28
Awař n Arebbi x Samarya
1 “Uct x ttaj uɛeffar n imescaren n Ifrayim, aqa talwizt nnes icuwwaren amecnaw tanewwact isřawen x tqiccet n teɣzurt iṣebḥen n yinni x yeɣřeb binu.
2 Xzar, Sidi inu ɣares ijjen ijhed u iwɛar am tecti n tebruri, am tḥaryaḍt i ittawyen ṭṭaɛun d uxarreb. Am řḥemřat n waman imɣaren issfayen ad inḍar Netta ttaj nni s ufus nnes ɣar temmurt.
3 Ttaj aɛeffar n imescaren n Ifrayim ad t ɛefsen s iḍaren.
4 Tanewwact isřawen n telwizt nnes icuwwaren x tqiccet n teɣzurt isseɣmayen, ad tiři am tbacurt tiweḍ qbeř anebdu, tenni wenni ixezzaren da d diha iẓra i-tt uca isseɣři i-tt deɣya umi tuɣa ɛad deg ufus nnes.”
5 “Deg wass nni ad yiři SIDI n řɛeskarat d tajj n ucuwwaḍ d ttaj icewwaren i min iqqimen n řgens nnes,
6 d arruḥ n řḥukm i wenni iqqimen x řkursi i řḥukm, uřa d arruḥ n taryast i ayt n bu-teɣruḍt i yinni ittarran amenɣi ɣar tewwart n tendint.”
7 “Ɛad ina ttemmraywan s binu, uca ttwarenyen zi ccrab. Ittemraywa ukehhan d unabi s ccrab. Ttwaṣarḍen s binu, ttwarenyen zi ccrab, ttemraywan ɣar iweḥḥan nsen, ttenhezzan da d diha umi ḥekkmen ɣar ucarreɛ.
8 Maɣar marra ṭṭabřat ɛemmarent s trarit ixemjen, uřa d ijj n wemcan war iqqim d amezdag.
9 ‘I umi ixs netta ad issɣar tussna, i umi ixs ad isscen areqqas? I yinni umi ittwakkes asen uɣi, i yinni umi ikksen abbuc?
10 Maɣar aqa da, řumur x řumur, řumur x řumur, lfariḍa x lfariḍa, lfariḍa x lfariḍa, da drust, diha drust.’ ”
11 “S uya ad issiweř ak-d řgens-a s iyencicen iṭṭewṭiwen u s ijj n yiřes nneɣni,
12 Netta d wenni tuɣa i d asen inna: ‘Wa d arraḥet, wcem arraḥet i wenni yuḥřen!’, uca: ‘Wa d řmargeḥ!’, maca nitni war xsen ca ad sřen.
13 Ad asen yiři wawař n SIDI: ‘Řumur x řumur, řumur x řumur, lfariḍa x lfariḍa, lfariḍa x lfariḍa, da drust, diha drust!’, maḥend nitni, am uyuren, ad wḍan ɣar ḍeffar, ad ttwarẓen, ad dewřen di řfex u ad ttwaḥebbsen.”
14 “S uya, sřem i wawař n SIDI, a kenniw imestehzayen, inni ɣar iǧa ṣṣulṭa x řgens-a nni iǧan di Urcalim!
15 Minzi teqqarem: ‘Neccin negga řɛahd ak-d řmewt u negga ict n ḍḍmana ak-d řaxart. Xmi ɣa iɛdu urekkuḍ ifarcen, war ɣarneɣ dd-yiwiḍ, maɣar negga axarriq axmi mani ɣar i ɣa narweř u ad nennuffar awarni i řɣecc!’
16 S uya, ammu i iqqar Sidi inu, SIDI: ‘Xzar, Necc ad ssarseɣ ijj n weẓru di Ṣihyun, aẓru iqeǧben, aẓru n teɣmart iɣřan, dsas imten. Wenni yumnen war ittrikwiř.’
17 Ad ssarseɣ řḥeqq d ufiřu n řeɛbar uca tasegda d plumu. Tebrurri ad teḥḥa amcan n tarewřa iccuren s ixarriqen uca aman ad dd-ssefyen amcan nnes n udduri.
18 Řɛahd nwem ak-d řmewt ad ittwamḥa, ḍḍmana nwem ak-d řaxart war tᵉttɣimi tbedd. Xmi ɣa iɛdu urekkuḍ ifarcen, ad zzayes tᵉttwaɛefsem kenniw.
19 Meřmi ma iɛdu, ad kenniw yawi akides, maɣar ad teɛdu tufut awarni i tufut, s wass d ǧiret. Uca afehham n ureqqas ad yawi mɣir asnexřiɛ.
20 Maɣar qama ad iquḍeḍ ařami war izemmar bnadem ad ibbuzzer uca taɛřawt ad tiři teḥṣar ařami bnadem war izemmar ad dayes yadef.
21 Maɣar SIDI ad ikkar am x wedrar n Faraṣim, ad ihaj am di teɣzurt n Jibɛun, maḥend ad yegg ccɣeř nnes: ‘Ccɣeř nnes ad yiři d aɣrib!’, uca maḥend ad yegg řxedmet nnes: ‘Řxedmet nnes ad tiři taɣribt!’
22 U řexxu, war ssehqara, ḥima ssnaseř nwem war tent ttzeyyaren ɛad ktar, maɣar sřiɣ zi Sidi inu, SIDI n řɛeskarat aqa ikkes deg wawař ad yareddeǧ imun marra tammurt.”
23 “Sḥessem u sřem i tmijja inu, ḥḍam u sřem ɣar wawařen inu!
24 Ma icarrez umcarrez ass imun, ḥima ad izarɛ? Ma řebda ittfeǧeḥ u ineqqec iyyar nnes?
25 Ma war iǧi ammu, mařa netta iwaṭa udem n yeyyar, issuyus ssanuǧ uca zzariɛet n řcemmun ibezzeɛ i-tt, igga irden di řeṣfuf d imendi di ikwadrunen uca karṣana igga i-t ɣar tmawwin nnes?
26 Idarreb i-t AREBBI nnes mammec ittxeṣṣa ad ixdem nican, isseřmed i-t.
27 Minzi war ssarwaten ssanuǧ s teřwiḥt itteḥřuǧuḍen i usarwet u war ssekkin tajarrart n ukarru tiwa n řcemmun, maca zekkwḍen ssanuǧ s weɛmud d řcemmun s uqeṭṭab.
28 Ma ḥarryen imendi ɣar usarwet? Lla, bnadem war t issarwit i řebda, war xas ineddeh tijarrarin n ukarru d yeysan nnes i řebda: war t iḥarri.
29 Uřa d man aya iffeɣ-dd zi SIDI n řɛeskarat. Ccwar nnes d řeɛjeb, aqa Netta imɣar deg usuyar.”