2
Tařaɣit n Arebbi x Ḥizqiyal
1 Inna ayi: “A mmis n bnadem, kkar x iḍaren nnec uca Necc ad kik ssiwřeɣ.”
2 Řami akidi issiweř, yudef-dd dayi Arruḥ uca issekkar-dd ayi x iḍaren inu u necc sřiɣ i tmijja n Wenni kidi issawařen.
3 Netta inna ayi:
“A mmis n bnadem, Necc sekkeɣ cek ɣar ayt n Israil, ɣar řegnus iɣewwɣen, inni xafi iɣewwɣen. Nitni d řejdud nsen ɛeddan xafi ař ass-a.
4 Nitni d arraw n wudem iqesḥen d wuř izelgen. Necc sekkeɣ cek ɣarsen, ittxeṣṣa ac ad asen tinid: ‘Ammu i iqqar Sidi inu, SIDI!’
5 Ma ad ac sřen niɣ ad semḥen di man aya, minzi nitni d ict n taddart iɣewwɣen, nitni ad ssnen belli tuɣa anabi di řwesṭ nsen.
6 Uca cek, a mmis n bnadem, war zzaysen tteggʷed u war tteggʷed uřa zeg wawařen nsen. Waxxa aqa din ɣarek tizeggʷura d isennanen u waxxa zeddɣent ɣarek tɣarḍmiwin, war tteggʷed ca zeg wawařen nsen u war zzaysen ttnexřiɛ, minzi nitni d ict n taddart iɣewwɣen.
7 Ad kidsen tessiwřed s wawařen inu, ma ad sřen niɣ ad semḥen di man aya, minzi nitni aqa ttɣewwɣen.
8 Maca cek, a mmis n bnadem, seř min d ac ɣa iniɣ, war ttɣewwiɣ am taddart nni iɣewwɣen. Arzem aqemmum nnec nican uca ecc min d ac ɣa wceɣ.”
9 Uca ẓriɣ, xzar, ijj n ufus isswiẓẓeḍ-dd ɣari, u xzar, dayes ijj n wedlis ittwannḍen.
10 Netta ibezzeɛ i-t zzati. Tuɣa yura zi sennej d wadday uca ttwarin dayes izřan n wecḍan d usqinnef d uweḥweḥ n tamara.