34
SIDI d Ameksaw Aṣebḥan x řgens nnes
1 Yusa-dd ɣari wawař n SIDI, inna:
2 “A mmis n bnadem, nabb ḍidd i imeksawen n Israil uca ini asen: ‘Ammu i iqqar Sidi inu, SIDI! Uct x imeksawen n Israil nni yarekkwesen ixef nsen! Ma war ittxeṣṣi i imeksawen ad arewsen uǧi?
3 Kenniw tᵉttettem tadunt uca tarrḍem taḍuft, tɣarrṣem i řmař imessřen mliḥ, maca war tarekkwisem uǧi.
4 War tessmeɛzem min iheyyfen, war tᵉttessgenfim min iḥeřcen, min ittwarẓin war t tceffnem, min iweddaren war t tᵉttarrim u min ixsaren war xas tarezzum, maca s uqabu d ufus iqesḥen tḥekkmem xasen.
5 Ammu i ttwazuzzaren, minzi war din tuɣi bu umeksaw. Nitni dewřen d teymart n řewḥuc n barra nni iǧan di řexřa uca ammu i ttwabezzɛen.
6 Uyuren weddaren uǧi inu x marra idurar u x kuř tawrirt yuɛřan, uǧi inu ttwabezzɛen x marra tammurt. War din wi xasen i ɣa isseqsan uca war din wi xasen yarezzun.’ ”
7 “S uya, a imeksawen, sřem i wawař n SIDI:
8 ‘S tidett am ddareɣ Necc, ammu i iqqar Sidi inu, SIDI, ma war ttiřiɣ Necc xasen? Minzi uǧi inu dewřen d taymart u uǧi inu dewřen d macca i řewḥuc n řexřa, umi war din iǧi umeksaw u minzi imeksawen inu war ttseqsan ca x wuǧi inu u umi imeksawen inu arewsen ixef nsen, war iǧi uǧi inu!’ ”
9 “S uya, a imeksawen, sřem i wawař n SIDI!
10 Ammu i iqqar Sidi inu, SIDI: ‘Xzar, Necc aqa ayi ḍidd i imeksawen nni! Necc ad ttareɣ uǧi inu zeg ufus nsen uca ad ten ssbeddeɣ zeg warwas n wuǧi, ařami imeksawen war yarekkwesen ɛad ixef nsen. Necc ad ssnejmeɣ uǧi inu zeg uqemmum nsen, ařami war d asen ttiřin ɛad d macca.’
11 Minzi ammu i iqqar Sidi inu, SIDI: ‘Xzar, Necc ad sseqsiɣ x wuǧi inu u ad xasen arzuɣ.
12 Am umeksaw ad issmun taḥimart nnes deg wass nni di yeǧa di řwest n wuǧi nnes ibezzɛen, amenni i ɣa yarzuɣ Necc x wuǧi inu. Necc ad ten ssnejmeɣ zi marra imucan mani ttwabezzɛen, deg wass n iseynuten d taǧest.
13 Necc ad ten ssuffɣeɣ zi řegnus, ad ten ssmuneɣ zi temmura uca ad ten awyeɣ ɣar temmurt nsen. Necc ad ten arewseɣ x idurar n Israil, ɣar tɣezratin u di marra imucan i ittřiqen i tzeddiɣt di temmurt.
14 Necc ad ten arewseɣ x ict n ddemnet n tarewsa d taṣebḥant. X idurar yuɛřan n Israil ad yiři řmedweř n tarewsa nsen. Dinni ad areyyḥen deg ict n ddemnet n tarewsa taṣebḥant u ad arewsen deg ict n ddemnet n tarewsa d lemliḥ aṭṭas, x idurar n Israil.
15 Necc ad arewseɣ uǧi inu uca ad ten ssareyyḥeɣ!’, ammu i iqqar Sidi inu, SIDI.
16 ‘Necc ad arzuɣ min ixsaren uca min iweddaren ad t arreɣ u min ittwarẓin ad t cefneɣ u min iheřcen ad t ssjehdeɣ, maca min imessřen d min ijehden ad t areddǧeɣ. Necc ad ten arewseɣ s řḥeqq.
17 U kenniw, a uǧi inu, ammu i iqqar Sidi inu, SIDI, xzar, Necc ad ḥekmeɣ jar ijjen zeg wuǧi d wuǧi nneɣni, jar icarriyyen d iɣayḍen.
18 Ma drust awem umi teccim ddemnet n tarewsa inu d taṣebḥant? Ma texsem xenni ɛawed ad tɛefsem x min iqqimen i tarewsa s iḍaren nwem? Ma texsem ad teswem aman iṣfan uca xenni ad tessarwyen min iqqimen s iḍaren nwem?
19 Ma ittxeṣṣa xenni i wuǧi inu ad ccen min xef ɛefsen iḍaren nwem u ad swen min ssarwyen iḍaren nwem?’ ”
20 “S uya ammu i d asen iqqar Sidi inu, SIDI: ‘Xzar, Necc ad carrɛeɣ jar wuǧi imessřen d wuǧi ikkucḍen,
21 minzi marra uǧi iḍeɛfen tɛarnem i-ten s uɣezdis u s teɣruḍt u tessqarbem ten s waccawen nwem, ařami ten tbezzɛem di barra.
22 Necc ad ssnejmeɣ uǧi inu ařami war ttiřin ɛad i teymart u Necc ad carrɛeɣ jar ijjen zeg wuǧi d wuǧi nneɣni.
23 Necc ad xasen ssekkareɣ ijj n Umeksaw nni ten i ɣa yarewsen: Amsexxar inu Dawud. Netta ad ten yarwes u Netta ad asen yiři d Ameksaw.
24 Necc, SIDI, ad asen iřiɣ d AREBBI u Amsexxar inu Dawud ad yiři d Řḥakem di řwesṭ nsen, Necc, SIDI, aqa nniɣ t.
25 Necc ad ggeɣ ijj n Řɛahd n řehna akidsen uca ad kkseɣ řewḥuc iwɛaren zi temmurt. Nitni ad zedɣen di řexřa s řaman uca ad ṭṭṣen deg izeɣran.
26 Ad ggeɣ min innḍen i wedrar inu d lbaraka u Necc ad dd-ssehwiɣ anẓar di řweqt nnes. Ad din yiři wenẓar aṭṭas s lbaraka.
27 Ticejjura n yeyyar ad wcent řɣiǧet nsent uca tammurt ad tewc ṣṣabet nnes uca nitni ad zedɣen di řaman di temmurt nsen. Xenni ad ssnen belli Necc d SIDI, xmi ɣa arẓeɣ imqeǧaden n zzayřet nsen uca ad ten qeřɛeɣ zeg ufus n yinni ten ijjin ad asen sexxaren.
28 War ttiřin ɛad d takeccaḍt i řegnus uca řewḥuc n temmurt war ten ṣarrḍen ɛad, maca nitni ad zedɣen di řaman u war ten issnexřiɛ uřa d ijj.
29 Necc ad asen ssduqqzeɣ ijj n uɣemmuy, ad yiři i yijj n yisem icennɛen. Xenni war ttmeksin ɛad s řaẓ zi temmurt uca war arebbun ɛad řḥegra n řegnus.
30 Xenni ad ssnen belli Necc, SIDI AREBBI nsen, aqa ayi kidsen, uca nitni d řgens inu, taddart n Israil!, ammu i iqqar Sidi inu, SIDI.
31 Kenniw, a uǧi inu, uǧi n řmedweř inu n tarewsa, kenniw d bnadem, maca Necc d AREBBI nwem, ammu i iqqar Sidi inu, SIDI.’ ”