50
Anḍeř n Yaɛqub
1 Xenni ingez Yusuf x uɣembub n babas, iru xas uca issudem i-t.
2 Yumur Yusuf i imsexxaren nnes, iḍbiben, ad ḥennḍen babas uca iḍbiben ḥennḍen Israil.
3 Arebɛin n wussan i dayes kkin, minzi ḥdajen ussan nni maḥend ad kemmřen aḥenneṭ uca run marra Imiṣriyyen sebɛin n wussan di ssibbet nnes.
4 Umi ɛdun wussan n řeɛzat xas, issiweř Yusuf ak-d yenni n taddart n firɛun, inna: “Mařa ufiɣ řexxu arḍa di tiṭṭawin nwem, ttzawageɣ kenniw, ad tessiwřem deg imejjan n firɛun, inim:
5 “Baba inu ijja ayi ad jjaǧeɣ uca inna: ‘Aqa ttmettiɣ. Ittxeṣṣa ad ayi tneḍřed deg wenḍeř nni neqceɣ i yixef inu di temmurt n Kenɛan!’ Xenni, ttzawageɣ, ejj ayi ad raḥeɣ řexxu ad neḍřeɣ baba uca awarni man aya ad dd-ɛeqbeɣ.”
6 Uca inna firɛun: “Ruḥ, nḍeř babac, am mammec yarra cek ad as tejjuǧed.”
7 Uca igeɛɛed Yusuf ḥima ad inḍeř babas uca geɛɛden marra imsexxaren n firɛun akides, imɣaren n taddart nnes d marra imɣaren n temmurt n Miṣra,
8 uřa d marra taddart n Yusuf d aytmas nnes d taddart n babas. Mɣir iḥenjiren imeẓyanen nsen d wuǧi nsen d ifunasen d tfunasin nsen jjin ten di temmurt n Jucan.
9 Geɛɛden akides ikarruten d yinni inyin x yeysan uca ggin ijj n uqarru n řɛeskar imɣar.
10 Umi iwḍen ɣar unedrar n Atad, wenni iǧan x ujemmaḍ n L’Urdun, ssgeɛɛden din ict n tɣuyyit temɣar, tejhed aṭṭas uca igga Yusuf din ijj n wecḍan x babas i yijj n řmijař n sebɛa n wussan.
11 Ẓrin imezdaɣ n temmurt, ayt n Kenɛan, acḍan deg unedrar n Atad, nnan: “Wa d acḍan imɣar n Imiṣriyyen.” X uya řaɣan isem nnes Abal-Miṣrayim, wenni iǧan x ujemmaḍ n L’Urdun.
12 Ggin as iḥenjiren nnes am mammec ten iweṣṣa.
13 Arbun t iḥenjiren nnes ɣar temmurt n Kenɛan, neḍřen t deg ifri deg iyyar n Makfila nni isɣa Ibrahim ak-d yeyyar zi Ifrun, Aḥitti, arendad n Mamri, maḥend ad yiři d anḍeř nnes.
14 Awarni řami inḍeř babas, iɛqeb Yusuf ɣar Miṣra, netta d yaytmas d marra inni akides dd-igeɛɛden, maḥend ad neḍřen babas.
15 Umi ẓrin aytmas n Yusuf babatsen immut, nnan: “Mařa icarh aneɣ Yusuf, ad aneɣ ixeǧeṣ nican marra řɣar nni dayes negga.”
16 S uyenni ssekken ad xebbaren Yusuf s man aya, nnan: “Babac iweṣṣa qbeř řmewt nnes, inna:
17 ‘Ammu i ɣa tinim i Yusuf: Ttzawgeɣ cek, ɣfar řexxu axeṭṭu n aytmac d ddenb nsen d řɣar i d ac ggin. Ɣfar řexxu axeṭṭu n imsexxaren n AREBBI n babac!’ ” Uca isɣuy Yusuf am kis ssiwřen ammu.
18 Xenni usin-dd ɛawed aytmas s yixef nsen, wḍan as zzat i uɣembub nnes, nnan: “Aqa-neɣ da d imsexxaren nnec!”
19 Yarra-dd xasen Yusuf: “War tteggʷdem ca! Ma aqa ayi necc deg wemcan n AREBBI?
20 Waxxa kenniw txarrṣem dayi s řɣar, aqa AREBBI inwa zzayes řxar, ḥima ad yegg am mammec i teǧa ass-a, ad yejj di tudart ijj n řgens d ameqqran.
21 Řexxu, war tteggʷdem ca! Necc ad kenniw ɛewwřeɣ, kenniw d iḥenjiren imeẓyanen nwem.” Ammu ten issfewwej uca issiweř akidsen ɣar wuřawen nsen.
22 Tuɣa Yusuf izeddeɣ di Miṣra, netta d taddart n babas, uca iddar Yusuf mya u-ɛecra n iseggʷusa.
23 Iẓra Yusuf iḥenjiren n Ifrayim ař jjiř wiss třata. Aqa ttwarwen-dd iḥenjiren n Makir, mmis n Manassa, ɛawed x ifadden n Yusuf.
24 Uca inna Yusuf i yaytmas: “Necc ad mmteɣ, maca AREBBI ad kenniw yarzef s tidett uca ad kenniw issgeɛɛed zi temmurt-a ɣar temmurt i iwaɛd s tjaǧit i Ibrahim d Isḥaq d Yaɛqub.”
25 Xas uca issjjuǧ Yusuf ayt n Israil, inna: “AREBBI ad kenniw yarzef s tidett uca xenni ad teksim ssa iɣsan inu!”
26 Immut Yusuf umi tuɣa ɣares mya u-ɛecra n iseggʷusa. Ḥennḍen t uca ssarsen t di řmeḥmeř n umettin di Miṣra.