6
Awař ḍidd i idurar n Israil
1 Yusa-dd ɣari wawař n SIDI, inna:
2 “A mmis n bnadem, arr udem nnec ɣar idurar n Israil uca nabb xasen
3 uca ini: ‘A idurar n Israil, sřem i wawař n Sidi inu, SIDI! Ammu i iqqar Sidi inu, SIDI, i idurar u i tewririn, i tɣezratin u i teɣzurtin: Xzar, Necc ad xawem ssekkeɣ ssif uca řegɛudi nwem mani tᵉttwehhabem ddbayeḥ nwem ad tent areddǧeɣ.
4 Ad ttwaredǧen iɛalṭaren nwem u ipilaren n arebbi n tfuct nwem ad ttwarẓen u Necc ad nḍareɣ inni ittwassnuqben zzat i wudem n imeyḍa n l’aṣnam nwem.
5 Ad ggeɣ řxecbat n ayt n Israil zzat i imeyḍa n l’aṣnam nsen uca ad zuzzareɣ iɣsan nwem ɣar min dd-innḍen i iɛalṭaren nwem.
6 Di marra imucan mani tzeddɣem ad ttwareddǧent tneddam uca řegɛudi ad tent jjen, ařami iɛalṭaren nwem ad iřin d řxarbet d ttwajjen, uca imeyḍa n l’aṣnam nwem ad ttwarẓen u ipilaren nwem n arebbi n tfuct ad ttwaqessen u timegga nwem ad ttwamḥant.
7 Inni ittwanɣen ad din iřin di řwesṭ nwem, uca ammu i ɣa tessnem aqa Necc d SIDI.’ ”
8 “Ad ggeɣ aqa inni ittwassnejmen zi ssif jar řegnus ad qqimen ddaren umi kenniw ɣa zuzzareɣ x temmura.
9 Inni ittwanejmen ad xafi ɛeqřen jar regnus mani ttwaneddhen d imeḥbas, minzi Necc arẓiɣ uř nsen nni xafi ittaggʷejen, iccuren s farq-ccɣeř uca uřa d tiṭṭawin nsen nni iḍfaren awarni i imeyḍa n l’aṣnam nsen ccurent s farq-ccɣeř. Nitni ad ɛiffen ixef nsen zi ssibbet n tmegga iɛeffnen nni ggin s marra jjaɛayef nsen.
10 Nitni ad ssnen belli Necc d SIDI. Necc war nniɣ amenni waha aqa Necc ad daysen ggeɣ řɣar-a.”
11 “Ammu i iqqar Sidi inu, SIDI: Wwet s ufus nnec uca darrec s uḍar nnec uca ini: ‘Ay!’ x marra nnɛawat tiɛeffanin n taddart n Israil, maɣar nitni ad wḍan s ssif, s řaẓ u s ṭṭaɛun!
12 Wi iǧan yiggʷej ad immet s ṭṭaɛun u wi iǧan yudes ad iwḍa s ssif u wi iqqimen u aqa ittwaḥṣar ad immet s řaẓ, ammu ad daysen kemmřeɣ asɛar inu.
13 Ittxeṣṣa ad tessnem belli Necc d SIDI, xmi inni zzaysen ittwanɣen ad din iřin jar imeyḍa n l’aṣnam nsen deg wenneḍ n iɛalṭaren nsen x kuř tawrirt tuɛřa, x marra tiqqicatin n idurar, sadu kuř tacejjart tazizawt u sadu kuř tacejjart n yigg s waṭṭas n tefray, deg wemcan mani nnumen ssewjaden ict n řefwaḥet ittfuḥen i marra imeyḍa n l’aṣnam nsen.
14 Ad sswiẓẓḍeɣ afus inu ḍidd nsen uca ad ggeɣ tammurt d ict n temmurt ittwareddǧen, ict n temmurt ittwareddǧen mahu řexřa n Dabla, di marra imucan mani zeddɣen. Uca nitni ad ssnen belli Necc d SIDI.”