33
1 Issgeɛɛed Yaɛqub tamuɣři nnes uca iẓra Ɛisu d arebɛa-mya n yeryazen akides xeccen-dd. Ifarq Yaɛqub iḥenjiren x Liya d Raḥil d tnayen n tiyya.
2 Igga tiyya d tarwa nsent ɣar zzat, awarni asent Liya d tarwa nnes u Raḥil d Yusuf d ineggura.
3 Umi iɛdu zzat i tiṭṭawin nsen, ibendeq ɣar temmurt sebɛa n twařawin ařami dd-yiweḍ ɣar umas.
4 Ɛisu yuzzeř-dd ḥima ad t iřqa, idarreɛ as, ingez as x yiri nnes, issudem i-t uca run s tnayen.
5 Xas uca issgeɛɛed tiṭṭawin nnes, iẓra timɣarin d iḥenjiren nni uca inna: “Min ɛnan ina inni akidek?” Netta yarra-dd xas: “D tarwa nni iwca AREBBI zeg arḍa nnes i umsexxar nnec.”
6 Uca reḥḥgent-i-dd tiyya, nitenti d tarwa nsent, uca bendqent.
7 Treḥḥeg-dd ɛawed Liya d iḥenjiren nnes uca bendqen. Řexdenni iqarreb-dd Yusuf d Raḥil uca bendqen.
8 Inna as: “Min texsed ak-d ubarru-ya n řɛeskar nni řqiɣ?” Netta inna: “Necc ssekkeɣ t, maḥend ad afeɣ arḍa di tiṭṭawin n sidi inu!”
9 Inna Ɛisu: “Aqa ɣari aṭṭas, uma inu! Ad yiři i cek min iǧan nnec!”
10 Xas uca inna Yaɛqub: “Lla, ttzawageɣ cek! Mařa ufiɣ řexxu arḍa di tiṭṭawin nnec, ksi arriɣalu inu zeg ifassen inu, maɣar ẓriɣ udem nnec axmi ẓriɣ udem n AREBBI uca tqebřed xafi s řemřaḥet.
11 Ttzawgeɣ cek, ksi lbaraka inu i d ac dd-iwyeɣ, minzi AREBBI imṣurruf akidi s arḍa uca necc ɣari kuřci.” Ikellef i-t uca iksi t.
12 Netta inna: “Ejj aneɣ ad nefsi iqiḍan nneɣ, ad nraḥ. Necc ad raḥeɣ zzatec.”
13 Maca netta inna as: “Sidi inu issen, aqa iḥenjiren-a arehfen u aqa ɣari uǧi d tfunasin urwent ssuṭṭuḍent. Mařa bnadem izeyyar xasent aṭṭas, waxxa mɣir i yijj n wass, ad immet wuǧi marra.
14 Ad iɛdu řexxu sidi inu zzat i uɣembub n umsexxar nnes u necc ad dd-aseɣ cwayt cwayt ak-d iṣuraf n řeksibet i iǧan zzati uřa ak-d iṣuraf n iḥenjiren, ař dd ɣa awḍeɣ ɣar sidi inu di Saɛir.”
15 Inna Ɛisu: “Ad jjeɣ řexxu akidek ca n iwdan inni iǧan akidi.” Maca netta inna: “Umi ddegga? Ejj ayi ad afeɣ arḍa di tiṭṭawin n sidi inu!”
16 Iɛqeb-dd Ɛisu deg wass nni x webrid ɣar Saɛir.
17 Uca ifsi Yaɛqub iqiḍan nnes, yuyur ɣar Sukkut, ibna din taddart i yixef nnes uca igga iɛuccuten n tseṭṭa i řebhayem nnes. X uya iřaɣa isem n wemcan nni Sukkut, ixs ad yini ‘Iɛuccuten’.
18 Umi dd-iɛqeb Yaɛqub zi Fadan-Aram, yusa-dd ɣar Calim, ict n tendint n Cakim, tenni iǧan di temmurt n Kenɛan, uca iwta iqiḍan nnes zzat i tendint.
19 Isɣa ṭṭarf n yeyyar mani iwta iqiḍan nnes, zeg ifassen n iḥenjiren n Ḥamur, babas n Cakim, s mya n iziynat n nnuqart iweznen.
20 Issgeɛɛed din ijj n uɛalṭar min xef temmars tɣarṣt uca iřaɣa as: ‘Arebbi d AREBBI n Israil!’