56
Lwuɛud i wenni yarezzun tasegda uca ad tuben
1 “Ammu i iqqar SIDI: ‘Ḥḍam řḥeqq uca ggem tasegda, minzi asenjem inu yudes-dd, ad dd-yas deɣya, uca tasegda inu tiweḍ-dd ḥima ad tᵉttwassargeb.
2 Sseɛd n weryaz nni itteggen ammu uřa d mmis n bnadem nni imennɛen di man aya, wenni iḥeṭṭan ass n ssebt ḥima war ittwassɛiǧit, d wenni iḥeṭṭan afus nnes ařami war ittegg zi marra min war iḥřin.
3 War ttejji abarrani wenni iqqnen ɣar SIDI ad yini: ‘SIDI iɛzeř ayi qaɛ x řgens nnes!’, uca war ttejji wenni umi ttwaddzen imeǧařen ad yini: ‘Xzar, necc d tacejjart yuẓɣen!’
4 Maɣar ammu i iqqar SIDI x imsexxaren inni umi ttwaddzen imeǧařen, inni iḥeṭṭan ussan inu n ssebt u ttixḍaren min iǧan i arḍa inu u ttᵉṭṭfen di Řɛahd inu:
5 Necc ad asen ggeɣ amcan di Taddart inu u jar řeḥyuḍ inu uca ad asen wceɣ isem ḥsen x yisem n iḥenjiren d tḥenjirin. Kuř ijjen zzaysen ad as wceɣ isem n řebda nni ɛemmarṣ war imeḥḥin.
6 Ibarraniyyen nni i ɣa iqqnen ɣar SIDI ḥima ad as sexxaren u ḥima ad xsen Isem n SIDI, ḥima ad iřin d imsexxaren nnes - marra inni iḥeṭṭan ass n ssebt ḥima war ittwassɛiǧit, uřa d inni imennɛen di Řɛahd inu -
7 ad ten awyeɣ ɛawed ɣar wedrar inu iqeddsen u ad ten ssefraḥeɣ di Taddart inu n tẓaǧit. Tiɣarṣa nsen n wecmaḍ d tɣarṣa nsen nneɣni ad iřint i arḍa inu x uɛalṭar inu, maɣar Taddart inu ad as řaɣan Taddart n tẓaǧit i marra řegnus.’ ”
8 “Sidi inu, SIDI, wenni d issmunan inni x yuẓẓřen n Israil, iqqar: ‘Necc ad ɣares dd-ssmuneɣ ktar x yinni dd-ittwassmunen ɣares ɛad.’ ”
9 “Marra řewḥuc n řexřa, asem-dd i macca, wah, marra řmař n wezɣar!
10 Iɛessasen nnes ddarɣřen marra, war ssinen walu. Marra nitni d iṭan ibekmen, war zemmaren ad zun, ṭṭsen, zzřen, ttexsen anudem.
11 Iṭan-a arjfen ař ṭṭarf, war ssinen tayawant. Nitni d imeksawen war ifehhmen, kuř ijjen zzaysen iḍeffar abrid nnes, kuř ijj yarezzu tizi nnes, ɛad wenni d aneggar zzaysen.
12 Qqaren: ‘Asettiw-dd, ad dd-awyeɣ binu, ad nescar s ccrab. Am wass-a ammu i ɣa yiři uřa d tiwecca, ad yiři ɛad d ameqqran d icnan xas!’ ”