37
Awař amezwaru x ufekki n Urcalim i dd ɣa yasen
1 Umi isřa ujeǧid Ḥizqiya aya, icarreg arruḍ nnes, idřa ixef nnes s ict n txancet n wecḍan uca yudef ɣar Taddart n SIDI.
2 Awarni as issekk netta Alyaqim, řemqeddem n tzeddiɣt n ujeǧid, d Cabna, amarir, d imɣaren n ikehhanen deg warruḍ n txuncay n wecḍan ɣar unabi Icaya, mmis n Amuṣ.
3 Nitni nnan as: “Ammu i iqqar Ḥizqiya: ‘Ass-a d ijj n wass n řeḥṣaret u n weɛqab u n ubehdeř, maɣar iḥenjiren iwḍen-dd ař arzam n uɛeddis n yemmatsen, maca war din jjehd i twarut.
4 Ad taɣ SIDI, AREBBI nnec, isřa marra awařen n ukumandar n řɛeskar wenni dd-issekk sidis, ajeǧid n Accur, ḥima ad istehza zi AREBBI iddaren, u ad taɣ SIDI, AREBBI nnec, ad iɛaqeb awařen nni isřa. Sgeɛɛed xenni ict n tẓaǧit di ṭṭweɛ n řbaqi nni i ɣa ittwafen ɛad.’ ”
5 Ammu iwḍen imsexxaren n ujeǧid Ḥizqiya ɣar Icaɛya.
6 Inna asen Icaɛya: “Ammu ittxeṣṣa ad tinim i siditwem: ‘Ammu i iqqar SIDI: War teggʷed ca zeg wawařen i tesřid, i zi i d ayi ceqqfen iḥudriyyen n ujeǧid n Accur.
7 Xzar, Necc ad dayes ggeɣ ijj n buḥbeř u netta ad iseř ijj n řexbar uca xenni ad iɛqeb ɣar temmurt nnes u Necc ad t nɣeɣ din di temmurt nnes s ssif.’ ”
Sanḥarib iɛawed ahuddi nnes i Urcalim
8 Xenni iɛqeb-dd ukumandar n řɛeskar uca yufa ajeǧid n Accur ittmenɣa ak-d tendint n Libna, maɣar isřa aqa iqřeɛ iqiḍan nnes iffeɣ zi Laxic.
9 Umi isřa aqa nnan x Tirhaqa, ajeǧid n Kuc: “Xzar, iffeɣ-dd ḥima akidek immneɣ!”, umi isřa aya, issekk ɛawed ireqqasen ɣar Ḥizqiya, inna:
10 “Ammu i ittxeṣṣa ad tessiwřem ak-d Ḥizqiya, ajeǧid n Yahuda, ad tinim: ‘War ttejji ad cek iɣwa AREBBI nnec wenni x tᵉttcařed am iqqar: Urcalim war tweṭṭi i ujeǧid n Accur deg ifassen!
11 Xzar, tesřid min ggin ijeǧiden n Accur ak-d marra timmura nneɣni, tinni ḥarrmen nitni i uteḥḥi. Ma ittɣiř ac ad tᵉttwassnejmed?
12 Ma fekken ten irebbiten n řegnus inni yareddǧen řejdud inu? Juzan d Ḥaran d Rṣif d ayt n Ɛadan, inni tuɣa izeddɣen di Talassar?
13 Mani iǧa ujeǧid n Ḥamat d ujeǧid n Arfad d ujeǧid n tendint n Sfarwayim uřa d ajeǧid n Hanaɛ d Ɛiwwa?’ ”
Taẓaǧit n Ḥizqiya
14 Ḥizqiya iksi tibratin zeg ufus n ireqqasen uca iɣri tent. Xenni igeɛɛed ɣar Taddart n SIDI uca ibezzeɛ i-tent Ḥizqiya zzat i wudem n SIDI.
15 Iẓẓuǧ Ḥizqiyai SIDI, inna:
16 “A SIDI n řɛeskarat, AREBBI n Israil, wenni ittɣiman jar ikiruben! Cek, wah Cek weḥḥdek d AREBBI n marra tigeldiwin n ddunect. Cek teggid ijenwan d temmurt.
17 Ewc amezzuɣ nnec, a SIDI, arzem tiṭṭawin nnec uca texzared! Seř marra awařen n Sanḥarib wenni dd-issekk netta ḥima ad iɛeyyeb AREBBI iddaren.
18 D tidett, a SIDI, ijeǧiden n Accur qḍan timmura nni, xarrben tammurt nsen
19 u nḍaren irebbiten nsen di tmessi, maɣar tuɣa war ǧin d irebbiten, maca d timegga n ufus n yewdan waha, zeg ukeccuḍ d weẓru, uca nitni qḍan ten.
20 Řexxu maca, a SIDI, AREBBI nneɣ, senjem aneɣ zeg ufus nnes, maḥend marra tigeldiwin n ddunect ad ssnen, a SIDI, aqa Cek weḥḥdek d AREBBI.”
