1 Baṣaliyil d Ahuliyab d kuř aryaz s wuř amiɣis i umi iwca SIDI tiɣit d řeɛqeř, maḥend ad ssnen mammec ɣa ggen marra řxedmet i tsexxart n Zzawect Iqeddsen, ggin marra am mammec ten yumur SIDI. 2 Musa iřaɣa-dd i Baṣaliyil d Ahuliyab d kuř aryaz s wuř amiɣis, umi igga SIDI tiɣit deg wuř nnes, uřa marra wenni umi inhezz wuř nnes, maḥend ad dd-yas ɣar řxedmet uca ad tt igg.

3 Nitni ksin zi zzat n wudem n Musa marra tawhibt nni ssgeɛɛden ayt n Israil i řxedmet di ṭṭweɛ ni tsexxart n Zzawect Iqeddsen, maḥend ad ggen řxedmet nni. Uca aqa ɛad ggin ad as dd-awyen kuř ṣṣbeḥ tiwhibin s řxaḍar. 4 Xenni usin-dd marra iryazen imiɣisen, inni tuɣa iceɣřen x marra řxedmet n Zzawect Iqeddsen, ijj ijj dewřen-dd zi řxedmet nni ggin nitni, ◼ 5 uca ssiwřen ak-d Musa, nnan: “Řgens yiwi-dd ktar zi min ittxeṣṣan di ṭṭweɛ n řxedmet nni i d aneɣ yumur SIDI, ḥima ad tt negg.” 6 Xas uca yumur Musa, ḥima ad barrḥen di řmargeḥ n řɛeskar, ad inin: “War ttejji aryaz niɣ tamɣart ɛad ad yegg ca n řxedmet nni i ɣa issgeɛɛed d tawhibt i Zzawect Iqeddsen!” Ammu i issbedd Musa řgens ad yawi ɛad ktar, 7 minzi cfa timesřayin nni d iwyen i marra řxedmet i ɣa ggen, aqa tceṭṭ ɛad ktar.

8 Jar yinni ɣar tuɣa řxedmet, aqa marra imiɣisen n wuř ggin Tazeddiɣt zi ɛecra n tjartiřin n řeqṭen azdad imuden u s ufiřu adeḥmi d urjuwani d uzeggʷaɣ iḥedqen ak-d ikiruben nni xasent igga am yijj n warcam n ufennan. ◼ 9 Tuzzeggart n ict n tjartiřt tuɣa-tt tmenya u-ɛecrin n iɣaǧen u tiru n ict n tjartiřt tuɣa-t arebɛa n iɣaǧen u marra tijartiřin ɣarsent d řeɛbar d ijj. ◘ 10 Issmun xemsa n tjartiřin ict ak-d tenneɣni uca xemsa n tjartiřin issmun i-tent ɛawed ict ak-d tenneɣnit. ◼ 11 Xenni igga tisarawin ideḥmaniyyen di tma n yict n tjartiřt ɣar ṭṭarf ɣar useřqi uca amenni i tent igga ɛawed di tma n tjartiřt nneɣni ɣar ṭṭarf, ɣar mani iǧa useřqi nneɣni. ◘ 12 Igga xemsin n tsarawin x tma n yict n tjartiřt d xemsin n tsarawin ɣar ṭṭarf n tjartiřt nneɣni ɣar useřqi nneɣni. Tisarawin ṭṭfent nican ict di tenneɣnit. ◘ 13 Igga ɛawed xemsin n tsennarin n wureɣ uca issmun tijartiřin ict i tenneɣni s tsennarin uca ammu tedweř Tzeddiɣt d ict. ◘

14 Igga ɛawed tijařtiřin n ccɛar n iɣayḍen, ad iřint d Aqiḍun x Tzeddiɣt. Igga ḥiṭac n tjartiřin. 15 Tuzzeggart n ict n tjartiřt tuɣa-tt třatin n iɣaǧen u tiru n ict n tjartiřt d arebɛa n iɣaǧen. Ḥiṭɛac n tjartiřin ɣarsent řeɛbar d ijj. 16 Netta issmun xemsa n tjartiřin weḥḥedsent u ɛawed setta n tjartiřin weḥḥedsent. 17 Igga xemsin n tsarawin x tma n tjartiřt taneggarut ɣar ṭṭarf n useřqi ak-d tenneɣni uca igga ɛawed xemsin n tsarawin x tma n tjartiřt ɣar ṭṭarf n useřqi nneɣni. 18 Igga ɛawed xemsin n tsennarin n nnḥas, ḥima ad issmun Aqiḍun maḥend ad t yarr d ijjen. ◘

