24
Urcalim d ict n marmita dayes ddra
1 Yusa-dd ɣari wawař n SIDI deg useggʷas wiss tesɛa, deg uyur wiss ɛecra, deg wass wiss ɛecra n uyur, inna:
2 “A mmis n bnadem, ari i yixef nnec isem n ass-a, isem n ass n yiḍa. Deg wass-a nnit ad iḥṣar ujeǧid n Babil Urcalim.
3 Siweř ijj n umedya i taddart iɣewwɣen nni, ini asen: ‘Ammu i iqqar Sidi inu, SIDI:
Egg ict n teydurt,
egg i-tt uca kebb dayes aman.
4 Egg dayes tifettutin n weysum,
marra tifettutin icnan,
tameṣṣaḍt d teɣruḍt,
ɛemmar i-tt s yeɣsan d lemliḥ qaɛ.
5 Ksi lemliḥ n wuǧi
uca arr uřa d akeccuḍ sadu nsen.
Ejj ad sehden marra mliḥ
ařami ɛad iɣsan nnes ad dayes ttwanennan.’ ”
6 “S uya, ammu i iqqar Sidi inu, SIDI:
‘Uct x tendint n idammen!
taydurt i zi řexmej nnes ɛad dayes,
tenni zi war yekkis řexmej nnes!
Kkes zzayes tafettut
awarni i tfettut nneɣni
břa ad xas teggid taqedduḥt.
7 Minzi idammen nnes aqa di řwest nnes,
tessizeř i-ten x ict n teṣḍart taqeccart.
War ten tessizziř x temmurt
maḥend ad ten teddiř s ucař.
8 Ḥima ad ittwassekkar wesɛar,
ḥima ad yiři wenqam,
ggiɣ idammen i tessizzeř nettat
x teṣḍart taqeccart,
ḥima war ddařen idammen nnes.’ ”
9 “S uya, ammu i iqqar Sidi inu, SIDI:
‘Uct x tendint n idammen!
Necc s Yixef inu ad ggeɣ aqellij n ukeccuḍ
i uceɛɛař n tmessi imɣar!
10 Arni akeccuḍ, ejj timessi ad tareɣ aṭṭas,
cennef aysum mliḥ
uca ejj axeǧeḍ n řebẓar
ad ittexttex mliḥ
uca ejj iɣsan ad cemḍen.
11 Arr xenni taydurt ixwan ɛawed
x řefḥem nnes itteḥduduqen,
ḥima ad iḥma ad icmeḍ
ddra nnes n nnḥas
uca ad tefsi zzayes texmuji i dayes iǧan
u xenni ad ittwaqḍi řexmej.
12 Marra amarret aqa-t di baṭeř.
Řexmej nnes ifeyyḍen war dd-iffiɣ zzayes.
Arr řexmej nni di tmessi!
13 Di texmuji nnem teǧi řefḍiḥet nnem,
minzi Necc tuɣa xseɣ ad cem ssizedgeɣ
uca xenni war tᵉttwassizdiged.
X uya war tᵉttwassizdiged
zi řexmej nnem
ař xam i ɣa ssiwḍeɣ asɛar inu.
14 Necc, SIDI, ssiwřeɣ.
Ad iffeɣ u Necc ad t ggeɣ.
War semḥeɣ deg imerwusa
u war zziǧzeɣ u war ndimeɣ.
Ad xam ḥekmen
ibriden nnem d tmegga nnem!’,
ammu i iqqar Sidi inu, SIDI.”
Řmewt n temɣart n Ḥizqiyal
15 Yusa-dd ɣari wawař n SIDI, inna:
16 “A mmis n bnadem, xzar, s ict n tecti Necc ad kesseɣ meẓri nnec zzat i tiṭṭawin nnec. War ttᵉttru, war ttejji ad uzzřen imeṭṭawen nnec.
17 Sɣuyy deg uhedden, war ceṭṭen x umettin. Qqen areẓẓet nnec xak uca egg tisiřa nnec deg iḍaren nnec, u war ttřeḥḥif acřaɣem ɣar uyencic niɣ ad tecced aɣrum nni dd ɣa yawyen iwdan i wecḍan.”
18 Ɣar tuffut ssiwřeɣ i řgens u ɣar tmeddit temmut tmeṭṭut inu u di twecca ggiɣ am mammec i d ayi ittwaweṣṣa.
19 Inna ayi řgens: “Ma war texsed ad aneɣ tessecned min ɛnant tmesřayin-a, mayemmi i tegged ammu?”
20 Necc nniɣ asen: “Yusa-dd ɣari wawař n SIDI, inna:
21 ‘Ini i taddart n Israil: Ammu i iqqar Sidi inu, SIDI! Xzar, Necc ad ssɛiǧteɣ Zzawect inu Iqeddsen tenni d aɛuǧi n jjehd nwem d umeẓri n tiṭṭawin nwem d řehzuṭ i řeɛmar nwem, uřa d iḥenjiren nwem d tḥenjirin nwem nni tejjim din ad wḍan s ssif.
22 Xenni ad teggem am mammec ggiɣ Necc. War tᵉttřeḥḥifem acřaɣem ɣar uyencic uca aɣrum i dd-yiwyen iryazen, war t tᵉttettem.
23 Areẓẓat nwem ad iřint x izeǧifen nwem u sandaliyat nwem deg iḍaren nwem. War tceṭṭnem u war tᵉttrum. Ad tᵉteḥḥam di řmuɛṣiyyet nwem uca ad tweḥweḥem ijjen x wenneɣni.
24 Ammu i ɣa yiři Ḥizqiyal d řeɛřamet n řeɛjeb i kenniw. Ad teggem nican am mammec igga netta. Xmi dd ɣa yas ddegga, ad tessnem, belli Necc Sidi, d SIDI.’ ”
25 “Uca cek, a mmis n bnadem, ma war ittiři aqa deg wass i zzaysen i ɣa kesseɣ lburj nsen, řefraḥet x telwizt nsen, uřa d meẓri n tiṭṭawin nsen d iḥenjiren d tḥenjirin nsen nni yarebbun nitni deg wuř,
26 aqa deg wass nni simant nnes ad ɣarek dd-yas ijjen wenni yarewřen maḥend ad yegg tnayen n imezzuɣen nnec ad sřen uya.
27 Deg wass nni ad yarzem uqemmum nnec ak-d uqemmum n wenni yarewřen uca ad tessiwřed, war tᵉttiřid ɛad d aynaw. Cek ad asen tiřid d řeɛřamet n řeɛjeb uca nitni ad ssnen belli Necc d SIDI.”