15
Tazayart n Urcalim
1 Yusa-dd ