1 Uca iḍhar SIDI i Ibrahim ɣar tcejjura n yigg n Mamri umi tuɣa yareyyeḥ ɣar wadaf n uqiḍun nnes di ṭṭḥa n uziř. 2 Issgeɛɛed tamuɣři nnes, iẓra, aqa din třata n yeryazen qibač nnes. Umi ten iẓra, ikkar ittazzeř ɣarsen zi wadaf n uqiḍun. Uca ibendeq s uɣembub nnes ɣar temmurt, ◼  ◘ 3 inna: “A Sidi inu, mařa řexxu ufiɣ arḍa di tiṭṭawin nnec, ttzawageɣ cek, war ɛeddu x umsexxar nnec. 4 Ejj imsexxaren inu ad dd-awyen cwayt n waman uca sirdem iḍaren nwem uca zzřem cwayt sadu tcejjart-a. ◼ 5 Ad dd-awyeɣ ařeqquz n weɣrum ḥima ad ttwaneɛcen wuřawen nwem, xenni ad teɛdum. Aqa x uya i dd-tekkim zzat i umsexxar nwem!” Nitni nnan: “Egg am mammec tennid.”

6 Iruḥ Ibrahim deɣya ɣar uqiḍun ɣar Sara, inna: “Deɣyat, ksi třata n řeqyas n waren azdad, eggw i-ten uca egg zzayes tifḍirin.” ◼ 7 Xas uca yuzzeř Ibrahim ɣar ifunasen uca iṭṭef-dd ijj n umeẓyan n ufunas igma d lemliḥ, iwca i-t i ubřiɣ, uca wa iqeǧeq, ḥima ad t issewjed. 8 Netta iksi ɛawed ddhen d uɣi d umeẓyan n ufunas nni issewjed, uca issars i-t zzatsen, u netta tuɣa ibedd qibač nsen sadu tcejjart, uca ccin. 9 Xenni nnan as: “Mani teǧa Sara tamɣart nnec?” Yarra-dd xasen: “Aqa-tt din deg uqiḍun.” 10 Uca Netta inna: “D tidett ad ɣarek dd-dewřeɣ ɣar řweqt n tudart u xzar, ad ɣares yiři uḥenjir ɣar Sara, tamɣart nnec.” U Sara tesřa ɣar wadaf n uqiḍun nni iǧan awarni as. ◘ 11 Ibrahim d Sara tuɣa wsaren, uyuren deg wussan, uca Sara tuɣa tbedd as tubbart n temɣarin. ◘ 12 Uca teḍḥec Sara deg wuř nnes, tenna: “Awarni tewsar inu, ma ad ɣari yiři řxir-a d lemliḥ qaɛ, am iǧa sidi inu uřa d netta iwsar?” ◘ 13 Inna SIDI i Ibrahim: “Maɣar teḍḥec Sara, tenna: ‘Ma zemmareɣ ad arweɣ am wsareɣ řexxu?’ 14 Ma aqa din ca n řḥajjet x SIDI tewɛar? Ad ɣarek dd-ɛeqbeɣ di řweqt i negga, ɣar řweqt n tudart uca ad yiři ɣar Sara mmis!” ◘ 15 Sara tenkar, tenna: “War ḍeḥceɣ ca!”, minzi tuɣa teggʷed. Netta inna as: “Lla, aqa cem tḍeḥced!”

16 Xenni kkaren iryazen nni ssenni, sewḍen ɣar Sadum, uca iruḥ Ibrahim akidsen, issqebbeḍ i-ten. 17 Uca inna SIDI: “Ma ad ffareɣ Necc x Ibrahim min i ɣa ggeɣ? ◘ 18 Ad yiři Ibrahim zeɛma d ijj n řgens imɣar ijhed, aqa ad dayes ttwabarken marra řegnus n ddunect. ◘ 19 Minzi Necc qqneɣ ixef inu akides, ḥima ad isseřmed iḥenjiren nnes uřa d taddart nnes awarni as, maḥend ad ḥḍan abrid n SIDI, ad ggen tasegda d řḥeqq, ḥima SIDI ad dd-yawi i Ibrahim min tuɣa xas inna.” 20 Xenni inna SIDI: “Tɣuyyit n Sadum d Ɛamurra temɣar aṭṭas u ddnub nsen deqřen. 21 Ad dd-hwiɣ, ad ẓareɣ ma ggin nican am tɣuyyit nsen i ɣari dd-yusin niɣ lla, ad ssneɣ.” 22 Xenni dewřen iryazen ssenni uca ṭṭfen abrid ɣar Sadum. Maca Ibrahim tuɣa iqqim ɛad ibedd zzat i wudem n SIDI. 23 Uca iqarreb-dd Ibrahim, inna: “Ma s tidett ad taredǧed ɛawed amsegged ak-d uɛeffan? 24 Aqa dinni balak xemsin n imseggaden daxeř i tendint. Ma s tidett ad ten taredǧed, u war tsemmḥed deg wemcan nni di ṭṭweɛ n xemsin n imseggaden i dayes iǧan? 25 Iggʷej xak ad tegged aya, ad tenɣed amsegged ak-d uɛeffan, wah, iggʷej xak ad yiři umsegged meḥsub am uɛeffan. Aqa řqaḍi n ddunect ma war ittegg s řḥeqq?” ◘ 26 Řexdenni inna as SIDI: “Mařa ufiɣ di Sadum xemsin n imseggaden daxeř i tendint, ad semḥeɣ i wemcan di ṭṭweɛ nsen.” 27 Ibrahim yarra-dd, inna: “Xzar řexxu, bdiɣ zeɛɛmeɣ ad ssiwřeɣ ak-d Sidi inu, waxxa necc d cař d yiɣɣeḍ. 28 Ad taɣ neqṣen zi xemsin n imseggaden xemsa, ma ad taredǧed x xemsa nni marra tandint?” Inna: “War tt ttaredǧeɣ mařa ufiɣ din xemsa u-rebɛin.” 29 Yarni deg wawař akides, inna as: “Ad taɣ ad yiři ad ittwaf din arebɛin!” Yarra-dd Netta: “War tt tteggeɣ ca di ṭṭweɛ n arebɛin nni.” 30 Xas uca inna: “War ttxeyyiq řexxu Sidi inu, xmi ɣa ssiwřeɣ ɛawed. Ad taɣ ad yiři din třatin!” Yarra-dd: “War tt ttaredǧeɣ mařa ufiɣ din třatin.” 31 Inna ɛawed: “Xzar řexxu, bdiɣ zeɛmeɣ ad ssiwřeɣ ak-d Sidi inu. Ad taɣ ad yiři din mɣir ɛicrin!” Yarra-dd: “War tt ttaredǧeɣ ca di ṭṭweɛ n ɛicrin nni.” 32 Xenni inna: “War ttxeyyiq řexxu Sidi inu, xmi ɣa ssiwřeɣ ɛawed. Ad taɣ ad yiři din mɣir ɛecra!” Yarra-dd: “War tt ttaredǧeɣ di ṭṭweɛ n ɛecra nni.” 33 Xenni iruḥ SIDI awarni řami ikemmeř awař nnes ak-d Ibrahim uca Ibrahim idweř-dd ɣar wemcan n tzeddiɣt nnes.