2
Bulus d rrusul di Urcalim
1 Awarni řami ɛdun arbeɛṭac n iseggʷusa, ruḥeɣ ɛawed ɣar Urcalim ak-d Bar-Naba uca iwyeɣ akidi ɛawed Titus.
2 Maca tuɣa ruḥeɣ ɛlaḥsab ijj n usargeb n Arebbi u mřeɣ asen Řexbar Aṣebḥan i ttbarrḥeɣ jar řegnus, i yinni ɣar iǧa uweqqar weḥḥedsen, ḥima war ttizzřeɣ niɣ ad azzřeɣ baṭeř.
3 Ɛawed Titus, wenni tuɣa akidi, waxxa netta d Aramiyu, war xas ggen s uɣiř maḥend ad ittwaxten.
4 Maca minzi udfen-dd awmaten issxarriqen ɣarneɣ, ḥima ad cekkmen x tiřelli tenni ɣarneɣ di Yasuɛ Lmasiḥ, ḥima ad ayi ggen d ismeɣ,
5 aqa neccin war d asen nwaḍeɛ uřa d ict n tzeḥziḥt i řeḥṣaret nsen, ḥima tidett n Řexbar Aṣebḥan ad teqqim akidwem.
6 Inni tuɣa ittbanen d ca jar asen - min ma ɛnan war d ayi icqi, minzi AREBBI war ittegg ca s wudmawen - aqa war xafi nnan walu.
7 S řɛeks, maɣar ẓrin, belli ttkellfeɣ x Řexbar Aṣebḥan i yinni břa axtan am mammec ittkellef Buṭrus x Řexbar Aṣebḥan i yinni s wextan,
8 - minzi Wenni iɛarrnen Buṭrus di řxedmet nnes am rrasul jar inni ixetnen, iɛarren ayi ɛawed, ḥima ad ggeɣ řxedmet n rrasul jar řegnus -
9 uca umi Yaɛqub d Kifa d Yuḥanna, inni ittwaḥesben d imɣaren, neɛmen s arḍa i d ayi immewcen, wcin aneɣ afus afusi n tmunt n tawmat i necc d Bar-Naba, ḥima neccin ad niři nᵉttsexxar jar řegnus uca nitni jar inni s wextan.
10 Tuɣa ittxeṣṣa aneɣ ad nfekkar deg imezřaḍ waha, uca xenni cḍareɣ ɛawed maḥend ad ggeɣ man aya.
Bulus ittemɛařa ak-d Buṭrus s bṭayṭay
11 Maca umi dd-yusa Kifa ɣar Antiyuxiya, mmɛařiɣ akides s bṭayṭay, minzi nitni nnqarḍen zzayes.
12 Minzi qbeř ma dd-usin ca zi Yaɛqub, tuɣa ittett ak-d yinni yumnen zi řegnus, maca awarni řami dd-usin nitni, iɛqeb uca issbeɛɛed ixef nnes zzaysen, minzi tuɣa iggʷed zeg inni iǧan zeg wextan.
13 Uřa d Udayen inneɣni ttwajebbden akides ɣar man aya, amenni ɛawed Bar-Naba, aqa nedhen t di nnifaq nsen.
14 Maca umi ẓriɣ belli war gguren ca nican x webrid n tidett n L’Injil, nniɣ i Kifa zzat i marra: “Mařa cek, am teǧid d Uday, teddared am yijj n Aramiyu, war iǧi am Wuday, mayemmi teggid aɣiř x yinni zi řegnus, ḥima ad ddaren am Wudayen?
15 Aqa neccin, inni iǧan d Udayen ɛlaḥṣab ṭṭbiɛet, war neǧi ca d imednab zi řegnus,
16 numen di Yasuɛ Lmasiḥ, minzi nessen belli bnadem war ittwasegged ca s řexdayem n Ccariɛa, maca s l’iman n Yasuɛ Lmasiḥ, ařami uřa d neccin ad nettwasegged s l’iman n Lmasiḥ, war iǧi s řexdayem n Ccariɛa, minzi s řexdayem n Ccariɛa uřa d ijj n bnadem war ittwaseggad ca ɛemmarṣ.
17 Maca mařa neccin, am narezzu ad nettwasegged s Lmasiḥ, nufa belli neccin ɛawed d imednab, ma Yasuɛ Lmasiḥ xenni d amsexxar n ddnub? Wayyaw!
18 Minzi mařa bniɣ ɛawed min hedmeɣ, ad ssecneɣ belli necc s ixef inu d wenni iɛeddun x tewṣiyyet.
19 Minzi s Ccariɛa aqa necc mmuteɣ i Ccariɛa, ḥima ad ddareɣ i AREBBI.
20 Ttwaṣellbeɣ ak-d Lmasiḥ uca zi ssa d tsawent war qqimeɣ ddareɣ ɛad necc, maca Lmasiḥ iddar dayi. Uca min ddareɣ řexxu ɛad di arrimet, ddareɣ s l’iman n Mmis n AREBBI wenni d aneɣ ittexsen u iwca Ixef nnes xaneɣ.
21 War beḍřeɣ ca arḍa n AREBBI, minzi mařa tuɣa tasegda s Ccariɛa, ad yiři immut Lmasiḥ x walu.”