☰ Amezwaru 6
6
Tuɛeffna n iwdan
1 Řami bdan iwdan ad ktaren di temmurt uca urwent asen-dd yessitsen, ◼ 2 aqa ẓrin arrawen n AREBBI belli yessis n bnadem cnant, uca ksin timɣarin i yixef nsen zi marra tinni ixḍaren nitni. ◼  ◘ 3 Xenni inna SIDI: “War ittɣimi Arruḥ inu řebda di bnadem, aqa-t d ddat zi ssibbet n uweddar nnes. Ad iřin wussan n tudart nnes mya u-ɛicrin n iseggʷusa.” ◼
4 Deg wussan nni tuɣa ‘inifilim’, ixs ad yini ‘inni iwḍan’, di temmurt uca awarni man aya ɛawed, umi dd-udfen arraw n AREBBI ɣar yessis n iwdan uca urwent asen-dd. Nitni d ‘jjwaheř’ n zzman nni, d iryazen s yisem. ◼ 5 Iẓra SIDI belli řɣar n bnadem d aṭṭas x temmurt uca marra řemwayař n uxarreṣ n wuř nnes d aɛeffan kuř ass. ◘ 6 Uca indem SIDI umi igga bnadem di temmurt uca iqqes as wuř nnes. 7 Inna SIDI: “Ad mḥiɣ x wudem n temmurt bnadem i dd-xeřqeɣ, bnadem ak-d řebhayem d imuddaren ittbuɛen uřa d ijḍaḍ n ujenna, minzi nedmeɣ umi ten ggiɣ.” 8 Maca Nuḥ yufa arḍa di tiṭṭawin n SIDI.
Ina d imezruyen n yinni dd-ittwaxeřqen zi Nuḥ.
 
Nuḥ d ṭṭufan
9 Tuɣa Nuḥ d aryaz d amsegged ikmeř jar marra jjiřat nni iddaren akides. Yuyur Nuḥ ak-d AREBBI. ◘ 10 Uca ijja-dd Nuḥ třata n iḥenjiren: Cam d Ḥam d Yafat. ◼ 11 Tuɣa tammurt d ict n řxarbet di tiṭṭawin n AREBBI u tuɣa tammurt teccur s lɛunf. 12 Ixzar AREBBI ɣar temmurt, u xzar, aqa-tt d řxarbet, maɣar marra imeddaren s arrimet n weysum tuɣa xarrben abrid nsen x temmurt.
13 Inna AREBBI i Nuḥ: “Aneggar n marra imeddaren s arrimet n weysum aqa-t zzat i wudem inu, minzi tammurt teccur s lɛunf zzaysen. Aqa ad ten teḥḥiɣ ak-d temmurt. 14 Egg i yixef nnec ijj n uɣarrabu s ukeccuḍ n umerzi uca egg ixxamen i marra řmař deg uɣarrabu. Ɣeǧef aɣarrabu zi daxeř u zi barra s tizeft. ◼ 15 Ammu ittxeṣṣa ad t tegged: tuzzeggart n uɣarrabu ad tiři teřt-mya n iɣaǧen u tiru n uɣarrabu ad tiři xemsin n iɣaǧen u řuɛřa nnes ad yiři třatin n iɣaǧen. ◼ 16 Ittxeṣṣa ad tegged ict n tburjet i tfawt deg uɣarrabu uca ad tt tkemmřed anect n ijj n uɣiř zi sennej. Ad tegged tawwart n uɣarrabu deg uɣezdis nnes. Ad tegged ṭṭebqet n wadday d ṭṭebqet wiss tnayen di řwesṭ d ṭṭebqet wiss třata sennej. 17 Aqa Necc ad ssekkeɣ sseḥřet n waman x temmurt, ḥima ad teḥḥiɣ sadu ujenna marra imeddaren s arrimet n weysum i di iǧa arruḥ n tudart. Marra min iǧan di temmurt ad iḍřeq i buḥbeř. 