3
Beddu n řebni n Zzawect Tameqqrant
1 Umi dd-yiweḍ uyur wiss sebɛa u ayt n Israil tuɣa aten di tneddam, issmun řgens am yijj n weryaz di Urcalim.
2 Ikkar Yahucaɛ, mmis n Yuṣadaq, ak-d aytmas, ikehhanen, d Zarubbabil, mmis n Caɛaltiyil, ak-d aytmas, uca bnan aɛalṭar n AREBBI n Israil, ḥima ad xas qeddmen tiɣarṣa n wecmaḍ am mammec tura di Ccariɛa n Musa, aryaz n AREBBI.
3 Nitni ssbedden aɛalṭar x dsusa nnes mani t tuɣa d amezwaru, waxxa tewḍa-dd xasen tiggʷudi zi řegnus n temmura, uca qeddmen xas tiɣarṣa n wecmaḍ i SIDI, tiɣarṣa n wecmaḍ i tuffut u i tmeddit.
4 Nitni ɛeyyden ɛawed Řɛid n Iɛuccuten, am mammec t yura, uca qeddmen tiɣarṣa n wecmaḍ, ass iḍfar umas. Tuɣa řqedd nsent i yijj n wass ɛlaḥsab min ittwaggen i wass nni.
5 Awarni as qeddmen nitni taɣarṣt n wecmaḍ n řebda, tiɣarṣa i wussan n uyur n jdid u i marra řeɛyudat ittwaggen n SIDI inni tuɣa ittwaqeddsen, u ɛawed tiɣarṣa n kuř ijj wenni iṭṭewɛen ḥima ad iqeddem ict n tewhibt s řxaḍar i SIDI.
6 Zeg wass amezwaru n uyur wiss sebɛa bdan nitni ad qeddmen tiɣarṣa n wecmaḍ i SIDI, maca dsas n Zzawect Tameqqrant n SIDI war ittwagg ɛad.
7 Wcin nnuqart i imaṣṣuten u i yinni ineqqcen akeccuḍ, uca i ayt n Sidun u i ayt n Ṣur wcin nitni macca d tissit d zzect, maḥend ad awyen akeccuḍ n tneglin n Lubnan ɣar řebḥar ɣar Yafa ɛlaḥsab ttesriḥ i d asen iwca Kurac, ajeǧid n Lfurs.
8 Deg useggʷas wiss tnayen awarni wawaḍ nsen ɣar Taddart n AREBBI di Urcalim, deg uyur wiss tnayen, bdan Zarubbabil, mmis n Caɛaltiyil, d Yahucaɛ, mmis n Yuṣadaq, d aytmas nsen i iqqimen, ikehhanen d Ilawiyyen d marra inni dd-yusin zi tmeḥbast ɣar Urcalim, di řxedmet. Nitni ggin Ilawiyyen zi ɛicřin iseggʷusa sennej maḥend ad ṭṭfen acbar x řxedmet n Taddart n SIDI.
9 Uca ikkar Yecuɛa d iḥenjiren nnes d aytmas, ak-d Qadmyil d iḥenjiren nnes, ayt n Yahuda, am yijj n weryaz maḥend ad ṭṭfen acbar x yinni iggin řxedmet di Taddart n AREBBI, u ɛawed iḥenjiren n Ḥinadad ak-d iḥenjiren nsen d aytmatsen Ilawiyyen.
10 Umi tuɣa ibennayen ssrusan dsas i Zzawect Tameqqrant n SIDI, ssbedden nitni ikehhanen s warruḍ nsen ak-d řebwaq, uřa d Ilawiyyen, ayt n Asaf, s teǧunin n wuzzař, ḥima ad ssemɣaren SIDI am mammec tuɣa i d asen isscen ufus n Dawud, ajeǧid n Israil.
11 Nitni ɣennjen s nnubtat i SIDI s usemɣar d uqadi, aqa Netta iṣbeḥ minzi tamexsiwt nnes icewwaren x Israil tᵉttɣima i řebda. U marra řgens isɣuy s yijj n usřiwřew imɣar i usemɣar n SIDI maɣar dsas i Taddart n SIDI tuɣa immars.
12 Aṭṭas n ikehhanen d Ilawiyyen d izeǧifen x ibabaten n řaǧat, iwessura inni iẓrin Taddart tamezwarut, run s tmijja ijehden umi ittwagg dsas n Taddart-a zzat i tiṭṭawin nsen, maca uřa d aṭṭas arenyen di tmijja nsen s usřiwřew u s řefraḥet,
13 ařami war izemmar řgens ad meyyzen jar řḥess n usřiwřew d řḥess n iɣuyyan s imeṭṭawen n řgens, minzi řgens isɣuy s yijj n usřiwřew imɣar ařami ittwaseř řḥess zi řaggʷaj.