2
Aɛuǧi n Zzawect Tameqqrant n jdid
1 Deg uyur wiss sebɛa, deg wass wiss waḥit u-ɛicrin n uyur, yusa-dd wawař n SIDI s ufus n Ḥaggay, inna:
2 “Siweř xenni ɣar Zarubbabil, mmis n Caɛaltiyil, lwali n Yahuda, u ɣar Yahucaɛ, mmis n Yahuṣadaq, arrays n ikehhanen, u ɣar min iqqimen zi řgens, ini:
3 Wi zzaywem iqqimen zeg inni iẓrin ɛad Taddart-a s uɛuǧi nnes amezwaru? D mammec i tt tᵉttwařam řexxu? Ma war teǧi jar tiṭṭawin nwem am walu?
4 Maca řexxu, mḥeḍ, a Zarubbabil, iqqar SIDI, mḥeḍ, a Yahucaɛ, mmis n Yahuṣadaq, arrays n ikehhanen, meḥḍem kenniw marra imezdaɣ n temmurt, iqqar SIDI. Kkarem ɣar řxedmet, maɣar Necc aqa ayi akidwem, ammu i iqqar SIDI n řɛeskarat.
5 Awař i zi ggiɣ ijj n Řɛahd akidwem, řami dd-teffɣem zi Miṣra, u Arruḥ inu, aqa aten s tnayen idsen bedden di řwesṭ nwem. War tteggʷedem ca!
6 Maɣar ammu i iqqar SIDI n řɛeskarat: Ɛad ict n twařa, mɣir drus n řḥař, Necc ad ssenhezzeɣ ijenwan d temmurt, řebḥar d řbarr.
7 Necc ad jjeɣ marra řegnus ad arjijen u ad dd-asen s min iɣřan aṭṭas zi marra řegnus u Necc ad ccureɣ Taddart-a s uɛuǧi!, ammu i iqqar SIDI n řɛeskarat.
8 Inu nnuqart u inu wureɣ, iqqar SIDI n řɛeskarat.
9 Aɛuǧi n Taddart-a taneggarut ad yiři d ameqqran x wenni n Taddart tamezwarut, iqqar SIDI n řɛeskarat, u Necc ad wceɣ řehna deg wemcan-a, ammu i iqqar SIDI n řɛeskarat.”
Ijj n řgens ixmej ad iṭṭef lbaraka
10 Deg wass wiss arebɛa u-ɛicrin n uyur wiss tesɛa, deg useggʷas wiss tnayen n Dariyus, yusa-dd wawař n SIDI s ufus n Ḥaggay, inna:
11 “Ammu i iqqar SIDI n řɛeskarat: Seqsam xenni ikehhanen x Ccariɛa, ini:
12 Xzar, ijjen iksi aysum iqeddsen deg ubeḥrur n warruḍ nnes u s ubeḥrur nnes iḥada aɣrum niɣ min iwennan niɣ binu niɣ zzect niɣ min ma ittemwaccan, ma man aya ad idweř iqeddes?” Uca arrin-dd ikehhanen, nnan “Lla!”
13 Uca inna Ḥaggay: “Mařa ijj idweř ixmej zeg ict n řxecbet, uca xenni iḥada ca zi marra man aya, ma man aya ad idweř xenni ixmej?” Arrin-dd xas ikehhanen, nnan: “Ad idweř ixmej!”
14 Řexdenni yarra-dd Ḥaggay, inna: “Ammu i yeǧa řgens-a u ammu i yeǧa řgens-a zzat i wudem inu, iqqar SIDI, u ammu i teǧa marra řxedmet n ifassen nsen u min qeddmen d ddbiḥet, aqa-tt ixmej.
15 Maca řexxu, zeg wass-a d tsawent ggem uřawen nwem x man aya: Qbeř ma ittwassars weẓřu x weẓru di Zzawect Tameqqrant n SIDI,
16 qbeř ma ad imsar uya, yusa-dd yijjen ɣar yijj n uɛurric n imendi n ɛicrin n řeqyas, ammu i tuɣa din mɣir ɛecra, u yusa-dd yijj ɣar yict n tsirt n uḍiř, ḥima ad yayem xemsin n ibarmiřen, ammu tuɣa din mɣir ɛicrin.
17 Necc wtiɣ kenniw s imendi ittwasscemḍen zeg usemmiḍ, s jjriḥect n wefsu u s tebrurri, wtiɣ marra řxedmet n ifassen nwem, maca kenniw war dd ɣari tedwiřem ca, ammu i iqqar SIDI.
18 Zeg wass-a d tsawent ggem uřawen nwem x man aya, zeg wass wiss arebɛa u-ɛicrin n uyur wiss tesɛa, zeg wass nni di ittwassars dsas n Zzawect Tameqqrant n SIDI, ggem uřawen nwem x man aya,
19 ma aqa din zzarriɛet di tesraft? Tazayart d wartu n tazart d tcejjart n aremman d tcejjart n zzitun war dd-iwyen ɛad řɣiǧet! Zeg wass-a Necc ad barkeɣ!”
Lwaɛd i Zarubbabil
20 Deg wass wiss arebɛa u-ɛicrin yusa-dd wawař n SIDI i Ḥaggay i twařa wiss tnayen, inna:
21 “Siweř ɣar Zarubbabil, lwali n Yahuda, ini: Necc ad ssennhezzeɣ ijenwan d temmurt,
22 u Necc ad ssenqeřbeɣ řɛarc n tgeldin d tzemmar n tgeldin n řegnus, Necc ad ssenqeřbeɣ ikarruten n umenɣi s yinni i ten ineddhen uřa d yiysan ak-d imnayen nsen ad ttwaɣeḍřen, kuř ijj di ssif n wenneɣni.
23 Deg wass nni, iqqar SIDI n řɛeskarat, Necc ad cek ksiɣ, Zarubbabil, mmis n Ca’altiyal, amsexxar inu, iqqar SIDI, u Necc ad cek arreɣ d txadent n ucemmeɛ, maɣar Necc ixḍareɣ cek!, ammu i iqqar SIDI n řɛeskarat.”