1 Řami idweř Isḥaq d awessar u tiṭṭawin nnes ɛemcent ařami ɛřaḥař war ittwiři, iřaɣa Ɛisu, mmis amenzu, inna as: “Mmi!” Uca netta inna as: “Aqa ayi da!” 2 Uca inna: “Aqa necc wsareɣ, war ssineɣ ass i di ɣa mmteɣ. 3 Řexxu, ksi řesnaḥ nnec d weqrab nnec n fřitcat d řqews nnec, teffɣed ɣar řexřa uca gmar ayi-dd taymart i macca. 4 Sewjed ayi-dd ict n macca icnan i d ayi ɣa iɛejben uca tewced ayi tt-i-dd, ad tt cceɣ, ḥima ad cek barkeɣ qbeř ma ad mmteɣ.” 5 Rifqa tuɣa tesřa umi issiweř Isḥaq ak-d mmis Ɛisu. Uca iruḥ Ɛisu ɣar řexřa ḥima ad iymar timeyra, maḥend ad tt-i-dd-yawi. 6 Xenni tessiweř Rifqa ak-d Yaɛqub mmis, tenna as: “Xzar, necc sřiɣ babac issawař ak-d Ɛisu umac, inna as: 7 ‘Awi ayi-dd ict n teymart uca sewjed ayi ict n macca lemliḥ, maḥend ad tt cceɣ, ḥima necc ad ac barkeɣ qibač i wudem n SIDI qbeř i ɣa mmteɣ.’ 8 Řexxu, mmi, seř-dd ɣari min zi cek ɣa umureɣ. 9 Řuh ɣar tḥimart uca awi ayi-dd tnayen n iɣayḍen imeẓyanen zeg iɣayḍen. Necc ad zzaysen sswejdeɣ ict n macca icnan i babac, am mammec d as ittaɛjib 10 u ittxeṣṣa cek ad t tawyed i babac, ad yecc, ḥima ad cek ibarek qbeř řmewt nnes.” 11 Xenni inna Yaɛqub i Rifqa, yemmas: “Xzar, Ɛisu uma d aryaz bu-cɛar u necc d aryaz d ařeqqaɣ. 12 Balak ad ayi iḥada baba uca ad iřiɣ amecnaw aɣeccac di tiṭṭawin nnes. Xenni ad ksiɣ ict n nneɛřet xafi, war kessiɣ lbaraka.” 13 Yemmas tenna as: “Nneɛřet nnec ad tiři xafi, a mmi! Ṭaɛ i wawař inu waha, awyi ten-dd ɣari.”

14 Xenni netta iruḥ, iksi ten uca yiwyi ten i yemmas. Uca yemmas tegga ict n macca icnan am mammec d as ittaɛjib i babas. 15 Teksi Rifqa arruḍ ifeccḥen aṭṭas i tuɣa ɣares di taddart zeg warruḍ n Ɛisu, mmis amenzu, uca tarḍ i-t Yaɛqub, mmis amaẓuẓ. ◼ 16 Tegga as iřem n iɣayḍen imeẓyanen zeg iɣayḍen x ifassen nnes u x yiri nnes ařeqqaɣ. 17 Tewca macca-ya icnan ak-d weɣrum nni tenggʷa deg ifassen n mmis Yaɛqub. 18 Netta yusa-dd ɣar babas, inna: “A Baba!” Netta inna: “Aqa ayi da! Min teɛnid cek, a mmi?” 19 Inna Yaɛqub i babas: “Necc d Ɛisu, amenzu nnec. Ggiɣ min d ayi tennid. Kkar řexxu, qqim, ecc zi tmeyra inu, ḥima ad ayi ibarek řeɛmar nnec.” 20 Xenni inna Isḥaq i mmis: “Mammec teggid tufid tt deɣya, a mmi?” Inna: “Maɣar SIDI, AREBBI nnec, igga i-tt deg webrid inu.” 21 Isḥaq inna i Yaɛqub: “Qarreb-dd řexxu, ḥima ad cek ḥadiɣ, a mmi, ma cek d mmi Ɛisu niɣ lla.” 22 Řami dd-iqarreb Yaɛqub ɣar babas Isḥaq, iḥada t uca inna: “Tmijja d tmijja n Yaɛqub, maca ifassen d ifassen n Ɛisu.” 23 Netta war t iɛqiř, minzi ifassen nnes tuɣa ceɛɛaren amecnaw ifassen n Ɛisu uca ibark i-t. 24 Inna: “Ma d cek d mmi Ɛisu?” Netta inna: “D necc!” 25 Xenni inna: “Sqarreb ayi tt-i-dd zzati, ḥima ad cceɣ zi tmeyra n mmi, ḥima necc ad cek barkeɣ.” Issars i-tt-i-dd zzates uca icca. Yiwi as-dd ɛawed binu uca iswa. ◼ 26 Inna as babas Isḥaq: “Qarreb-dd ɣari řexxu, sudem ayi, a mmi!” 27 Uca iqarreb-dd ɣares, issudem i-t. Icemm Isḥaq arriḥet n warruḍ nnes uca ibark i-t, inna: “Xzar, řefwaḥet n mmi am řefwaḥet n yeyyar i ibarek SIDI. 28 Ad ac iwc AREBBI zi nnda n ujenna u zi řeydam n temmurt uřa d waṭṭas n imendi d binu n jdid. ◘ 29 Ad ac xedmen řegnus uca ccuɛub ad ac bendqen. Ḥkem x aytmac u ejj iḥenjiren n yemmac ad ac bendqen! Inni cek i ɣa ineɛřen, ad ttwaneɛřen, u inni cek ɣa ibarken, ad ttwabarken.” ◘