18 Maca ad ssbeddeɣ Řɛahd inu akidek uca cek ad tadfed ɣar uɣarrabu, cek d iḥenjiren nnec d temɣart nnec d temɣarin n iḥenjiren nnec akidek. ◘ 19 Uca zi marra min iddaren, zi marra imeddaren s arrimet n weysum ad tessidfed tyuya ɣar uɣarrabu ḥima ad ddaren akidek: ittxeṣṣa ad yiři d awtem d tewtemt. 20 Ad ɣarek dd-tas tyuya zi marra, ḥima ad teḥḍid tudart nsen: zeg ijḍaḍ ɛlaḥsab markat nsen, zi řebhayem ɛlaḥsab markat nsent u zi marra imuddaren nni ittbuɛen x temmurt ɛlaḥsab markat nsen. 21 Uca cek, ksi i yixef nnec zi marra macca i ittwaccan uca smun i-tt ɣarek, ḥima ad ac yiři d macca uca uřa i nitni.” 22 Uca igga Nuḥ am mammec marra i xef t iweṣṣa AREBBI, ammu i t igga. ◘
 
 
◼ 6:1 iwdan - s Tɛibranit ‘bnadem’, uřa di ayet wiss 2. ◼ 6:2 arrawen n Arebbi - man aya ixs ad yini ‘lmalakat’. Xzar Ayub 1:6; 2:1, 38:7. Maca lmalakat war zemmarent ad adfent x yessis n bnadem, maca ad taɣ s tseḥḥart nsent u umi bdant ad zedɣen deg iryazen d temɣarin (am jjnun) ggin zzaysen arrawen nni iggin axmi ‘jjwaheř’. Jjwaheř nni ssfesden jjiř n bnadem uřa d zzariɛet n temɣart i zi iwaɛd SIDI AREBBI Amsenjem nnes, Lmasiḥ (xzar Amz. 3:15). S uyenni tuɣa ittxeṣṣa i SIDI AREBBI ḥima ad iḥkem x ddunect marra, ařami igga ṭṭufan ad dd-yas x temmurt. Mɣir Nuḥ i iqqimen iddar ak-d twacunt nnes. SIDI AREBBI iḥebbes uřa d lmalakat nni iggin aya (xzar 1 Bṭ. 3:19, 20, 2 Bṭ. 2:4 u Yah. 6, 7). ◘ 6:2 2 Bṭ. 2:4; Judas 1:6, 7 ◼ 6:3 nnes - s Tɛibranit ‘nsen’. ◼ 6:4 inifilim - s Tɛibranit ina d ‘inni iwḍan’. Nessen aqa-ten d iwdan imɣaren aṭṭas maɣar nufa awař-a uřa deg Wedlis Iqeddsen di řectab ‘Di řexřa’ 13:33. S uyenni nessen aqa isem wanita iceyyar ɣar ‘jjwaheř’. ◘ 6:5 Amz. 8:21; Ayub 15:16; Awřn. 6:14; Irm. 17:9; Mt. 15:19; Rum. 3:10, 11, 12; 8:6. ◘ 6:9 Amz. 5:22. ◼ 6:10 Cam - isem-a wanita ixs ad yini ‘isem’. Ḥam - ixs ad yini ‘igwa’ niɣ ‘iḥma’. Yafat - isem wanita ixs ad yini ‘wenni ittwazeǧeɛ aṭṭas’ niɣ ‘innurezmen’. ◼ 6:14 tizeft - awař ‘tizeft’ di Tɛibranit dayes řemɛani. Izemmar ad yini ‘afeddi’ niɣ ‘ttaman n ufeddi’. Xẓar Uf. 21:30 u Řxř. 35:32. S uyenni mařa ittwafdi ijj bnadem aqa man aya ixs ad yini belli uřa d ddnub nnes ad iřin ttwaɣemsen. ◼ 6:15 iɣaǧen - ijj n uɣiř ɛřayen 50 cm niɣ azyen n mitru. ◘ 6:18 1 Bṭ. 3:20; 2 Bṭ. 2:5. ◘ 6:22 Amz. 7:5; Ɛbr. 11:7.
☰