4
Ddarem i arḍa n Arebbi
1 S uyenni, a aytma, aqa nettzaweg kenniw u nettẓaǧa i kenniw di Siditneɣ Yasuɛ, ḥima, am zzayneɣ třemdem mammec ittxeṣṣa ad tuyurem u ad tarḍam i AREBBI, ad teymam di man aya ktar,
2 minzi kenniw tessnem tiweṣṣa nni d awem newca s Siditneɣ Yasuɛ.
3 Aqa d man aya min ixs AREBBI, aqa ad teymam di tqeddast, ad tḥeyydem x marra farq-ccɣeř,
4 u maḥend kuř ijjen zzaywem ad issen mammec ittxeṣṣa ad yawi tamɣart nnes s tqeddast d ccan,
5 war iǧi di ccehwat n nnecwet, am řegnus nni war issinen ca AREBBI.
6 Ejj uřa d ijj zzaywem ad izɛem ad issehřec umas niɣ ad t iɣecc di tmesřact-a, minzi Siditneɣ ad ineqqem di man aya marra, am mammec nizzar nenna u neched awem.
7 Minzi AREBBI war xaneɣ dd-iřaɣa i řexmej, maca i tqeddast.
8 S uyenni wenni i ɣa issdeǧen, war issdeǧi ca bnadem, maca AREBBI, wenni iwcin Arruḥ nnes Iqeddsen daywem.
9 Nhřa ma nura awem-dd x tayri tenni jar wawmaten, aqa kenniw s yixef nwem ttwassřemdem zi AREBBI ḥima ad texsem ayawya.
10 Maɣar ammu i tᵉtteggem ak-d marra awmaten di Makiduniya tmun. Maca ttareɣ zzaywem, a aytma, ḥima ad tfeyyḍem di man aya.
11 Arzum ad teddarem di řhudnet, ad tewcem taynit i min iǧan nwem, ad txedmem s ifassen nwem, am mammec kenniw numur,
12 ḥima ad tuyurem s uweqqar ak-d yenni iǧan di barra, uca war tehdajem uřa d ict n řḥajjet zi ca n ijjen.
Aɛqab n Yasuɛ Lmasiḥ ɣar ddunect-a
13 A aytma, aqa xseɣ ad tessnem belli war ittxeṣṣi ad teksim s wemnus x yenni idewřen ṭṭṣen, am t tteggen iwdan inneɣni inni umi iqḍeɛ řayas.
14 Minzi mařa numen belli Yasuɛ tuɣa immut uca ikkar-dd, xenni ad kides yiwi AREBBI ɛawed inni idewřen ṭṭṣen ammu deg wenḍeř di Yasuɛ.
15 Maca ad awem nini aya s Wawař n Siditneɣ, aqa neccin, inni i ɣa iqqimen ař dd ɣa yas Siditneɣ, inni ɛad iddaren, war nᵉttizzar i yinni idewřen ad ṭṭṣen deg wenḍeř.
16 Minzi Siditneɣ s Ixef nnes ad dd-ihwa zeg ujenna, xmi dd ɣa iffeɣ řumur d tmijja n uzeǧif n lmalakat, u xmi i ɣa tiři tmijja n usuḍi s uyicc n AREBBI, uca imettan inni iǧan di Lmasiḥ ad dd-kkaren d imezwura.
17 Xas uca neccin, inni iqqimen u ɛad ddaren, ad kidsen nettwakkes deg iseynuten ɣar umeřqi ak-d Siditneɣ deg ujenna uca ammu i ɣa niři řebda ak-d Siditneɣ.
18 S uya ggem uř deg wayawya s wawařen-a.