33
1 Issiweř SIDI ak-d Musa: “Ruḥ, geɛɛed ssa, cek d řgens nni dd-tessuffɣed zi temmurt n Miṣra, ɣar temmurt nni x jjuǧeɣ i Ibrahim d Isḥaq d Yaɛqub, nniɣ: ‘I zzariɛet nnec ad tt wceɣ!’
2 Necc ad ssekkeɣ zzat i uɣembub nnec lmalak, uca ad aẓẓřeɣ x ayt n Kenɛan d Imuriyyen d Iḥittiyyen d Ifiriziyyen d Iḥiwiyyen d Iyibusiyyen
3 deg webrid nwem ɣar ict n temmurt ifeyyḍen s uɣi d tamment. Necc s imant inu war ttgiɛɛideɣ akidwem, ḥima war kenniw tᵉtteḥḥiɣ deg webrid, minzi kenniw d ijj n řgens iqseḥ.”
4 Umi isřa řgens awař-a aɛeffan, ceḍnen uca uřa d ijj igga ɛad řehzuṭ nnes.
5 Aqa inna SIDI i Musa: “Ini i ayt n Israil: ‘Kenniw d ijj n řgens iqseḥ. Mařa geɛɛdeɣ jar awem mɣir ijj n wermac, ad kenniw teḥḥiɣ. Xenni řexxu kksem řehzuṭ nwem, aqa Necc ad ssneɣ min d ac ɣa ggeɣ.’ ”
6 Kksen ayt n Israil řehzuṭ nsen zeg wedrar n Hurib.
7 Iksi Musa Aqiḍun uca iwta Aqiḍun barra i řmargeḥ n řɛeskar, iggʷej aṭṭas x řmargeḥ, uca iřaɣa as ‘Aqiḍun n Umsagar’. Kuř ijj wenni tuɣa yarezzun SIDI, iffeɣ ɣar Uqiḍun n Umsagar, wenni iǧan barra i řmargeḥ.
8 Umi iffeɣ Musa ɣar Uqiḍun, ikkar marra řgens, bedden barra, kuř ijj ɣar wadaf n uqiḍun nnes, uca nitni xzaren ɣares am tiṭṭawin nsen ḍeffaren Musa ařami yudef ɣar Uqiḍun.
9 Umi yudef Musa ɣar Uqiḍun, aqa aqellij n useynu ihwa, ibedd ɣar wadaf n Uqiḍun uca Netta issiweř ak-d Musa.
10 Uca marra řgens iẓra aqellij n useynu ibedd ɣar wadaf n Uqiḍun, xenni ikkar marra řgens uca ibendeq kuř ijj ɣar wadaf n uqiḍun nnes.
11 Issiweř SIDI ak-d Musa aɣembub deg uɣembub, am mammec issiweř bnadem ak-d umeddukkeř nnes. Xenni iɛqeb-dd ɣar řmargeḥ n řɛeskar, maca amsexxar nnes Yacuwa, mmis n Nun, wenni ɛad d aḥudri, ɛemmarṣ war ibeɛɛed x řwesṭ n Uqiḍun.
Aɛuǧi n SIDI
12 Inna Musa i SIDI: “Xzar, Cek tennid ayi: ‘Ndeh řgens-a!’, maca Cek war d ayi tessecned wi kidi i ɣa tessekked. Cek tennid: ‘Necc ssneɣ cek s yisem nnec!’ uřa: ‘Tufid arḍa di tiṭṭawin inu!’
13 Řexxu xenni, mařa ufiɣ arḍa di tiṭṭawin nnec, zawgeɣ Cek ad ayi tessecned abrid nnec, ḥima ad Cek ssneɣ, maḥend ad afeɣ arḍa di tiṭṭawin nnec. Xzar, cceɛb-a d řgens nnec!”
14 Inna: “Lmalak n wudem inu ad yuyur akidek u Necc ad cek ssareyyḥeɣ.”
15 Xenni yarra-dd xas: “Mařa udem nnec war kidneɣ ittriḥ, war ttejji xenni ad ngeɛɛed ssa!
16 Mammec ɣa ssnen belli aqa ufiɣ arḍa di tiṭṭawin nnec, necc d řgens nnec? Ma war iǧi minzi Cek truḥed akidneɣ, aqa neccin, necc d řgens nnec, nfarrez x kuř řgens i iǧan x wudem n temmurt?”
17 Inna SIDI i Musa: “Ɛawed ad ggeɣ awař-a i tennid umi tufid arḍa di tiṭṭawin inu uca ssneɣ cek s yisem nnec.”
18 Xas uca inna Musa: “Zawgeɣ Cek, scen ayi aɛuǧi nnec!”
19 Inna: “Necc ad sseɛduɣ marra tcuni inu zzatek uca ad ɛeyydeɣ Isem n SIDI zzat i uɣembub nnec uca ad ḥinneɣ x wi ɣa ḥinneɣ, ad areḥmeɣ x wi ɣa areḥmeɣ.”
20 Inna ɛawed: “Cek war tzemmared ad tẓared udem inu, minzi war d ayi iẓarr bnadem uca ad iqqim iddar.”
21 Xas uca inna SIDI: “Xzar, zzat inu amcan mani ɣa tbedded x teṣḍart.
22 Xmi ɣa iɛdu uɛuǧi inu, ad cek ggeɣ deg ijj n ufeǧiq n teṣḍart uca ad cek dřeɣ s třeqqa n ufus inu ař dd-ẓwiɣ.
23 U xmi ɣa kkseɣ afus inu, xenni ad ayi tẓared zi ḍeffar, maca war tẓarred udem inu!”