16
Hajar d Ismaɛil
Saray, tamɣart n Abram, war d as dd-tiruw ca. Tuɣa ɣares ict n tayya zi Miṣra qqarent as Hajar. Tenna Saray i Abram: “Aqa teẓrid belli SIDI iṭṭef xafi tarwa. Adef x tayya inu, balak ad zzayes ksiɣ tarwa.” Abram tuɣa issḥessa ɣar Saray. Awarni řami izdeɣ Abram ɛecra n iseggʷusa di temmurt n Kenɛan, tiwi-dd Saray, tamɣart n Abram, tayya nnes Hajar, tenni zi Miṣra, uca tewca as-dd i Abram, aryaz nnes, d tamɣart nnes. Yudef x Hajar uca nettat teksi ddeyset. Umi teẓra belli teksi ddeyset, xenni tedweř lallas tᵉttwasseḥqar di tiṭṭawin nnes. Tenna Saray i Abram: “Zi ssibbet nnec ggin dayi řmunkar. Necc ggiɣ tayya inu deg weḥsin nnec. Umi teẓra belli teksi ddeyset, dewřeɣ d tameḥguret di tiṭṭawin nnes. Ejj ad iḥkem SIDI jar ayi d cek!” Inna Abram i Saray: “Xzar, tayya nnem deg ifassen nnem. Egg zzayes min tᵉttwařid cem mliḥ di tiṭṭawin nnem.” Uca Saray tqemmeɛ i-tt u xenni nettat tarweř zzayes.
Uca lmalak n SIDI iřqa i-tt ɣar tařa n waman di řexřa, ɣar tařa deg webrid ittawyen ɣar Cur. Inna: “Hajar, tayya n Saray, manis dd-tusid u mani ɣa traḥed?” Nettat tenna: “Ttrakkwařeɣ zeg wudem n lalla Saray!” Xenni inna as lmalak n SIDI: “Dweř ɣar lallam, uḍar sadu ifassen nnes.” 10 Inna as ɛawed lmalak n SIDI: “Ad kettareɣ aṭṭas zzariɛet nnem, ař war izemmar ad tᵉttwaḥseb řami i ɣa tiři deg waṭṭas.” 11 Inna as lmalak n SIDI ɛawed: “Aqa řexxu, teksid ddeyset uca ad tarwed aseymi. Ad as tegged Ismaɛil, minzi SIDI isřa am di řemḥayen nnem. 12 Uca netta ad yiři d ijj n bnadem amecnaw asnus n řexřa. Afus nnes ad yiři x marra, u afus n marra ad yiři xas. Ad izdeɣ arendad n marra aytmas.” 13 U nettat třaɣa x Yisem n SIDI i ɣares-dd issiwřen, tenna: “Cek d Arebbi i ittwařan!”, minzi tenna: “Ma war da ẓriɣ wenni d ayi ittwařan?” 14 X uya semman anu nni: anu ‘Laḥay-Ru’i’. Xzar, aqa-t jar Qadac d Barad.    15 Uca turuw-dd Hajar i Abram aseymi. Igga as Abram isem n mmis nni i d as dd-turuw Hajar ‘Ismaɛil’. 16 Abram tuɣa ɣares setta u-tmanyin n iseggʷusa, umi dd-turuw Hajar Ismaɛil i Abram.
 
 
16:2 ɣar Saray - am ikmeř ‘ɣar tmijja n Saray’. 16:7 Cur - isem wanita ixs ad yini ‘řḥiḍ’. Tandint-a tuɣa ɣar weymir jar Kenɛan d Miṣra. 16:11 Ismaɛil - isem-a wanita ixs ad yini ‘Arebbi ad iseř’ niɣ ‘wenni umi i ɣa iseř Arebbi’ niɣ ‘wenni i d as ittesřan Arebbi’. 16:12 Amz. 25:18. 16:14 anu Laḥay-Ru’i - isem-a wanita ixs ad yini ‘anu n wenni iddaren u ixzar dayi’. Barad - isem-a wanita ixs ad yini ‘tebrurri’. 16:14 Amz. 24:62; 25:11. 16:15 Gal. 4:22.