1 Xenni inna SIDI i Musa: “Adef ɣar firɛun, minzi Necc ssqesḥeɣ uř nnes d wuř n imsexxaren nnes, ḥima ad ssecneɣ řeɛřamat inu di řwesṭ n temmurt nnes, ◘ 2 u ḥima ad tɛawded deg imezzuɣen n mmic d mmis n mmic min ggiɣ ak-d Miṣra, u ad tɛawded x řeɛřamat i ggiɣ jar asen, maḥend ad tessnem belli Necc d SIDI.” 3 Řexdenni yudef Musa d Harun ɣar firɛun, nnan as: “SIDI, AREBBI n Iɛibraniyyen inna: ‘Mecḥař ɣa tekked tugid ad tehwid ɣar wudem inu? Ejj ad iraḥ řgens inu ḥima ad ayi iɛbed. 4 Minzi mařa tugid ad tejjed ad iraḥ řgens inu, aqa ad ssiwḍeɣ tiwecca tmurɣi x temmurt nnec. 5 Ad dřen udem n temmurt ař war izemmar ḥed ad itwařa tammurt ɛad uca ad ccen min iqqimen i ittwanejmen, min d awem iqqimen ɛad awarni i tebrurri. Ad tecc tmuɣri ɛawed marra ticejjura i d awem dd-iɣemmyen deg iyyar. 6 Uca ad ccurent tudrin nnec d tudrin n imsexxaren nnec d tudrin n marra Imiṣriyyen. Ammu war tt ẓrin ɛemmarṣ ibabaten nnec d řejdud n ibabaten nnec zeg wami ten tuɣa x temmurt ɣar wass-a.’ ” Uca idweř-dd netta, ismeḥ di firɛun. 7 Nnan as imsexxaren n firɛun: “Ař meřmi i d aneɣ ɣa yiři wanita d řfex? Ejj ad raḥen iryazen nni, maḥend ad ɛebden SIDI AREBBI nsen! Ma war tessined ɛad belli Miṣra aqa tᵉttwaxarreb?” 8 Řexdenni ssiwḍen imsexxaren n firɛun Musa d Harun ɛawed ɣar firɛun. Netta inna asen: “Ruḥem, ɛebdem SIDI, AREBBI nwem! Ini ayi, min ɛnan inni ixsen ad raḥen?” 9 Inna Musa: “Ad nraḥ ak-d iḥramen nneɣ d iwessura nneɣ, s iḥenjiren nneɣ d tḥenjirin nneɣ, s wuǧi nneɣ d ifunasen d tfunasin nneɣ, minzi ɣarneɣ ijj n Řɛid i SIDI.” 10 Xenni yarra-dd xasen: “Xenni ittxeṣṣa ad yiři SIDI aṭṭaṣ akidwem mařa ad jjeɣ ad traḥem kenniw d iḥenjiren imeẓyanen nwem. Xzarem, aqa kenniw tenwim řɣar! 11 War ittiři amenni. Jjem ad ɛebden iryazen ijehden i SIDI, minzi d man aya i tᵉttexsem.” Uca uẓẓřen xasen zi qibač n wudem n firɛun.

12 Xenni inna SIDI i Musa: “Swiẓẓeḍ afus nnec x temmurt n Miṣra, ḥima tamurɣi ad tgeɛɛed x temmurt n Miṣra, maḥend ad tecc marra afsu aziza n temmurt, marra min iceṭṭen x tebrurri.”

13 Isswiẓẓeḍ Musa ɣar teɣɣarct nnes x temmurt n Miṣra uca igga SIDI ad dd-isuḍ ijj n usemmiḍ i dd-yusin zi ccarq x temmurt war iqeṭṭin marra ass nni d marra ǧiřet nni. Ɣar ṣṣbeḥ yiwi-dd usemmiḍ tamurɣi. ◘ 14 Tgeɛɛed-dd tmurɣi x marra tammurt n Miṣra, tṣeyyeḥ x marra jjwayeh n Miṣra. Aqa tuɣa řḥař yewɛar aṭṭas. Tamurɣi am tanita war tt tuɣi qbeř uca war tᵉttiři ɛemmarṣ zi ssa ɣar zzat. 15 Aqa dřint udem n marra tammurt ařami tessutem temmurt. Nitenti ccint marra afsu n temmurt d marra řɣiǧet n tcejjura i tuɣa iqqimen zi tebrurri. Di marra tammurt n Miṣra war iqqim walu zi marra tuzzizewt di tcejjura niɣ deg wefsu n iyyar. 16 Řexdenni iřaɣa firɛun deɣya i Musa d Harun, inna: “Aqa xḍiɣ ak-d SIDI, AREBBI nwem, uřa akidwem. 17 Ttzawgeɣ řexxu ad ayi tsamḥem x uxeṭṭu inu twařa-ya. Ẓaǧem s řaǧaɣ i SIDI, AREBBI nwem, ḥima ad xafi ikkes řmewt-a waha.” 18 Uca iffeɣ x firɛun uca iẓẓuǧ s řaǧaɣ ɣar SIDI. 19 Xenni ijja SIDI ad dd-iɛqeb usemmiḍ i dd-yusin zi ccarq ɣar řɣarb, issjehd i-t aṭṭas, uca ikkes usemmiḍ tamurɣi, inḍar i-tt di Řebḥar n Telga. War teqqim uřa d ict n tmurɣi di marra jjwayeh n Miṣra. ◼ 20 Maca isseqseḥ SIDI uř n firɛun umi war ijji ayt n Israil ad raḥen.

21 Xenni inna SIDI i Musa: “Swiẓẓeḍ afus nnec ɣar ujenna, xenni ad tiři taǧest x temmurt n Miṣra ař ɣa tafed tzemmared ad tḥadid taǧest.” 22 Isswiẓẓeḍ Musa afus nnes ɣar ujenna uca tehwa-dd taǧest tejhed x marra tammurt n Miṣra, třata n wussan. ◼  ◘ 23 Uřa d ijj war itwiři wenneɣni. Uřa d ijj war ikkar zeg wemcan nnes třata n wussan. Maca marra ayt n Israil tuɣa ɣarsen tafawt deg imucan mani tuɣa zeddɣen. 24 Řexdenni iřaɣa firɛun i Musa, inna: “Ruḥem, tɛebdem SIDI! Jjem waha ad iqqim wuǧi nwem d ifunasen d tfunasin nwem. Maca tzemmarem ad dd-tawyem iḥenjiren imeẓyanen akidwem.” 25 Yarra-dd xas Musa: “Ittxeṣṣa cek ɛawed ad aneɣ tewced deg ufus tiɣarṣa uřa d tiɣarṣa n wecmaḍ. Ad tent nessewjed d tɣarṣṭ i SIDI, AREBBI nneɣ. 26 Uřa d řebhayem nneɣ ittxeṣṣa ad kidneɣ raḥent, war ittɣimi uřa d ijj n ucekrud, minzi zzaysent i ɣa neksi, ḥima ad neɛbed SIDI, AREBBI nneɣ, minzi war nessin s minzi ɣa neɛbed SIDI, AREBBI nneɣ, ař din ɣa naweḍ.” 27 Maca SIDI isseqseḥ uř n firɛun uca yugi ad ten yejj ad raḥen. 28 Inna as firɛun: “Aggʷej xafi! Ḥḍa, ḥima war tẓarred ɛad udem inu, minzi ass i di ɣa tẓared udem inu, ad temmted!” 29 Inna Musa: “Ad yiři am mammec i tennid: war ẓarreɣ ɛad udem nnec!” ◘