1 Tuɣa ɣar Sara mya u-sebɛa u-ɛicrin n iseggʷusa. Man aya d řmijař n iseggʷusa n tudart n Sara. 2 Uca temmut Sara di Qaryat-Arbaɛ, ixs ad yini Ḥabrun, di temmurt n Kenɛan. Uca yudef-dd Ibrahim ɣar uqiḍun, icḍen x Sara, isɣuy xas. 3 Xas uca ikkar Ibrahim ṭṭarf i umettin nnes, uca issiweř ak-d tarwa n Ḥit, inna: 4 “Necc d abarrani d amɛezzeb ɣar awem. Wcem ayi mɣir anḍeř d agřa jar awem, ḥima ad neḍřeɣ amettin inu zi zzat inu.” ◘ 5 Arrin-dd tarwa n Ḥit x Ibrahim, nnan as: 6 “Seř ɣarneɣ, a sidi inu! Cek d řḥakem n AREBBI jar aneɣ. Nḍeř amettin nnec deg wenḍeř nneɣ iṣebḥen. Uřa d ijj zzayneɣ ad cek iṭṭef x wenḍeř nnes, ḥima ad dayes tneḍřed amettin nnec.” 7 Xenni ikkar Ibrahim, ibendeq zzat i řgens n temmurt, zzat i tarwa n Ḥit 8 uca issiweř akidsen, inna: “Mařa kenniw s array nwem ad neḍřeɣ amettin inu zi zzat inu, sřem ɣari uca zawgem di ṭṭweɛ inu ɣar Ɛifrun, mmis n Zuhar, 9 maḥend ad ayi iwc ifri n Makfila, d wenni nnes, ɣar ṭṭarf n yeyyar nnes. Ejj i-t ad ayi t iwc s ttaman nnes ikmeř. Ad yiři d anḍeř inu i ɣa mellkeɣ jar awem.” 10 Ɛifrun tuɣa iqqim jar tarwa n Ḥit uca Ɛifrun, Aḥitti, yarra-dd x Ibrahim deg imejjan n tarwa n Ḥit d marra inni yudfen ɣar tewwart n tendint nnes, inna: 11 “Lla, a sidi inu, seř-dd ɣari! Necc ad ac wceɣ iyyar uřa d ifri nni dayes iǧan. Zzat i tiṭṭawin n tarwa n řgens inu ad ac t wceɣ, nḍeř amettin nnec!” 12 Xenni ibendeq Ibrahim s uɣembub nnes ɣar temmurt zzat i řgens n temmurt 13 uca issiweř ak-d Ɛifrun deg imezzuɣen n řgens n temmurt, inna: “Ttzawgeɣ, mařa texsed, seř-dd ɣari. Ad ac wceɣ nnuqart n yeyyar, qbeř i-tt zzayi, xenni ad dayes neḍřeɣ amettin inu.” 14 Yarra-dd Ɛifrun x Ibrahim, inna as: 15 “Sidi inu, seř-dd ɣari! Min ixs ad yini iyyar isekkwan arebɛa-mya ciqlu n nnuqart jar ayi d cek? Nḍeř amettin nnec!” ◼ 16 Isřa Ibrahim i Ɛifrun uca iwzen Ibrahim i Ɛifrun tmenyat n nnuqart i xef issiweř deg imezzuɣen n tarwa n Ḥit: arebɛa-mya ciqlu n nnuqart, am tt nnumen isebbaben. ◘ 17 Ammu i idweř yeyyar n Ɛifrun, wenni iǧan di Makfila arendad n Mamri, iyyar d ifri wenni dayes iǧan d marra ticejjura inni deg iyyar ɣar iymiren nnes i d as dd-innḍen, ◼  ◘ 18 d agřa n Ibrahim zzat i tarwa n Ḥit d marra inni yudfen ɣar tewwart n tendint. 19 Awarni aya inḍeř Ibrahim Sara, tamɣart nnes, deg ifri n yeyyar n Makfila qibač i Mamri, wenni iǧan d Ḥabrun di temmurt n Kenɛan. 20 Ammu i idweř iyyar ak-d yefri i dayes iǧan zi tarwa n Ḥit ɣar Ibrahim am wenḍeř nnes.