25
Tiweṣṣa zi jjihet n řebni n Tzeddiɣt n Sidi Arebbi
1 Issiweř SIDI ak-d Musa, inna:
2 “Ini i ayt n Israil ad ayi dd-ssgaɛɛden tawhibt. Zi kuř aryaz nni d as iɛarren wuř nnes, ad zzayes teksim tawhibt n usgaɛɛed i Necc.
3 Ta d tawhibt n usgeɛɛed, tenni i ɣa teksid zzaysen: ureɣ d nnuqart d nnḥas,
4 d ufiřu adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen,
5 d iřmawen izeggʷaɣen n icarriyyen, d iřmawen n ddenfiřat, d ukeccuḍ n tcejjart n ukasiya,
6 zzect i tfawt n řqendiř, řeɛṭur i zzect n wedhan u i řebxur ittfuḥen,
7 iẓra n uniks d iẓra iɣřan nneɣni, maḥend ad ten ggen x upalṭu u x tajmect.
8 Ad ayi ggen ict n Zzawect Iqeddsen, ḥima ad zedɣeɣ di řwesṭ nsen.
9 Ad t tegged am marra min d ac ɣa ssecneɣ, ɛlaḥsab amedya n Tzeddiɣt u ɛlaḥsab amedya n marra řeqcuɛ i dayes iǧan.
10 Ad ggen ɛawed ict n Ttabut n ukeccuḍ n tcejjart n ukasiya. Ad tiři tuzzeggart nnes tnayen n iɣaǧen d wezyen u tiru nnes ijj n uɣiř d wezyen u řuɛřa nnes ijj n uɣiř d wezyen.
11 Ad t ttcelled s wureɣ iṣfan, zi daxeř u zi barra ad tt tcelled, uca ɣar sennej ad as tennḍed ijj n zzwaq n wureɣ.
12 Ad as tessfesyed arebɛa n texrazin n wureɣ. Ad tent tcedded ɣar arebɛa n tyarsawin nnes. Tnayen n texrazin ad iřint ɣar yijj n uɣezdis u tnayen n texrazin i uɣezdis nneɣni.
13 Ad tegged iɛumad i trebbut zeg ukeccuḍ n tcejjart n ukasiya uca ad ten tedřed s wureɣ.
14 Sidfem iɛumad di texrazin nni iǧan ɣar iɣezdisen n Ttabut, ḥima ad zzaysen arbun Ttabut.
15 Iɛumad ad iřin di texrazin n Ttabut, war zzaysent ten ttekksen ca.
16 Ad tessarsed Cchadet, tenni i d ac ɣa wceɣ, di Ttabut.
17 Ad tegged ɛawed ict n tqebbart n weṣřaḥ n wureɣ iṣfan s yict n tuzzeggart n tnayen n iɣaǧen d wezyen u s ict n tiru n ijj n uɣiř d wezyen.
18 Ad tegged ɛawed tnayen n ikiruben n wureɣ iɛdeř s wefḍis, ařami i ɣa ffɣen ikiruben zi tnayen n ixfawen n tqebbart n weṣřaḥ.
19 Ad tegged ijj n ukirub ɣar ijj n yixef u ijj n ukirub nneɣni ɣar yixef nneɣni. Ad teggem ikiruben zi tqebbart n weṣřaḥ ɣar tnayen n ixfawen nnes.
20 Ad bezzɛen ikiruben afriwen nsen sennej nsen uca ad dřen taqebbart n weṣřaḥ s wafriwen nsen. Udmawen nsen ad iřin ijj qibač i wenneɣni uca ad ẓaren udmawen n ikiruben ɣar tqebbart n weṣřaḥ.
21 Ad tegged taqebbart n weṣřaḥ x Ttabut uca ad tessarsed Cchadet i d ac ɣa wceɣ di Ttabut.
22 Dinni i kic ɣa mmeřqiɣ uca ad kik ssiwřeɣ zi sennej i tqebbart n weṣřaḥ, zi jar tnayen n ikiruben nni iǧan sennej i Ttabut n Cchadet, x marra min d ac ɣa umureɣ i ayt n Israil.
23 Ad tegged ict n tzewḍa n ukeccuḍ n tcejjart n ukasiya, ad ɣares tiři ict n tuzzeggart n tnayen n iɣaǧen d ict n tiru n ijjen uɣiř d ijj n řuɛřa n ijjen uɣiř d wezyen.
24 Ad tt tedřed s wureɣ iṣfan uca ad as tegged ɣar tma nnes ijj zzwaq n wureɣ.
25 Ad tegged ict n tma i d as dd-innḍen n ijj n cbar n ufus u ɣar tma i d as dd-innḍen ad tegged ijj n zzwaq n wureɣ.
26 Ad tegged arebɛa n texrazin n wureɣ uca ad tent tcedded ɣar arebɛa n tɣemmura nni iǧan ɣar arebɛa n iḍaren nsen.
27 Tixrazin ad iřint udsent i tma, maḥend ad daysent ttwaṭṭfen iɛumad i tarebbut n tzewḍa.
28 Ad tegged iɛumad i tarebbut zeg ukeccuḍ n tcejjart n ukasiya, ad ten tɣeǧfed s wureɣ uca ad zzaysen arbun tazewḍa.
29 Ad tegged ɛawed ṭṭbaṣi nnes d tɣenjayin nnes d iɣarrafen nnes d řkisan nnes i zi ɣa farrɣen. Ad ten tegged s wureɣ iṣfan.
30 X tzewḍa ad tegged aɣrum n wescan řebda zzat i wudem inu.
31 Ad tegged řqendiř s wureɣ iṣfan. Ad tegged řqendiř s wefḍis n wemziř. Afud ak-d uḍar nnes d iɣaǧen nnes uřa d řkisan nnes d tɛebbuzin nnes i dd-ittasen ak-d nnuwwarat nnes ad iřin d aɣezdis d ijj.
32 Setta n iɣaǧen ad dd-ffɣen zeg iɣezdisen nnes, třata n iɣaǧen zeg ijj n uɣezdis n řqendiř d třata n iɣaǧen zeg uɣezdis nneɣni n řqendiř.
33 Třata n řkisan ad iřin deg ijj n uɣiř di furma n nnuwwarat n ǧewz ak-d tɛebbuzt d nnewwac, uca ɛawed ɣar uɣiř nneɣni třata n řkisan di furma n nnuwwarat n ǧewz ak-d tɛebbuzt d nnewwac. Ammu i ɣa ggen marra setta n iɣaǧen nni dd-iffɣen zi řqendiř.
34 Ɣar řqendiř simant nnes ad din iřin arebɛa n řkisan di furma n nnuwwarat n ǧewz, ak-d tɛebbuzin nsen i dd-ittasen ak-d nnuwwarat nsen.
35 Ad din tiři ict n tɛebbuzt sadu tyuya n iɣaǧen i zzayes dd-iffɣen u ict n tɛebbuzt sadu tyuya n iɣaǧen i zzayes dd-iffɣen awarni as, u ɛawed ict n tɛebbuzt sadu tyuya n iɣaǧen i zzayes dd-iffɣen awarni as. Ammu i ɣa yiři i setta n iɣaǧen i dd-iffɣen zi řqendiř.
36 Tiɛebbuzin nsen d iɣaǧen nsen ad zzayes-dd ffɣen uca marra aya ad yiři d ict n řqecɛet tᵉttwaɛdeř s wefḍis n wemziř s wureɣ iṣfan.
37 Ad tegged setta n řefnarat nnes uca ad ssarsen řefnarat nnes x řqendiř, maḥend ad wcent tfawt ɣar ṭṭarf n ujemmaḍ.
38 Tijeqqaḍin n teftič nnes d tmejmarin nnes ad iřint s wureɣ iṣfan.
39 Ad ittwagg řqendiř zeg ict n talint n wureɣ iṣfan s marra řeqcuɛ-a akides.
40 Uca xzar, ad t tegged am umedya nnes, wenni i d ac ittwamřen deg wedrar.” *