1 Yusa-dd ɣari wawař n SIDI, inna: 2 “Cek, a mmis n bnadem, ma texsed ad tḥekmed, ma texsed ad tḥekmed x Tendint n idammen? Scen as xenni jjɛayef nnes, ◘ 3 ini: ‘Ammu i iqqar Sidi inu, SIDI: Cem, a tandint, tenni issizzřen idammen di řwesṭ nnes, ařami dd-tiweḍ řweqt nnes, a tandint, tenni iggin imeyḍa n l’aṣnam x yixef nnes maḥend ad zzaysen tessexmej ixef nnes! 4 S idammen nni tessizzřed, tdewřed s umarwas u s imeyḍa nnem n l’aṣnam nni teggid, aqa tessxemjed ixef nnem, tessiwḍed ussan nnem uca trehhged ař iseggʷusa nnem. X uya wciɣ cem i řegnus i useḥqar u i temmura i ustehzi. ◘ 5 Inni yudsen d yinni iggʷejen ad zzayem stehzan: ’Cem, a tamexmujt n yisem, cem, tenni iccuren s uṣeddeɛ! 6 Xzar, řḥukkam n Israil tuɣa aten dayem, kuř ijj x řeḥsab jjehd nnes, maḥend ad sizzřen idammen. 7 Sseḥqaren babatsen d yemmatsen dayem, ggin s uɣiř ak-d ubarrani di řwesṭ nnem, ḥṣaren ayujiř d tajjač i dayem. 8 Min iǧan iqeddsen i Necc, aqa tesseḥqared t, uca ussan n ssebt inu tessɛiǧted i-ten. 9 Imceqqafen tuɣa aten dayem maḥend ad ssizřen idammen. Nitni qqimen ccin x idurar nni dinni ɣarem, aqa ggin řefḍiḥet di řwesṭ nnem. ◘ 10 Nitni ssɛarran řɛar n babam nni din ɣarem, u tenni tuɣa texmej umi xas idammen, aqa ɣeṣben tt dayem. ◘ 11 Ijjen igga nnɛi ak-d tmeṭṭut n wajjar nnes, uca ijjen nneɣni issexmej tamɣart n mmis, ittegg řefḍiḥet akides, uca ɛawed ijjen nneɣni iɣṣeb učmas, yeǧis n babas, din ɣarem.◘ 12 Aqa ṭṭfen din ɣarem arrecwet, maḥend ad ssizzřen idammen, teksid arriba d arbeḥ uca tbeɛɛjed ajjar nnec s uɣiř, maca tᵉttud ayi!’, ammu i iqqar Sidi inu, SIDI.”

13 “Xzar, wtiɣ ifassen inu ijj deg wenneɣni zi ssibbet n ubeɛɛej i teggid u zi ssibbet n idammen nni issizzřen di řwesṭ nnem. ◼  ◘ 14 Ma ad iqqim uř nnem imten? Ma ad iřin ifassen nnem jehden deg wussan nni di ɣa ggeɣ min iǧan ḍidd nnem. Necc, SIDI, aqa ssiwřeɣ uca ad t ggeɣ. ◘ 15 Ad cem zuzzareɣ jar řegnus, ad cem bezzɛeɣ x temmura, u ad kemmřeɣ taxmuji nnem qaɛ. ◘ 16 Ammu i ɣa tᵉttwassɛiǧted zeg yixef nnem zzat i tiṭṭawin n řegnus u cem ad tessned belli Necc d SIDI.”

17 Yusa-dd ɣari wawař n SIDI, inna: 18 “A mmis n bnadem, inni n taddart n Israil dewřen ayi am kuffu. Marra nitni dewřen d nnḥas d istanyu d wuzzař d řexfif di řwesṭ n tefqunt, aqa aten dewřen kuffu n nnuqart.” ◘

19 “S uya, ammu i iqqar Sidi inu, SIDI, minzi marra kenniw tdewřem am kuffu, s uya, xzar, Necc ad kenniw ssmuneɣ di Urcalim. 20 Axmi yarwen nnḥas d istanyu d wuzzař d řexfif di tefqunt, ḥima ad xasen ceɛɛřen timessi maḥend ad ssfesyen man aya marra, ammu i kenniw ɣa ssmuneɣ deg weɣḍab inu u deg wesɛar inu. Ad kenniw ssarseɣ dinni uca ad kenniw ssfesyeɣ. 21 Necc ad kenniw ssmuneɣ uca ad xawem suḍeɣ s tmessi n uduqqez inu n ufugem ařami kenniw ad tᵉttwafesyem di řwesṭ nnes. 22 Axmi ssfesyen nnuqart di tefqunt, ammu i ɣa tᵉttwassfesyem kenniw dayes uca ad tessnem aqa Necc, SIDI, ssfarɣeɣ xawem asɛar inu.”

23 Yusa-dd ɣari wawař n SIDI, inna: 24 “A mmis n bnadem, ini i temmurt: ‘Cem d ict n temmurt i war ittwassizdigen, ict n temmurt i war ittwasuffen s wenẓar ijehden deg wass n wesxeḍ. 25 Aqa din ict n tmeɛmuč n inabiyyen nnes di řwesṭ nnes. Am weyrad izehharen isarḍ taymart nnes, ammu i ccin nitni řeɛmur. Kksen min iǧan d taxabect d min iɣřan. Nitni arnin tijjař nnes di řwesṭ nnes. ◘ 26 Ikehhanen nsen ssɛiǧiten Ccariɛa inu uca ssxemmajen timesřayin inu iqeddsen. Nitni war farrzen ca jar min iqeddsen d min ittwassɛiǧten, war sscanan ca lfarq jar min ixemjen d min izdigen uca ttbellaɛen uřa d tiṭṭawin nsen i wussan inu n ssebt uca ammu ttwassɛiǧiteɣ di řwesṭ nsen. ◘ 27 Řḥukkam nnes di řwesṭ nnes ggin am wuccanen nni icarrgen taymart maḥend ad ssizzřen idammen u maḥend ad areddǧen řeɛmur, ḥima ad ṭṭfen arbeḥ war iḥřin. ◘ 28 Inabiyyen nnes dřin ten s jjiř yuẓɣen. Nitni ttwařan iweḥḥan war iǧin uca ssawařen ɣarsen s tgezzant issxarriqen. Nitni qqaren: Ammu i iqqar Sidi inu, SIDI!, am SIDI tuɣa war ini walu. ◘ 29 Řgens n temmurt igga bezzez x iwdan s řexcunet, keccḍen takeccaḍt, ḥeṣṣaren řmeskin d umezřuḍ, uca deǧen abarrani břa ma ɣarsen yiři řḥeqq. 30 Arzuɣ jar asen ijj n weryaz nni i ɣa issbedden ijj n řḥiḍ uca ad ibedd di tazzit di ṭṭweɛ n temmurt ařami war tt ttaredǧeɣ, maca war t ufiɣ. ◘ 31 Xas uca ssfarɣeɣ xasen asxeḍ inu. S tmessi n uduqqez inu n ufugem qḍiɣ xasen, abrid nsen arriɣ t x uzeǧif nsen!’, ammu i iqqar Sidi inu, SIDI.’ ” ◘