30
1 “Ad tegged ɛawed aɛalṭar n řebxur. Ad t tegged zeg ukeccuḍ n tcejjart n ukasiya.
2 Tuzzeggart ad tiři d ijjen uɣiř, u tiru ɛawed d ijjen uɣiř. Ad yiři uɛalṭar s arebɛa n tɣemmura. Řuɛřa nnes ad yiři d tnayen n iɣaǧen u accawen nnes ad iřin d ijjen akides.
3 Ad t tɣeǧfed s wureɣ iṣfan, udem nnes n sennej d iɣezdisen nnes i d as dd-innḍen d waccawen nnes. Ad as tegged ijj n zzwaq n wureɣ i d as dd-innḍen.
4 Ad as tegged tnayen n texrazin n wureɣ sadu zzwaq nnes. Ad tent tegged ɣar tnayen n iɣezdisen nnes, ɣar tnayen n tɣemmar nnes. Ad iřint i iɛumad, ḥima ad zzaysen arbun aɛalṭar n řebxur.
5 Ad tegged tnayen n iɛumad i tarebbut zeg ukeccuḍ n ukasiya uca ad ten tɣeǧfed s wureɣ.
6 Ad t tessarsed zzat i uřeḥḥaf i iǧan zzat i Ttabut n Cchadet, zzat i tqebbart n weṣřaḥ tenni iǧan x Cchadet, mani kik i ɣa mmsagareɣ.
7 Ad issbexxar Harun řebxur ittfuḥen kuř ṣṣbeḥ. Awarni řami iɛdeř tiftiřin, ad issbexxar.
8 Meřmi i ɣa issireɣ Harun tiftiřin jar beddu n wezyen n wass ař dd-tewḍa tmeddit, ad yejj řebxur ad ibexxar. Ad yiři d ijj n řebxur i řebda zzat i wudem n SIDI i marra jjiřat nwem.
9 Kenniw war xas tessgeɛɛdem ca řebxur d aɣrib, niɣ taɣarṣt n wecmaḍ niɣ tawhibt n řɣiǧet u war xas ttzeǧaɛem tawhibt n useyyeb.
10 Harun ad igg aṣřaḥ x waccawen nnes ict n twařa deg useggʷas s idammen n tɣarṣa n ddenb i weṣřaḥ. Ad t isseṣřeḥ ict n twařa deg useggʷas i marra jjiřat nwem. Aqa-t d amqeddas qaɛ i SIDI.”
11 Issiweř SIDI ak-d Musa, inna:
12 “Xmi ɣa teksid řqedd n ayt n Israil, řqedd n yinni ittwaḥesben, xenni nitni ad wcen, kuř ijj i yixef nnes, ttaman n weṣřaḥ i SIDI ɣar useddi nsen, ḥima war tᵉttiři jjriḥect jar asen x minni ten ɣa tḥesbed.
13 D man aya i ɣa wcen nitni, kuř ijj zeg inni ɣa iẓwan ɣar yinni ittwaḥesben: azyen ciqlu ɛlaḥsab ciqlu n Zzawect Iqeddsen - ciqlu-ya d ɛicrin jira - azyen ciqlu-ya ad yiři d tawhibt n usgeɛɛed i SIDI.
14 Kuř ijj zeg inni ɣa iẓwan ɣar yinni ittwaḥesben, zi ɛicrin iseggʷusa sennej, ad issgeɛɛed tawhibt i SIDI.
15 Bu-wagřa war ittic ktar u amezřuḍ war issenqis zeg wezyen ciqlu, xmi ɣa tessgeɛɛdem tawhibt n SIDI i weṣřaḥ n řeɛmur nwem.
16 Ad teksid nnuqart i weṣřaḥ n ayt n Israil uca ad tt tfarzed i tsexxart n Uqiḍun n Umsagar. Ad tiři d řidaret i ayt n Israil zzat i wudem n SIDI i weṣřaḥ n řeɛmur nwem.”
