5
Řebni n Zzawect Tameqqrant deg wussan n Dariyus
1 Xenni nebban inabiyyen, inabiyyen Ḥaggay d Zakariyya, mmis n Ɛidu, i Wudayen nni iǧan di Yahuda d Urcalim. Nabben ɣarsen s Yisem n Arebbi n Israil nni xasen ittwařaɣa.
2 Xas uca ikkar Zarubbabil, mmis n Caɛaltiyil, d Yahucaɛ, mmis n Yuṣadaq, uca nitni bdan ad bnan Taddart n Arebbi di Urcalim ɛawed, uca inabiyyen n Arebbi, inni akidsen ibedden, tuɣa aten din akidsen.
3 Di řweqt nni yusa-dd Tatnay, lwali n weqlim x ujemmaḍ n iɣzar n Lfuraṭ, ak-d Catar-Buznay u ɣarsen iqrinen nsen di řxedmet. Nitni nnan asen ammu: “Man wen i kenniw yumuren, maḥend ad tebnam Taddart-a u maḥend ad tkemmřem řḥiḍ-a?”
4 Xenni nenna asen ismawen n yeryazen i tuɣa ibennan řebni-ya.
5 Maca tiṭṭ n Arebbi nsen tuɣa-tt x imɣaren n Wudayen uca nitni ggin war ten ssbeddan zi řxedmet ař ɣa taweḍ tmesřact ɣar Dariyus uca awarni aya ad ṭṭfen tabrat x man aya.
6 Tiřemt n tebrat nni issekk Tatnay, lwali n temmurt x ujemmaḍ n iɣzar n Lfuraṭ, ak-d Catar-Buznay d iqrinen nnes di řxedmet, iqrinen nni iǧan x ujemmaḍ n iɣzar n Lfuraṭ, ɣar ujeǧid Dariyus.
7 Nitni ssekken as-dd ict n tebrat tura dayes ammu:
“Ad yiři i ujeǧid Dariyus řehna zi marra iɣezdisen!”
8 “Ittxeṣsa ad issen ujeǧid, aqa neccin nuyur ɣar lɛamala n Yahuda, ɣar Taddart n Arebbi ameqqran. Aqa tᵉttwabenna Taddart nni s iẓra imeqqranen i ittxeṣṣan ad ttwannḍen ɣar wemcan nsen, u ittwattegg ukeccuḍ di řeḥyuḍ. Tteggen nitni řxedmet-a s cḍaret uca teggur mliḥ jar ifassen nsen.
9 Neccin nesseqsa imɣaren-a u nenna asen ammu: ‘Man wen i d awem iwcin řumur maḥend ad tessbeddem taddart-a u ad tkemmřem řḥiḍ-a?’
10 Nesseqsa ten uřa x ismawen nsen ḥima ad ac ten-i-dd-nini, ařami niweḍ ad nzemmem ismawen n yeryazen nni iǧan ɣar uzeǧif nsen.
11 Nitni arrin aneɣ-dd, nnan ammu: ‘Neccin d imsexxaren n Arebbi n ijenwan d temmurt u nebna taddart tenni tᵉttwabna danita aṭṭas n iseggʷusa zeg wami. Ijj n ujeǧid d ameqqran n Israil ibna tt u ikemmeř i-tt.
12 Maca awarni řami ssɛaren řejdud nneɣ Arebbi n ijenwan, aqa iwca i-ten deg ufus n Nabuxadnaṣṣar, ajeǧid n Babil, Axaldiwi, wenni ihedmen Taddart-a u indeh řgens ɣar lmenfa ɣar Babil.
13 Maca deg useggʷas amezwaru n Kurac, ajeǧid n Babil, yumur Kurac ad ssbedden Taddart-a n Arebbi twařat nneɣni.
14 Uřa d řeqcuɛ n wureɣ d nnuqart zi Taddart n Arebbi, tinni ikkes Nabuxadnaṣṣar zi Zzawect Tameqqrant di Urcalim, issidef i-tent ɣar zzawect n Babil, aqa issuffeɣ i-tent Kurac zi zzawect di Babil u iwca i-tent i ijj n weryaz qqaren as Cicbaṣṣar, wenni tuɣa igga d lwali.
15 Netta inna as: Ksi řeqcuɛ-a, ruḥ, ggem ten di Zzawect Tameqqrant di Urcalim. Ittxeṣṣa ad tᵉttwabna Taddart n Arebbi deg wemcan nnes n zic.
16 Xas uca yusa-dd Cicbaṣṣar wanita, uca issars dsusa i Taddart n Arebbi di Urcalim u ssenni ař řexxu aqa bennan tt, maca war tᵉttwakemmeř ɛad.’
17 Xenni řexxu, mařa yarḍa i ujeǧid, ejj ad arzun deg wexxam n txubay n ujeǧid di Babil, ma s tidett immewc řumur zi ɣar ujeǧid Kurac ḥima ad tᵉttwabna Taddart-a n Arebbi di Urcalim twařa nneɣni uca ad aneɣ dd-ittwassekk xenni lqarar n ujeǧid.”