3
Tameɛmuč n Haman ḍidd i Wudayen
1 Awarni man aya ikkar ujeǧid Aḥacwiruc, igga ccan d ameqqran di Haman, mmis n Hammadata, Ajaji, uca issgeɛɛed i-t uca yarra řkursi nnes sennej i marra řḥukkam nni ɣares iǧan.
2 Marra imsexxaren n ujeǧid nni tuɣa ɣar tewwart n ujeǧid, uḍaren, qewsen zzat i Haman, minzi ammu i t yumur ujeǧid. Maca Murdaxay war iwḍi x ifadden nnes u war ibendiq.
3 Nnan imsexxaren n ujeǧid i iǧan di tewwart n ujeǧid i Murdaxay: “Mayemmi tɛeddid x řumur n ujeǧid?”
4 Umi xas nnan aya zeg wass ɣar wass u netta war d asen isři ca, imsar aqa nitni xebbaren aya i Haman ḥima ad ẓaren ma ad qqimen bedden awařen n Murdaxay i zi iwwet x yixef nnes, minzi issargeb i-ten belli aqa netta d Uday.
5 Řami iẓra Haman belli Murdaxay war yiwḍi x ifadden nnes u war d as ibendiq, isɛar Haman s waṭṭas.
6 Maca ittɣiř as aya d aseḥqar maḥend ad isswiẓẓeḍ afus nnes ɣar Murdaxay waha, minzi ssiwřen akides x řgens n Murdaxay. S uya yarezzu Haman ad ihellek marra Udayen nni iǧan di marra tageldit n Aḥacwiruc, řgens n Murdaxay.
7 Deg uyur amezwaru, wenni d ayur n Nisan, deg useggʷas wiss tenɛac n ujeǧid Aḥacwiruc, ggin nitni ‘Pur’, ixs. ad yini ‘taqedduḥt’, zzat i wudem n Haman, i kuř ass u i kuř ayur, ař dd-iwḍa tqedduḥt x uyur wiss tenɛac, wenni d ayur n Adar.
8 Minzi inna Haman i ujeǧid Aḥacwiruc: “Aqa din ijj n řgens imṭarrec u ittwabḍa jar řegnus di marra lɛamalat n tgeldit nnec. Izerfan nsen farrqen x marra řegnus u nitni war ṭṭifen ca deg izerfan n ujeǧid. S uyenni war d as iɛeddeř i ujeǧid ad ten yejj ammu.
9 Mařa tusa as-dd i ujeǧid s řxaḍar, xenni ad arin ijj n řumur, ḥima ad ten areddǧen, xenni necc ad ggeɣ ad sswezneɣ ijj n řqedd n ɛecra-ařaf talint n nnuqart, ad ggeɣ aya deg ifassen n yinni i ɣa iḥḍan řxedmet, maḥend ad t ssidfen deg ixxamen n txubay n ujeǧid.”
10 Ikkes ujeǧid taxadent n ucemmiɛ i zi yareccem zeg uḍaḍ n ufus nnes uca iwca i-tt i Haman, mmis n Hammadata, Ajaji, řeɛdu n Wudayen.
11 Inna ujeǧid i Haman: “Nnuqart jjiɣ ac tt, uřa d řgens, ḥima ad zzayes tegged min twarid d lemliḥ di tiṭṭawin nnec.”
12 Deg uyur amezwaru, deg wass nnes wiss třeṭṭac, mřaɣan imariren n ujeǧid, uran marra ɛlaḥsab řumur n Haman i ijeǧiden i iǧan sadu ujeǧid u i lwulat nni iǧan x kuř lɛamala u i řḥukkam n kuř řgens. Nitni uran i kuř lɛamala s tira nnes u i kuř řgens s iřes nnes. Tuɣa tabrat tura s yisem n ujeǧid, u tᵉttwacemmeɛ s txadent n ucemmiɛ n ujeǧid.
13 Ssekken tibratin ak-d ireqqasen n tazřa ɣar marra lɛamalat n ujeǧid, ḥima ad teḥḥan, ad nɣen u ad hellken marra Udayen, am umeẓyan am umeqqran, iḥenjiren imeẓyanen d temɣarin, deg wass d ijjen, deg wass wiss třeṭṭac n uyur wiss tenɛac, wenni d ayur n Adar, u xenni ad keccḍen marra min ɣarsen d takeccaḍt.
14 Tuɣa ittxeṣṣa ad ssuffɣen min iǧan di tira am yijj n uzerf, zeg ict n lɛamala ař tenneɣni s bṭayṭay i marra řegnus, ḥima ad iřin ḥezzmen i uya deg wass nni.
15 Ffɣen ireqqasen n tazřa, ttwacejjɛen s uzeyyar s wawař n ujeǧid, uca ittwassuffeɣ uzerf ɛawed di lqelɛa n Cucan. Tuɣa ajeǧid d Hamam qqimen sessen, maca tandint n Cucan tuɣa-tt tehweř.