1 Xzar, mecḥař temɣar tayri i zi d aneɣ ittexs Babatneɣ, ařami iřaɣa u igga aneɣ tarwa. S uyenni ddunect war d aneɣ tessin ca, minzi war t tessin ca. ◘ 2 A imɛizzen inu, řexxu neccin d tarwa n AREBBI i neǧa, war dd-iḍhar ɛad min ɣa niři. Aqa nessen xmi dd ɣa iban Netta, ad niři di ṣṣifet nnes, minzi ad t nẓar am mammec iǧa Netta. ◘ 3 Marra wenni ɣar iǧa usitem-a dayes deg wuř nnes, ad issizdeg ixef nnes, am mammec iǧa Netta d amezdag. 4 Marra wenni itteggen ddnub, ittegg řmuɛṣiyyet, minzi marra ddenb d řmuɛṣiyyet. ◘ 5 Tessnem belli Netta iban-dd, ḥima ad ikkes ddnub nneɣ: Netta war dayes bu ddnub. ◘ 6 Marra wi dayes i ɣa iqqimen, war ittegg ca ddnub. Marra wi itteggen ddnub, war t iẓri, war t issin. 7 A iḥenjiren inu, war ttejjim ad kenniw ixarweḍ ḥed. Wenni itteggen tasegda d netta d amseggad am mammec ɛawed Lmasiḥ d amseggad. ◘

8 Wenni itteggen ddnub d netta zi cciṭan, minzi cciṭan tuɣa d amednub zeg umezwaru. I man aya i dd-iḍhar Mmis n AREBBI: ḥima ad issexsar řexdayem n cciṭan.

9 Marra wenni dd-ittwaxeřqen zi AREBBI, war ittegg ca ddnub, minzi Zzariɛet nnes aqa-tt dayes uca war izemmar ad ixḍa, minzi ittwaxřeq-dd zi AREBBI. ◘ 10 Di man aya ad dd-ḍharen tarwa n AREBBI d tarwa n cciṭan: marra wenni war itteggen tasegda u war ittexsen umas, war iǧi ca zi AREBBI. 11 Maɣar ta d tawṣiyyet i tuɣa tesřim zeg umezwaru belli ad texsem ijjen wenneɣni!’ ◘ 12 War iǧi am Qayin wenni iǧan zeg umɛeffan uca inɣa umas. Mayemmi inɣa umas? S minzi řexdayem nnes tuɣa atent ɛeffnent uca tinni n umas seggdent. ◘ 13 War tedhicem ca, a aytma, mařa ddunect tcarh i kenniw. ◘ 14 Neccin nessen, aqa neẓwa zi řmewt ɣar Tudart, minzi nexs awmaten nneɣ. Wenni war ittexsen umas, ad iqqim di řmewt. ◘ 15 Marra wi icarrhen umas d aqettař, uca kenniw tessnem belli Tudart ittduman war tzemmar ad teqqim deg ijj n uqettař. ◘ 16 Zi man aya nessen tayri nnes i neccin, aqa Netta issars Tudart nnes deg wemcan nneɣ. Ɛawed ittxeṣṣa aneɣ nican ad nessars tudart nneɣ x aytmatneɣ. ◘ 17 Wenni ɣar iǧa agřa n ddunect uca ittwařa umas izřeḍ, xenni iqqen xas uř nnes, mammec i ɣa tezdeɣ tayri n AREBBI dayes? ◘

18 A iḥenjiren inu, ejj aneɣ war nᵉttexs ijjen wenneɣni s wawař niɣ s iřes, maca s řexdayem u di tidett. 19 S man aya nessen aqa neccin zi tidett uca ad nesseqneɛ uřawen nneɣ qbeř i dd ɣa yas. 20 Minzi mařa iḥkem wuř nneɣ xaneɣ, mecḥař d ameqqran AREBBI x wuř nneɣ! Aqa Netta issen marra. 21 A imɛizzen inu, mařa uř nneɣ war xaneɣ iḥkem, aqa ɣarneɣ ttiqqet zzat i AREBBI, 22 uca man řḥajjet i ɣa nettar, ad tt neksi zzayes, minzi neccin nḥeṭṭa tiweṣṣa nnes uca ad negg min ɣa yarḍan qibač Netta. ◘ 23 D ta d tawṣeyyet nnes belli ad namen deg Yisem n Mmis Yasuɛ Lmasiḥ uca ad nexs ijj wenneɣni am mammec i d aneɣ yumur. ◘ 24 Wenni iḥeṭṭan tiweṣṣa nnes, ad zzayes ittwaḥḍa u Netta izeddeɣ dayes. S man aya nessen belli Netta ittɣima dayneɣ, zi Arruḥ nnes i d aneɣ iwca. ◘