamet?
13 Netta ɣares i teǧa tiɣit d jjehd s tidett,
Netta ɣares i yeǧa
ccwar d řefhamet nican.
14 Xzar, mařa Netta iheddem,
war ibenni uřa d ijj ɛawed,
mařa Netta ibelleɛ x ca n yijjen,
war d as yarezzem ɛad.
15 Xzar, mařa Netta issbedd aman,
ad aẓɣen nitni,
mařa yarxu asen,
ad ssenqeřben tammurt.
16 Netta ɣares jjehd d ufekki,
nnes d wenni iweddaren
uřa d wenni issweddaren.
17 Netta ittejja iryazen n ccwar
gguren s řeḥfa,
řquḍat ittarra i-ten d ibuhařiyyen.
18 Aziyyar n ijeǧiden issbeṭṭeř i-t
u xenni Netta ittcedda i-ten
s ijj n webyas zi tejɛinna nsen.
19 Netta ineddeh ikehhanen s řeḥfa,
ayt n jjehd iɣeṭṭer i-ten.
20 Ittekkes awař i iryazen ittwaqeǧben,
i iwessura ittekkes asen řefhamet.
21 Aseḥqar ittzeǧaɛ i-t x tarwa n taṣiřet,
i ayt n bu-řexcunet issarexxu asen abyas.
22 Imucan yuǧɣen n taǧest ittɛarra xasen,
d tiři n řmewt issuffuɣ i-tt ɣar tfawt.
23 Řegnus issemɣar i-ten uca iɣeṭṭer i-ten,
Netta ittbezzaɛ řegnus uca ineddeḥ i-ten.
24 Ittekkes řefhamet
i izeǧifen n řgens x temmurt,
ijja i-ten ttᵉtliɛen di řexřa
mani war ǧin ibriden.
25 Nitni ttemhafan da d diha di taǧest,
mani war teǧi tfawt,
Netta ittejja i-ten
ad mmhafan am yimescaren.