45
Yusuf issargeb ixef nnes i aytmas
1 Xenni war izemmar ɛad Yusuf ad iṭṭef ixef nnes zzat i yinni akides marra uca iřaɣa: “Suffɣem marra inni akidi da!” War iqqim ḥed akides řami isscen Yusuf i yaytmas min iɛna.
2 Řexdenni yarxu tmijja nnes s iɣuyyan, ařami d as sřin Imiṣriyyen, uca uřa d taddart n firɛun tesřa aya.
3 Inna Yusuf i yaytmas: “Necc d Yusuf! Ma iddar ɛad baba?” Aytmas war zemmaren ad xas dd-arren, minzi tuɣa ggʷeden zzayes.
4 Inna Yusuf i yaytmas: “Qarrbem-dd řexxu ɣari!” Uca nitni qarrben ɣares. Inna xenni: “Necc d Yusuf umatwem, wenni tezzenzem i Miṣra.
5 Řexxu, war kessim s wemnus u war t ttejjim ad yiři d axeyyeq di tiṭṭawin nwem umi d ayi tezzenzem danita i Miṣra, aqa AREBBI issekk ayi-dd, maḥend ad kenniw jjeɣ teddarem.
6 Aqa řexxu ɛad tnayen n iseggʷusa n řaẓ di temmurt uca qqim ɛad xemsa n iseggʷusa war daysen ittiři tyarza niɣ tameyra.
7 Maca AREBBI issekk ayi-dd zzatwem, ḥima ad awem ggeɣ min iqqimen x temmurt u ḥima ad ḥḍiɣ tudart nwem i yijj n usenjem imɣar.
8 Xenni řexxu, kenniw war d ayi dd-tessekkem ca da, maca AREBBI d wenni d ayi iggin d babas i firɛun d sidi x marra taddart nnes d řḥakem x marra tammurt n Miṣra.
9 Qeǧqem deɣya, sgeɛɛdem ɣar baba, inim as: ‘Ammu i iqqar mmic Yusuf: AREBBI igga ayi d sidi n marra Miṣra. Araḥ-dd ɣari, war tteɛgiz.
10 Ad tzedɣed di temmurt n Jucan, ad tiřid zzati, cek d iḥenjiren nnec, d iḥenjiren n iḥenjiren nnec, d wuǧi d ifunasen d tfunasin uřa d marra min ɣarek.
11 Ad ac ggeɣ arzeq din, minzi ad dd-asen ɛad xemsa n iseggʷusa n řaẓ, ḥima war tᵉtteḍɛifed, cek lla, taddart nnec lla, uřa d marra min ɣarek lla!
12 Xzar, tiṭṭawin nwem ẓrint, uřa d tiṭṭawin n uma Binyamin, aqa d necc i kidwem issawařen.
13 Ɛeřmem i baba x marra aɛuǧi inu di Miṣra u x marra min teẓrim. Qeǧqem deɣya, tiwyem-dd baba da.”
14 Uca ingez x yiri n Binyamin umas, iru, uca Binyamin iru x yiri nnes.
15 Issudem marra aytmas, iru xasen. Awarni man aya ssiwřen akides aytmas.
16 Řami tesřa taddart n firɛun řexbar-a, nnan: “Aytmas n Yusuf usin-dd!”. Tuɣa-t d řexbar aṣebḥan di tiṭṭawin n firɛun d imsexxaren nnes.
17 Inna firɛun i Yusuf: “Ini i aytmac: ‘Ggem aya: sarbum zwayeř nwem uca geɛɛdem, ruḥem ɣar temmurt n Kenɛan.
18 Ksim-dd babatwem d raǧ nwem, tusim-dd ɣari. Aqa ad awem wceɣ lemliḥ n temmurt n Miṣra uca ad teccem zi min icnan n temmurt.
19 Aqa ttwaggent tiweṣṣa di ṭṭweɛ nnek. Ggem aya: Ksim zi temmurt n Miṣra ikarruten i iḥenjiren nwem u i temɣarin nwem, awyem-dd zzayes babatwem uca asem-dd da.
20 War ttejjim tiṭṭawin nwem ad ssḥissfent i řqecc nwem, minzi lemliḥ n temmurt n Miṣra ad yiři nwem.’ ”
21 Uca ammu i ggin ayt n Israil. Iwca asen Yusuf ikarruten x řumur n firɛun uca iwca asen ɛawed macca i webrid.
22 Iwca i kuř ijj zzaysen weḥḥdes arruḍ n jdid, maca i Binyamin iwca as teřt-mya n uqiyyat n nnuqart d xemsa n warruḍ d jdid.
23 U ammu ɛawed issekk i babas ɛecra n yeɣyař ccuren s min ifarzen n Miṣra u ɛecra n teɣyař ccurent s imendi d weɣrum d macca i babas umi ɣa yiři netta deg webrid.
24 Iqebbeḍ aytmas uca ruḥen. Inna asen netta: “War ttmenɣim ca deg webrid.”
25 Geɛɛden zi Miṣra, iwḍen ɣar temmurt n Kenɛan ɣar Yaɛqub, babatsen.
26 Wcin as řexbar, nnan: “Yusuf aqa iddar ɛad, wah, aqa-t d řḥakem n marra tammurt n Miṣra!” Xenni isxef wuř nnes, minzi war ten yumin ca.
27 Umi d as ɛawden marra awařen n Yusuf inni d asen inna u řami iẓra ikarruten inni dd-issekk Yusuf ḥima ad t awyen, iɛqeb-dd buḥbeř n babatsen Yaɛqub.
28 Uca inna Israil: “Kfa! Yusuf mmi aqa iddar! Ad raḥeɣ uca ad t ẓarɣ qbeř i ɣa mmteɣ!”