17 Issiweř SIDi ak-d Musa, inna:
18 “Ad tegged ɛawed tbanyut n nnḥas i usird, ak-d uḍar n nnuqart nnes i x tt ɣa ssarsen, maḥend ad ssirden ixef nsen. Ad tt tessarsed jar Uqiḍun n Umsagar d uɛalṭar uca ad dayes tegged aman,
19 maḥend Harun d warraw nnes ad zzayes ssirden ifassen nsen d iḍaren nsen.
20 Xmi ɣa yadfen ɣar Uqiḍun n Umsagar ad ssirden s waman ḥima war ttmettin ca, uřa xmi dd ɣa qarrben ɣar uɛalṭar, maḥend ad sexxaren xmi ɣa ssbexxaren tawhibt n tmessi i SIDI.
21 Xenni ad ssirden ifassen nsen d iḍaren nsen ḥima war ttmettin ca. Man aya ad asen yiři d ict n tewṣeyyet i řebda, i netta u i zzariɛet nnes, i marra jjiřat nsen.”
22 Issiweř SIDI ak-d Musa, inna:
23 “Cek, ksi řexxu ɣarek řeɛṭur icnan aṭṭas: xems-mya ciqlu n mirru yuzzřen ak-d řqedd n wezyen n manawenni, aqa-t d mitayen u-xemsin ciqlu zi řqarfa ittfuḥen u mitayen u-xemsin ciqlu zeg uɣanim uḥemmum ittfuḥen,
24 xemsa-mya ciqlu n qassiya iwezznen ɛlaḥsab ciqlu n Zzawect Iqeddsen, d ijj n uhinu n zzect n zzitun.
25 Egg zzaysen ict n zzect tamqeddast i wedhan, ijj n řeɛṭur ixeǧḍen ɛlaḥsab ṣṣenɛet n uɛeṭṭar. Aya ad yiři d ict n zzect tamqeddest i wedhan.
26 S man aya ad tdehned Aqiḍun n Umsagar, Ttabut n Cchadet,
27 tazewḍa ak-d marra řeqcuɛ nnes d řqendiř ak-d marra řeqcuɛ nnes d uɛalṭar n řebxur,
28 d uɛalṭar n wecmaḍ ak-d marra řeqcuɛ nnes d tbanyut ak-d uḍar nnes.
29 Ad tessqeddsed marra aya, ḥima ad yiři d amqeddas qaɛ. Marra wi ɣa iḥadan zi man aya, ad ittwaqeddes.
30 Ad tdehned Harun d warraw nnes uca ad ten tessqeddsed, ḥima ad ayi iřin d ikehhanen.
31 Ad tessiwřed ak-d ayt n Israil uca ad tinid: ‘Ta ad tiři d ict n zzect tamqeddast i wedhan i Necc di marra jjiřat nwem.
32 War iɛeddeř ad tt farrɣen x arrimet n bnadem, u mammec teǧa war zzayes tteggem učmas. Tamqeddast i teǧa uca ad tiři d tamqeddast i kenniw.
33 Wenni i ɣa isswejden s řebzar ict n zzect n wedhan am tanita uca ad zzayes tmesḥed x yijj n ubarrani, ad ittwaqess zi řgens nnes.’ ”
34 Inna SIDI i Musa:
“Ksi i yixef nnec řebzar ittfuḥen: tuddimin n userɣaɣ d weqcur n tcejjart n řqarfa d ɣalba, řebzar ittfuḥen d jjawi iṣfan. Ad yiři řqedd nnes am řqedd n wenneɣni.
35 Egg zzayes ijj n řeɛṭur, ijj n uxeǧeḍ am tenni igga uɛeṭṭar: ittwameǧed, iṣfa, iqeddes.
36 Ḥri-dd zzayes taneɣda tazdadt uca sars ca zzayes zzat i Cchadet deg Uqiḍun n Umsagar mani akidek ɣa msagareɣ. Ad awem tiři d tamqeddast qaɛ.
37 Řeɛtur nni i ɣa tegged, war t tteggem s uxeǧeḍ d ijjen akides i yixef nwem. Ad yiři d amqeddas i cek, ad yiři i SIDI.
38 Wenni i iggin ca am wanita uca ad t icemm, ad ittwaqess zi řgens nnes.”