Awař wiss tnayen x ufekki n Urcalim i dd ɣa yasen
21 Xenni issekk Icaɛya, mmis n Amuṣ, ijj n ureqqas ɣar Ḥizqiya, inna: “Ammu i iqqar SIDI, AREBBI n Israil: ‘Necc sřiɣ s minzi teẓẓuǧed-dd ɣari x Sanḥarib, ajeǧid n Accur.
22 Wa d awař i xas inna SIDI: ‘Taɛzarct, yeǧis n Ṣihyun, tesseḥqar i cek, nettat testehza zzayek, yeǧis n Urcalim thezz azeǧif awarni ac.
23 Man wen tɛeyybed u di man wen tceqqfed, man wen ɣar tessgeɛɛded tmijja u x man wen i xef tessgeɛɛded s nnfaxet tiṭṭawin nnec? Cek tᵉttɣennaned x Umqeddas n Israil!
24 S uqemmum n imsexxaren nnec tedɛid Sidi inu, tennid: S ubarru n ikarruten inu geɛɛdeɣ idurar yuɛřan, iɣezdisen n Lubnan. Necc ad zedmeɣ ticejjura nnes n tengelt yuɛřan uřa d ticejjura nnes icnan qaɛ n imerza u necc ad dd-aseɣ ař taqiccat nnes yuɛřan qaɛ, ɣar wezɣar n umarjeɛ nnes n uḍiř.
25 Necc ɣziɣ anuten u swiɣ aman. S třeqqa n iḍaren inu ssiẓɣeɣ marra iɣezran n Miṣra!’ ”
26 “Ma war tesřid aqa aṭṭas zeg wami ggiɣ man aya uca wciɣ as udem deg wussan n mecḥař uya? Řexxu jjiɣ t ad dd-iffeɣ, aqa cek d wenni i ɣa yarren tineddam ifaryen d řxirbat.
27 Imezdaɣ nsen tuɣa arxun, arẓin, seḍḥan. Nitni tuɣa aten am wefsu deg iyyar, am uɣemmuy aziza, am uřum x tzeɣwin, am imendi icemḍen s usemmiḍ qbeř i ɣa iffeɣ.
28 Maca Necc ssneɣ aɣimi nnec d uffuɣ nnec d twasit nnec d uɣewweɣ nnec xafi.
29 Minzi cek tɣewwɣed xafi u tuffet nnec tiweḍ-dd ɣar imezzuɣen inu, ad ac dd-ssekkeɣ ict n tsennart deg wenzaren u ad ggeɣ ict n sřimet jar iyencicen nnec u Necc ad cek arreɣ x webrid i di dd-tusid da.”
30 “Ta ad ac tiři d řeɛřamet: deg useggʷas-a ad teccem min ɣa iɣemyen s yixef nnes u deg useggʷas wiss tnayen min zzayes ɣa iɣemyen ɛawed, maca deg useggʷas wiss třata ad tzarɛem u ad temjarem, ad teẓẓum tizayarin deg imarjaɛen uca ad teccem řɣiǧet nnes.
31 Maɣar min inejmen, min iqqimen zi taddart n Yahuda, ad iwwet ɛawed iẓewran ɣar swadday u sennej ad yawi řɣiǧet.
32 Maɣar zi Urcalim ad dd-iffeɣ min iqqimen u zeg wedrar n Ṣihyun ad iffeɣ min i ɣa innejmen, asam iqeddsen n SIDI n řɛeskarat ad tt igg.”
33 “S uya, ammu i iqqar SIDI x ujeǧid n Accur: ‘Netta war dd-ittidef ca ɣar tendint-a u war dayes iccit ca uřa d ict n fřitca u war ɣares dd-iqarreb ca s uřa d ict n tseddart n uɛeskari u war xas ittbeqqiḍ uřa d ijj n lbaraj i řeḥṣaret.
34 X webrid i x dd-yusa, ad dd-iɛqeb. War ittidif ca ɣar tendint-a, iqqar SIDI.
35 Necc ad sseřqiɣ x tendint-a ḥima ad tt ssnejmeɣ di ṭṭweɛ inu u di ṭṭweɛ n umsexxar inu Dawud.’ ”
Afekki n Urcalim
36 Xenni iffeɣ lmalak n SIDI uca inɣa mya u-xemsa u-tmenyin-ařef n yeryazen di řmargeḥ n řɛeskar n Accur. Umi dd-kkaren nitni tiwecca nnes, xzar, aqa aten marra idsen d řxecbat.
37 Uca ifsi Sanḥarib, ajeǧid n Accur, iqiḍan nnes, iruḥ, iɛqeb ɣar temmurt nnes. Iqqim izeddeɣ di Ninwa.
38 Umi isjed ijj n wass di taddart n arebbi nnes Nisrux, imsar, aqa iḥenjiren nnes Adrammilik d Caraṣar nɣin t s ssif. Nitni arewřen ɣar temmurt n Ararat. Mmis Asarḥaddun idweř d ajeǧid deg wemcan nnes.