41
Taddart n Zzawect Tameqqrant n jdid
1 Netta yiwi ayi ɣar Wexxam n Zzawect Tameqqrant uca iɛbar řeḍruf n řḥiḍ. Tuɣa-ten setta n iɣaǧen ɣar uɣezdis-a u setta n iɣaǧen ɣar uɣezdis nneɣni, x tiru n Uqiḍun. *
2 Tiru n wadaf tuɣa-tt ɛecra n iɣaǧen uca udmawen n řeḥyuḍ ɣar uɣezdis n wadaf tuɣa aten xemsa n iɣaǧen ɣar uɣezdis-a u xemsa n iɣaǧen ɣar uɣezdis nneɣni. Iɛbar tuzzeggart nnes: arebɛin n iɣaǧen, uca tiru nnes: ɛicrin n iɣaǧen.
3 Yudef-dd ɣar daxeř uca iɛbar řḥiḍ nni ɣar ṭṭarf n wadaf n Wexxam n Daxeř: tnayen n iɣaǧen uca tewwart tuɣa-tt setta n iɣaǧen uca tiru n wadaf sebɛa n iɣaǧen.
4 Iɛbar tuzzeggart n Wexxam n Daxeř: ɛicrin n iɣaǧen, uca tiru nnes: ɛicrin n iɣaǧen ɣar zzat n Wexxam n Zzawect Tameqqrant. Xenni inna ayi: “Wa d Aqdas x Uqeddas!”
5 Iɛbar řḥiḍ n Taddart: setta n iɣaǧen, uca tiru n kuř axxam n uɣezdis tuɣa-t di arebɛa n iɣaǧen deg wenneḍ n Taddart marra.
6 tixxamin n uɣezdis tuɣa atent taxxamt zzat i texxamt nneɣni, třata di řuɛřa, uca amenni třatin n twařawin ict n texxamt. Uca tixxamin nni iwḍent ař řḥiḍ n Taddart nni din iǧan i texxamin i d as dd-innḍen, maḥend ad iqeddem asenned i tḥenya n texxamin. War iɛeddeř ad awḍent tḥenya ař daxeř di řḥiḍ n Taddart.
7 Ɣar sennej deg wenneḍ immarni di ttasiɛ nni iǧan ɣar ixxamen n uɣezdis x kuř ṭṭebqet Maɣar x kuř ṭṭebqet n taddart inneḍ-dd ijj n ukulwar i Taddart marra. X uya tedweř Taddart dayes ttasiɛ ktar sennej u ammu i izemmar bnadem ad dd-igeɛɛed zeg wadday ɣar ṭṭebqet sennej s ṭṭebqet n řwesṭ.
8 Ẓriɣ ict n řgeɛɛdet i d as dd-innḍen i Taddart marra, aqa-tt d dsusa n ixxamen n uɣezdis: ijj n uɣanim n řeɛbar ikemmřen, setta n iɣaǧen ař mani iwḍen ɣar tisi.
9 Tiru n řḥiḍ nni igga aɣezdis n barra n řebni ak-d ixxamen n uɣezdis, tuɣa-tt xemsa n iɣaǧen, uca ammu uřa d ttasiɛ yarezmen i iqqimen ɣar Taddart ak-d ixxamen n uɣezdis, ttasiɛ i dd-yusin-dd ak-d Taddart.
10 Uca min iqqimen ɛad aqa d ijj n ttasiɛ jar ixxamen di řemřaḥ ɣar ccamal d yinni ɣar ljanub n ɛicrin n iɣaǧen, deg wenneḍ n Taddart, deg wenneḍ nnes marra.
11 Teffeɣ tewwart n řebni n ixxamen n uɣezdis ɣar ttasiɛ yarezmen i iqqimen, ict n tewwart teffeɣ ɣar ccamal uca tawwart nneɣni teffeɣ ɣar ljanub. Tiru n ttasiɛ iqqimen tuɣa-tt di xemsa n iɣaǧen deg wenneḍ nnes marra.
