17
Massa d Mariba
1 Uca fesyen marra tamesmunt n ayt n Israil iqiḍan nsen, uyuren zi řexřa n Sin, am mammec d asen yumur SIDI uca wtin iqiḍan nsen di Rafidim. War din tuɣi aman, ḥima ad issu řgens.
2 Xenni imcubbec řgens ak-d Musa, nitni nnan: “Ewc aneɣ aman, ḥima ad nsu!” Musa inna asen: “Mayemmi tᵉttexsem ad kidi temcubbucem? Mayemmi tᵉttqeǧabem SIDI?”
3 Tuɣa řgens iffud aṭṭas ɣar waman uca nndeqmen zi Musa, nnan: “Maɣar d aneɣ tessgeɛɛded zi Miṣra? Ma ḥima ad ayi thellked s ufadi uřa d tarwa inu d řebhayem inu?”
4 Řexdenni isɣuy Musa ɣar SIDI, inna: “Min ɣa ggeɣ ak-d řgens-a? Mɣir cwayt uca ad ayi arejmen.”
5 Inna SIDI i Musa: “Ekk zzat i řgens uca ksi akidek ca zeg imɣaren n Israil uca ksi ɛawed deg ufus nnec taɣɣarct nni zi tewtid iɣzar uca ruḥ.
6 Xzar, Necc ad beddeɣ din zzatek x teṣḍart ɣar Ḥurib, ad tewted taṣḍart, ad zzayes dd-ffɣen waman uca ad issu řgens.” Igga Musa amenni zzat i tiṭṭawin n imɣaren n Israil.
7 Uca iřaɣa isem n wemcan nni Massa d Mariba, minzi ayt n Israil mmcubbcen din u minzi nitni qeǧben SIDI, nnan: “Ma SIDI aqa-t řexxu di řwesṭ nneɣ niɣ lla?”
Amenɣi ak-d Amalik
8 Xenni yusa-dd Ɛamaliq uca immneɣ ak-d Israil di Rafidim.
9 Inna Musa i Yacuwa: “Ejj aneɣ ad nixḍar iryazen uca ad neffeɣ, maḥend ad nemmneɣ ak-d Ɛamaliq. Tiwecca ad beddeɣ sennej x tqiccat n tewrirt uca taɣɣarct n AREBBI ad tiři deg ufus inu.”
10 Igga Yacuwa am mammec d as inna Musa, immneɣ ak-d Ɛamaliq, maca Musa d Harun d Ḥur uřyen ɣar tqiccat n tewrirt.
11 Uca imsar řami issgeɛɛed Musa afus nnes, řexdenni tuɣa Israil tɣeǧeb, maca xmi ittejja afus nnes ad ihwa, řexdenni ɣeǧben ayt n Ɛamaliq.
12 Ifassen n Musa dewřen ddeqřen. Xenni ksin ijj n weẓru uca ggin t sadu Musa uca iqqim xas uca Harun d Ḥur sennden ifassen nnes, ijj zeg uɣezdis-a, wenneɣni zeg uɣezdis nneɣni. Ammu i iqqimen ifassen nnes geɛɛden ařami teɣři tfuct.
13 Uca iɣřeb Yacuwa x Ɛamaliq d řgens nnes s řeqḍeɛ n ssif.
14 Xenni inna SIDI i Musa: “Ari aya deg ijj n wedlis ittwannḍen i řidaret dayes uca egg i-t deg imejjan n Yacuwa, belli aqa Necc ad mḥiɣ qaɛ řidaret di Ɛamaliq sadu ujenna.”
15 Ibna Musa ijj n uɛalṭar uca iřaɣa as s yisem: “SIDI d taɛeǧant inu!”
16 Uca inna: “Afus tuɣa x řɛarc n SIDi. SIDI ad yegg garra x Ɛamaliq zi jjiř ař jjiř.”