28
Awař x řḥakem n Ṣur
1 Yusa-dd ɣari wawař n SIDI, inna:
2 “A mmis n bnadem, ini i řḥakem n Ṣur: ‘Ammu i iqqar Sidi inu, SIDI: Minzi tessgeɛɛded uř nnec, tennid: Necc d arebbi, necc ttɣimiɣ x řkursi n arebbi di řwesṭ n řebḥur!, waxxa cek d bnadem, war teǧid d arebbi, aqa teggid uř nnec xenni am wuř n AREBBI.
3 Xzar, cek d amiɣis x Daniyil, war din iǧi uřa d ijj n ssirr xak innuffaren.
4 S tiɣit nnec d řefhamet nnec aqa tessmuned i yixef nnec igeřwan mɣaren u teggid ureɣ d nnuqart deg ixxamen nnec n txubay.
5 S tiɣit nnec imɣaren ɣar tsebbabt nnec, tarnid deg igeřwan nnec uca di ssibbet n igeřwan nnec mɣaren, issgeɛɛed wuř nnec ixef nnes.’
6 S uya, ammu i iqqar Sidi inu, SIDI: ‘Umi teggid uř nnec am wuř n AREBBI,
7 s uya, xzar, Necc ad xak dd-awyeɣ ibarraniyyen, řegnus iqesḥen aṭṭas. Nitni ad dd-jebden řesyuf nsen ḍidd i weẓri n tiɣit nnec uca ad ssfesden tissiqt nnec.
8 Nitni ad cek ssehwan ɣar weḥfur n turṣuḍi uca ad temmted řmewt n yinni ittwassnuqqben deg wuř n řebḥur.
9 Ma tzeɛmed s tidett ad tinid zzat i wudem n yinni cek i ɣa inɣen: ‘Necc d AREBBI’? Aqa cek d bnadem, war iǧi d arebbi deg ufus n yinni i cek i ɣa ideǧen.
10 Ad temmted s ufus n ibarraniyyen am yinni war ittwaxetnen, maɣar Necc nniɣ t!, ammu i iqqar Sidi inu, SIDI.’ ”
11 Yusa-dd ɣari wawař n SIDI, inna:
12 “A mmis n bnadem, sgeɛɛed ijj n yezři n wecḍan x ujeǧid n Ṣur uca ini as:
‘Ammu i iqqar Sidi inu, SIDI:
A cek, wenni d řxatem n řebni ifarzen,
teccured s tiɣit u tkemmřed deg weẓri!
13 Tuɣa cek di Ɛadn, di jjennet n AREBBI.
Tuɣa dřin cek s ɛřam kuř iẓra iɣřan,
s řeɛqaq, tyaqut d dyamanti,
s texrisulit, uniks d yaspis,
s ṣaffir aziza, karbunkel, smaraxt d wureɣ.
Řxedmet n ibendiren nnec
d ubarru n temɣarin nnec tuɣa dayek,
deg wass nni di dd-tᵉttwaxeřqed tuɣa wejdent.
14 Tuɣa cek d ijj n ukirub
d amedhun issdurruyen,
ammu i ggiɣ cek din.
Tuɣa cek x wedrar iqeddsen n AREBBI,
teggured di řwesṭ n iẓra itteḥduduqen.
15 Tuɣa cek tkemmřed deg ibriden nnec,
zeg wass nni di dd-tᵉttwaxeřqed,
ař dayek tᵉttwaf řmuɛṣiyyet.
16 S řemɣaret n tsebbabt nnec,
iccur daxeř nnec s řexcunet
uca xenni texḍiḍ.
S uya ad cek ssiggʷejeɣ
x wedrar n arebbi,
ad cek mḥiɣ zi řwesṭ n iẓra itteḥduduqen,
a cek akirub issdurruyen!
17 Uř nnec issgeɛɛed ixef nnes s waẓri nnec,
aqa tessɛiǧted tiɣit nnec
di ṭṭweɛ n tissiqt nnec iɛeffaren.
Necc nḍareɣ cek x temmurt
uca ggiɣ cek zzat i wudem n ijeǧiden,
ařami zemmaren ad ɣarek xzaren s řḥegra.
18 Zi ssibbet n waṭṭas n řmuɛṣiyyet nnec
d řɣecc n tsebbabt nnec,
aqa tɣesbed tizawiyyin nnec iqeddsen.
S uyenni arriɣ timessi teffeɣ-dd
zi řwesṭ nnec,
tenni cek iccen,
uca arriɣ cek d iɣɣeḍ x temmurt
zzat i tiṭṭawin n marra inni cek ittwařan.
19 Marra inni cek issnen jar řegnus,
arejfen zzayek.
Tdewřed d ijj n umedya n warjef
u war tᵉttiřid ɛad i řebda.’ ”
Awař ḍidd i Ṣur
20 Yusa-dd ɣari wawař n SIDI, inna:
21 “A mmis n bnadem, arr udem nnec ɣar Ṣidun uca nabb ḍidd nnes,
22 uca ini: ‘Ammu i iqqar Sidi inu, SIDI: Xzar, Necc aqa ayi ḍidd nnem, a tandint n Ṣidun! Necc ad ttwassɛuǧeɣ di řwest nnec. Uca nitni ad ssnen belli Necc d SIDI xmi i ɣa ggeɣ řeḥkamat di Ṣidun uca ad dayes ttwaqeddseɣ.
23 Ad ssekkeɣ ṭṭaɛun di řwesṭ nnes uřa d idammen deg ibriden nnes u wenni ittwanɣen ad iwḍa di řwesṭ nnes s ssif nni xas i ɣa yiřin zeg wenneḍ nnes. Xenni ad ssnen, belli Necc d SIDI,
24 uca ɛemmarṣ ɛad ad yiři i taddart n Israil asennan iqebcen niɣ tazeggʷart itteqqsen zeg inni d asen dd-innḍen, inni ten isseḥqaran. Nitni ad ssnen belli Necc d Sidi, d SIDI i ǧiɣ.’ ”
25 “Ammu i iqqar SIDI inu, SIDI: ‘Xmi ɣa ssmuneɣ taddart n Israil zi řegnus nni mani ttwabezzɛen nitni uca Necc ssecneɣ ixef inu d Amqeddes daysen zzat i tiṭṭawin n řegnus, xenni ad zedɣen di temmurt nni wciɣ i umsexxar inu Yaɛqub.
26 Nitni ad zedɣen di řaman uca ad bnan tudrin, ad ggen imarjaɛen n uḍiř u ad daysen ẓẓun tizayarin, wah, nitni ad din zedɣen di řaman awarni řami ggiɣ řeḥkamat x marra inni ten ikeccḍen zi temmura i d asen dd-innḍen. Xenni ad ssnen belli Necc d SIDI, AREBBI nsen.’ ”