5
Tiřelli di Lmasiḥ
1 Beddem nican di tiřelli tenni umi d aneɣ ifekk Lmasiḥ, uca war ttdekkwiřem ɛawed, maḥend ad teksim azayřu n tesmuɣi.
2 Aqa ayi necc Bulus ad awem iniɣ, mařa tᵉttwaxetnem, Lmasiḥ war kenniw ineffeɛ deg walu.
3 Ɛawed cehhdeɣ i marra bnadem i ɣa ittwaxetnen, aqa netta s umarwas ḥima ad igg marra min iǧan di Ccariɛa.
4 Kenniw inni ittexsen ad ttwaseggdem s Ccariɛa, aqa tdewřen tarxum zi Lmasiḥ, uca zi arḍa i zi dd-tewḍam.
5 Minzi neccin nettraja asitem n tsegda s Arruḥ nni iǧan zi l’iman.
6 Maɣar di Yasuɛ Lmasiḥ, axtan niɣ břa axtan war isekkwi walu, maca mɣir l’iman waha nni ittwakemmřen s tayri.
7 Kenniw tuzzřem mliḥ! Wi kenniw imenɛen ařami war tᵉttᵉṭṭifem ɛad s řaman di tidett?
8 Ṭwaɛ-a nwem war iǧi zeg wenni d awem ittřaɣan.
9 Cwayt n wentun issmemm marra řɛejnet n warecti.
10 Necc ttiqqeɣ daywem di Siditneɣ, aqa war ɣarwen tiři nneyyet nneɣni. U wenni kenniw ittseddaɛen, aqa ad yarbu řḥukm, man wen ma iɛna netta.
11 A aytma, mařa necc ttbarrḥeɣ kenniw ɛad s wextan, mayemmi ɛad i ɣa ttwamarrteɣ? Ma xenni tᵉttwabeṭṭeř taɛenkrift n ṣṣalib?
12 Meɛlik qaɛ ttexseɣ, aqa inni ittexsen ad kenniw qessen, ad ttwaqessen simant nsen.
13 I tiřelli umi dd-tᵉttwařaɣam kenniw, a aytma, maca war ttqeǧbem tiřelli am lfurṣa i weysum, maca sexxarem ijjen i wenneɣni s tayri.
14 Minzi marra Ccariɛa tkemmeř s yijj n wawař, aqa s man aya: “Ad texsed jjar nnec amecnaw ixef nnec.”
15 Maca mařa tzeɛɛfem u tᵉttettem ijjen wenneɣni, xenni ḥḍam ixef nwem war tᵉttᵉttem ca ayawya qaɛ.
Tudart s Arruḥ Iqeddsen
16 Maca necc ad awem iniɣ: Uyurem di Arruḥ, war ttkemmřen ɛemmarṣ nnecwat n weysum.
17 Minzi ddat yarezzu min iǧan ḍidd n Arruḥ, uca Arruḥ yarezzu min iǧan ḍidd n weysum. Nitni s tnayen ttbeddan ak-d wayawya, x uyenni war tzemmarem ad teggem min texsem.
18 Maca mařa Arruḥ indeh i kenniw, war teǧim ɛad sadu Ccariɛa.
19 Řexdayem n weysum banent, aqa atent d zzina d řexmej d farq-ccɣeř
20 d uɛbad i l’aṣnam d tseḥḥart d řeɛdawet d umcebbec d řeḥsed d tefqeḥt d uɣewweɣ d ubeṭṭu d tɣuriwin i dd-itteffɣen zeg webrid,
21 d tusmi d wenɣay d uɣelli d řefsed uřa d timesřayin nneɣnit am tina. Inni ittceɣřen ixef nsen ak-d tmesřayin-a, aqa izwareɣ nniɣ t, u ad t iniɣ ɛawed, aqa nitni war warrten ca Tageldit n AREBBI.
22 Maca řɣiǧet n Arruḥ aqa-tt d tayri d řefraḥet d řehna d řeḍrafet d ttasiɛ n řxaḍar d tcuni d l’iman d temhint uřa d ṣṣbar.
23 Ccariɛa war teǧi ḍidd n tmesřayin-a.
24 Maca inni iǧan zi Lmasiḥ aqa ṣellben aysum nsen ak-d marra ccehwat d nnecwat.
25 Ejj aneɣ ad neddar s Arruḥ u ad nsellem ixef nneɣ i Arruḥ.
26 War d aneɣ ittejji ad nweqqar ijj wenneɣni s nnifaq, am nesseḥqara ijjen wenneɣni u nettasem uřa d ijjen zeg wenneɣni.