30 Awarni řami ikemmeř Isḥaq lbaraka i Yaɛqub uca am dd-iffeɣ Yaɛqub ɛad x babas Isḥaq, iɛqeb-dd Ɛisu, umas, zi teymart nnes. 31 Issewjed xenni ict n macca icnan uca iksi tt ɣar babas, inna as: “Ttzawgeɣ, baba, kkar tecced zi teymart n mmic, ḥima cek ad ayi tbarked.” ◼ 32 Inna as Isḥaq, babas: “Min teɛnid cek?” Netta inna: “Necc d mmic, amenzu nnec, Ɛisu.” 33 Uca innexřeɛ Isḥaq, inna: “Min iɛna wanita i dd-yusin da, iṭṭef taymart uca yiwi ayi tt-i-dd? Cciɣ zi marra man aya qbeř dd-tusid uca necc barkeɣ t u ad ittwabarek ɛawed.” 34 Umi isřa Ɛisu awařen n babas, isɣuy s yijj n řeɛyad ijhed yarzeg, inna i babas: “Barek ayi uřa d necc, a baba!” ◘ 35 Inna: “Yusa-dd umac s teḥraymect, iksi lbaraka nnec.” 36 Xenni inna: “Ma war iǧi isem nnes s řḥeqq Yaɛqub? Aqa icmet ayi tnayen n twařawin. Iksi řḥeqq n umenzu inu uca aqa řexxu iksi ɛawed lbaraka inu.” Xenni inna: “Ma war ɣarek teqqim ca n lbaraka i necc?” ◘ 37 Xenni yarra-dd Isḥaq, inna i Ɛisu: “Xzar, necc ggiɣ t d řḥakem xak uca wciɣ as aytmas d imsexxaren, uřa s imendi d binu n jdid ɛewwřeɣ t. Min din ɛad, ad ac wceɣ řexxu, a mmi?” 38 Inna Ɛisu i babas: “Ma ɣarek mɣir lbaraka-ya waha, a baba? Barek ayi ɛawed, uřa d necc, a baba!” Uca issgeɛɛed Ɛisu tmijja nnes, isɣuy. ◘ 39 Xenni yarra-dd Isḥaq x babas, inna as: “Xzar, ad tiři tzeddiɣt nnec iggʷejjen x řeydam n temmurt u x nnda n ujenna sennej. 40 S ssif nnec i ɣa teqqimed teddared u ad txedmed i umac. Maca xmi ɣa teqqimed ad tenhezzed, ad imsar ad tawḍed ad tekksed zayřu nnes x yiri nnec.”

41 Uca icarh Ɛisu Yaɛqub di ssibbet n lbaraka i zi t ibarek babas, uca inna Ɛisu deg wuř nnes: “Ad awḍen wussan n uɛezzi n baba, xenni ad nɣeɣ uma Yaɛqub.” 42 Umi nnan i Rifqa awařen n Ɛisu, mmis amenzu, tᵉssekk ijjen ad iřaɣa i Yaɛqub, mmis amaẓuẓ, tenna as: “Xzar, Ɛisu umac yarezzu mammec zzayek i ɣa ixřef, netta ixs ad cek ineɣ. 43 Řexxu, a mmi, ṭaɛ i wawař inu. Kkar uca tarewřed ɣar Ḥaran ɣar uma Laban. 44 Zdeɣ akides ca n wussan ař ɣa yarsa wesɛar n umac. 45 Xmi ɣa ixsi uxeyyeq n umac uca ad ittu min d as teggid, necc ad ssekkeɣ ijjen, maḥend ad cek dd-yawi ssenni. Mayemmi i zzaywem ɣa ttwaḥarrmeɣ s tnayen idwem deg ijj n wass?”

46 Tenna Rifqa i Isḥaq: “Carrheɣ tudart inu di ssibbet n yessis n Ḥit. Mařa Yaɛqub yiwi tamɣart zi tebřiɣin n Ḥit, am tnayen-a, zi tḥenjirin n temmurt-a, man lqima i ɣa yiřin ɣar tudart inu?” ◘