19 Igga ɛawed ict n tseqqaft n iřmawen izeggʷaɣen n icarriyyen i Uqiḍun uca sennej i man aya ict n tseqqaft n iřmawen n ddenfiřat. ◘

20 Igga tifeřwin i Tzeddiɣt s ukeccuḍ n ukasiya nni ibedden nican. ◘ 21 Tuzzeggart n ict n tefřawt tuɣa-tt ɛecra n iɣaǧen u tiru n yict n tefřawt d ijj n uɣiř d wezyen. ◘ 22 Kuř tafřewt ɣares tnayen n iḍaren, inni issmeřqan ict ak-d tenneɣnit am twečmatin Ammu i igga s marra tifeřwin n Tzeddiɣt. ◘ 23 Igga tifeřwin i Tzeddiɣt, ɛicrin n tfeřwin ɣar jjihet n ljanub, ɣar yefus. ◘ 24 Igga ɛawed arebɛin n tyarsawin n nnuqart sadu ɛicrin n tfeřwin, tnayen n tyarsawin sadu ict n tefřawt i tnayen n iḍaren nnes, uřa d tnayen n tyarsawin sadu tafřawt nneɣni i tnayen n iḍaren nnes. ◘ 25 Igga ɛawed ɛicrin n tfeřwin i uɣezdis nneɣni n Tzeddiɣt, ɣar uɣezdis n ccamal, ◘ 26 s arebɛin n tyarsawin nnes n nnuqart: tnayen n tyarsawin sadu ict n tefřawt d tnayen n tyarsawin sadu tafřawt nneɣni. ◘ 27 I iɣezdisen n ḍeffar n Tzeddiɣt, ɣar uɣezdis n řɣarb, igga setta n tfeřwin. ◘ 28 Igga tnayen n tfeřwin d tifeřwin i tɣemmura n Tzeddiɣt ɣar tnayen n iɣezdisen ɣar ḍeffar. ◘ 29 Zi swadday tuɣa řeṣqent am wacniwen uca ammu i tent tuɣa d icten ař dd-awḍent sennej deg ict n texrazt. Ammu i igga s tnayen n tfeřwin i tnayen n tɣemmura. ◘ 30 Ammu i din tuɣa tmenya n tfeřwin s tyarsawin nsent n nnuqart, aqa atent d seṭṭac n tyarsawin, tnayen n tyarsawin sadu kuř tafřewt. ◘ 31 Igga ɛawed tiḥenya n uɛarreḍ zeg ukeccuḍ n ukasiya, xemsa n tfeřwin ɣar ijj n uɣezdis n Tzeddiɣt, ◘ 32 u xemsa n tḥenya n uɛarreḍ i tfeřwin ɣar uɣezdis nneɣni n Tzeddiɣt d xemsa n tḥenya n uɛarreḍ i tfeřwin n Tzeddiɣt ɣar tnayen n tɣemmura n ḍeffar ɣar řɣarb. ◘ 33 Taḥnact n uɛarreḍ di řwesṭ igga i-tt ad teẓwa zi řwesṭ n tfeřwin zeg ixef ař wenneɣni. ◘ 34 Iɣeǧef tifeřwin s wureɣ uca igga tixrazin nsent n wureɣ, maḥend ad daysent ssidfen tiḥenya n uɛarreḍ uca uřa d tiḥenya n uɛarreḍ icellel i-tent s wureɣ. ◘

35 Igga ijj n uřeḥḥaf s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, igga i-t d ijj n warcam n ufennan ak-d ikiruben xas. ◘ 36 Igga as arebɛa n ipilaren n ukeccuḍ n ukasiya uca iɣeǧef i-ten s wureɣ. Tisennarin nsen tuɣa atent n wureɣ. Issefsi i ipilaren arebɛa n tyarsawin nsent n nnuqart. ◘

37 Igga ijj n arwaq i wadaf n Uqiḍun s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, igga i-t d ijj n umudi n uxeyyaḍ, ◘ 38 s xemsa n ipilaren nnes d tsennarin nnes. Iɣeǧef tizeǧifin nsen d iqeḍban nsen i useřqi s wureɣ. Tiyarsawin nsen tuɣa atent n nnḥas. ◘