9
Řɛahd n Arebbi ak-d Nuḥ
1 Xenni ibarek AREBBI Nuḥ d iḥenjiren nnes uca inna asen: “Jjem-dd řɣiǧet, marenyem u ɛemmarem tammurt!
2 Tiggʷudi d řɛurret zi kenniw ad iřint x marra řmař n řexřa, x marra ijḍaḍ n ujenna u x marra min ittbuɛen x temmurt u x marra iseřman di řebḥar: aqa mmewcen deg ufus nwem.
3 Marra min ittbuɛen, min iddaren, ad awem yiři d macca. Necc ad awem t wceɣ marra, am d awem wciɣ afsu aziza,
4 maca aysum ak-d buḥbeř nnes i iǧan d idammen nnes, war ten ttᵉttem.
5 D tidett ad ttareɣ idammen nwem n řeɛmur nwem, ad ten ttareɣ zeg ifassen n marra imuddaren, uřa zeg ifassen n bnadem, u zeg ifassen n umas n kuř ijjen ad ttareɣ řeɛmar n bnadem.
6 Wi ɣa issizzřen idammen n bnadem, idammen nnes ad ten ssizzřen s ufus n bnadem, minzi AREBBI igga bnadem di ṣṣifet nnes.
7 U kenniw, jjem-dd řɣiǧet, dewřem deg waṭṭas, mṭarrcem di temmurt uca dewřem deg waṭṭas xas.”
8 Uca issiweř AREBBI ak-d Nuḥ d iḥenjiren nnes nni ɣares, inna:
9 “Necc, xzar, Necc tteggeɣ Řɛahd inu akidwem u ak-d zzariɛet nwem awarni awem,
10 u ak-d marra buḥbeř iddaren nni iǧan akidwem, ak-d ijḍaḍ, ak-d řmař u ak-d marra řmař n řexřa x temmurt inni akidwem, wah, ak-d marra min dd-iffɣen zeg uɣarrabu ař marra min iddaren x temmurt.
11 Ad ggeɣ Řɛahd inu akidwem, aqa marra imeddaren s arrimet n weysum war ttwakessin ɛad s waman n sseḥřet, u war din tᵉttiři ɛad sseḥřet i ɣa yareddǧen tammurt.”
12 Xenni inna AREBBI: “D ta ad tiři d řeɛřamet n Řɛahd tenni i ɣa ggeɣ jar ayi d kenniw d marra řeɛmar iddaren akidwem, i marra jjiřat i řebda:
13 Ad ggeɣ řqews inu deg iseynuten wenni i ɣa yiřin d řeɛřamet n Řɛahd jar ayi d temmurt.
14 Xmi ɣa bḍiɣ iseynuten x temmurt, xenni ad imsar belli řqews-a ad dd-iḍhar deg iseynuten.
15 Xenni ad idareɣ Řɛahd inu jar ayi d kenniw d marra řeɛmar iddaren n marra imeddaren s arrimet n weysum. War dd-ddikkʷiřen waman d sseḥřet ɛawed, maḥend ad ssɣarqen marra imeddaren s arrimet n weysum.
16 Ad dd-iḍhar řqews deg iseynuten, uca Necc ad t ẓareɣ ḥima ad idareɣ Řɛahd i řebda jar AREBBI d marra řeɛmar iddaren di marra imeddaren s arrimet n weysum i iǧan x temmurt.”
17 Uca inna AREBBI i Nuḥ: “D ta d řeɛřamet n Řɛahd inu wenni i ɣa ggeɣ jar ayi d marra imeddaren s arrimet n weysum i iǧan x temmurt.”
Tarwa n Nuḥ
18 Tarwa n Nuḥ inni dd-iffɣen zeg uɣarrabu tuɣa aten d Cam d Ḥam d Yafat. Ḥam tuɣa d babas n Kenɛan.
19 Ina d třata n iḥenjiren n Nuḥ. Zzaysen ttwabezzɛen iwdan di marra tammurt.
20 Ibda Nuḥ ixeddem am ufeǧaḥ, iẓẓu tizayarin deg umarjeɛ n uḍiř.
21 Umi iswa binu, iscar uca iɛarra ixef nnes di řwesṭ n uqiḍun nnes.
22 Iẓra Ḥam, babas n Kenɛan, tuɛɛaryent n babas uca inna t i tnayen n aytmas di barra.
23 Ksin Cam d Yafat ca n werruḍ, ssarsen t x tɣarḍin n tnayen idsen nsen uca uyuren ɣar ḍeffar, dřin tuɛɛaryent n babatsen. Arrin aɣembub nsen ɣar ḍeffar, war ẓrin ca tuɛɛaryent n babatsen.
24 Ifaq-dd Nuḥ zi ssekra nnes uca idweř yargeb x min d as igga mmis amaẓuẓ.
25 Inna: “D amenɛuř i yeǧa Kenɛan! Ad yiři d amsexxar qaɛ n imsexxaren i aytmas!”
26 Uca inna: “Ad ittwabarek SIDI, AREBBI n Cam. Kenɛan ad yiři d amsexxar i nitni.
27 Zeɛma ad iwesseɛ AREBBI tazeddiɣt i Yafat, ad izdeɣ deg iqiḍan n Cam, u Kenɛan ad asen yiři d amsexxar.”
28 Awarni sseḥřet iddar Nuḥ ɛad teřt-mya u-xemsin n iseggʷusa.
29 Ammu i iddar Nuḥ tesɛa-mya u-xemsin n iseggʷusa, xenni immut.
Ina d imezruyen n yinni dd-ittwaxeřqen zeg ayt n Nuḥ: Cam, Ḥam d Yafat.