58
1 “Řaɣa s jjehd, war ttceṭṭar, ejj tmijja nnec ad tgeɛɛed am uyicc n icarri uca barreḥ i řgens inu iɛeddiyen nsen u i taddart n Yaɛqub ddnub nsen!
2 Nitni arezzun xafi ass x wass uca iɛjeb asen tussna n ibriden inu, amecnaw ǧan d řgens nni itteggen tasegda u war ittejji řḥeqq n AREBBI nnes. Nitni ttaren zzayi řeḥkamat iseggden, iɛjeb asen ad dd-qarrben ɣar AREBBI,
3 maca nitni qqaren: ‘Mayemmi nẓumm, uca Cek war t teẓrid? Mayemmi nessecḍan buḥbeř nneɣ am Cek war d as tḥekkared?’ Xzar, deg wass n uẓummi nwem, tarrim meẓri uca tzeyyarem aṭṭas marra ixeddamen nwem.
4 Xzar, aẓummi nwem yiwi kenniw ɣar umcubbec d umenɣi, ɣar tiyyita s řpuniyyet s řeqsaḥet. War ttẓummem am tᵉtteggem ass-a, maḥend ad tᵉttwaseř tmijja nwem di řuɛřa!
5 Ma wa d aẓummi nni ixḍareɣ Necc: ijj n wass nni di ɣa iɛeddeb bnadem řeɛmar nnes, wenni x i ɣa imeyyeř bnadem azeǧif nnes am uɣanim, u ad issars taxancet n wecḍan d yiɣɣeḍ am qama nnes? Ma teqqared i uya aẓummi, ma aya d ass i dd-yusin x řxaḍar i SIDI?”
6 “Ma war iǧi wa d aẓummi nni ixḍareɣ: afekki n iceddiyyen n řɣar, azeɛwaḍ n tesɣunin n zzayřet, anufseř i yinni ittwaḥṣaren, aqa ad tekksem qaɛ zzayřet?
7 Ma war iǧi wa d aẓummi nni ixḍareɣ, aqa ad tebḍid aɣrum nnec ak-d wenni iǧuzen uca ad tessidfed řmusakin nni ittwadarrcen ɣar taddart? Mařa cek teẓrid aɛaryan, ad t tessyarḍed u war tessnufared ixef nnec zeg wenni iǧan zeg weysum nnec?
8 Xenni tafawt nnec ad dd-tenqar am tuffut n řḥař uca asgenfi nnec ad dd-yaweḍ deɣya, tasegda nnec ad ac tizwar uca aɛuǧi n SIDI ad yiři d aɣezdis nnec aneggaru.”
9 “Xenni ad třaɣid uca SIDI ad xak dd-yarr. Ad tesɣuyed ɣar twiza, uca xenni ad yini Netta: ‘Xzar, aqa ayi da!’ Mařa nican tekksed zzayret zi řwesṭ nnec, uřa d aceyyar s uḍaḍ d wawař aɛeffan,
10 uca ad tarzmed řeɛmar nnec i wenni iǧuẓen u ad tessjjiwned řeɛmar iceḍnen! Xenni ad dd-tenqar tfawt nnec di taǧest uca tubbarcent nnec ad tiři am ṭṭya n uziř.
11 SIDI ad cek ittgewwad řebda u Netta ad issjjiwen řeɛmar nnec di jjwayeh yuẓɣen uca ad issejhed iɣsan nnec. Ad tdewřed am weḥwic ittwassun u am řɛunṣar ittazzřen n waman i war ttɣarran aman nnes ɛemmarṣ.
12 Inni zzayek dd-iffɣen ad ɛawden asbeddi i řxirbat n wecḥař uya, ad ɛedřen dsusa n jjiřat iɛdun uca ad ac qqaren: ‘Wenni iɛeddřen tareẓẓitin, d wenni ittarran izubaq ad daysen uyuren!’ ”
13 “Mařa xenni tqeřbed aḍar nnec x wass n ssebt, x taggit min d ac itteɛjiben deg wass inu iqeddsen, uca ad třaɣid i wass n ssebt: ‘Ṭṭibet!’, i min iǧan iqeddsen i SIDI: ‘Aɛuǧi!’, uca ad tweqqared ass n ssebt am war tḍeffareḍ ibriden nnec, war tᵉtteggid min d ac itteɛjiben u war tessiwiřid ɣar tizi nnec,
14 xenni ad tafed řefraḥet nnec di SIDI u Necc ad cek jjeɣ ad tnedhed tiwa i řegɛudi n temmurt. Ad cek ssecceɣ zi tesɣart n babac Yaɛqub, minzi aqemmum n SIDI issiweř.”