12 Řebni ɣar wudem n řemraḥ ittwaɛezřen ɣar řɣarb tuɣa ɣares ict n tiru n sebɛin n iɣaǧen uca řḥiḍ n řebni tuɣa-t di xemsa n iɣaǧen deg wenneḍ nnes marra, uca tuzzeggart nnes tuɣa-tt di tesɛin n iɣaǧen.
13 Netta iɛbar tuzzeggart n Taddart: mya n iɣaǧen. Řemraḥ ittwaɛezřen d řebni i dayes iǧan ak-d řeḥyuḍ nnes, aqa ɣarsen tuzzeggart d ict: mya n iɣaǧen.
14 Am tiru n wudem n Taddart ɣar uɣezdis nnes n ḍeffar am řemraḥ ittwaɛezřen ɣar uɣezdis nnes n ccarq tuɣa mya n iɣaǧen.
15 Iɛbar uřa d tuzzeggart n řebni nni tuɣa ɣar zzat n řemraḥ ittwaɛezřen ař ḍeffar nnes. Ikulwaren nnes ɣar uɣezdis-a u ɣar uɣezdis nneɣni tuɣa aten di mya n uɣiř.
Daxeř n Zzawect Tameqqrant, isqifen ɣar řemraḥ n zzat,
16 tinebdatin d řekwazi iḥṣaren d řebniyyat s ikulwaren i d as dd-innḍen i třata n řefwaqi nsent zzat i tnebdatin n tewwura, marra aya tuɣa ittwassduri s teřwiḥin n ukeccud, zi temmurt ař řekwazi uca řekwazi simant nsen tuɣa ttwassduryen.
17 X wudem i iǧan sennej i wadaf, am x wudem n daxeř am x wudem n barra n Taddart u x marra řḥiḍ ɣar daxeř u ɣar barra tuɣa din tiřwiḥin n ukeccuḍ.
18 Tuɣa ttwaggen xasen ikiruben d tcejjura n tini. Aqa din ict n tcejjart n tini jar ijj n ukirub d ijj n ukirub nneɣni uca kuř akirub ɣares tnayen n wudmawen:
19 udem n bnadem nni ixezzaren ɣar tcejjart n tini ɣar ijj n uɣezdis d wudem n wayrad ameẓyan ixezzaren ɣar tcejjart n tini ɣar uɣezdis nneɣni. Ammu i ten ggin deg wenneḍ n marra Taddart.
20 Zi temmurt ař sennej n tewwart ttwaggen ikiruben d tcejjura n tini uca ɛawed x řḥiḍ n Zzawect Tameqqrant.
21 Řeḍruf ɣar uɣezdis n tewwart n Zzawect Tameqqrant ggin ijj n ukwadrun uca ccuf n Uqeddas iḍhar-dd am ccuf n Zzawect.
22 Aɛalṭar tuɣa-t n ukeccuḍ u řuɛřa nnes tuɣa-t třata n iɣaǧen u řebni sadu nnes tnayen n iɣaǧen di řuɛřa nnes. Ɣares tiɣemmura uca řebni sadu nnes d iɣezdisen nnes tuɣa aten zeg ukeccuḍ. Netta issiweř akidi: “Ta d tazewḍa nni iǧan zzat i wudem n SIDI.”
23 Zzawect Tameqqrant d Weqdas ɣarsen tnayen n tewwura.
24 Tuɣa ɣar tiwwura, ɣar kuř icten zzaysent, tnayen n teřwiḥin am wafriwen, tnayen n teřwiḥin nni zemmaren ad nuqqaren, tnayen i yict n tewwart u tnayen i tewwart nneɣni.
25 Di tewwura n Zzawect Tameqqrant ttwaggen ikiruben d tcejjura n tini nni ittwaggen am yinni x řeḥyuḍ. Tuɣa din tasqift n ukeccuḍ ɣar wudem n wesqif ɣar barra.
26 Tuɣa din řekwazi ḥsaren d tcejjura n tini ɣar uɣezdis-a u ɣar uɣezdis nneɣni, ɣar tnayen n iɣezdisen n wesqif, ɣar ixxamen i iǧan ɣar uɣezdis n Taddart u ɣar tesqifin. *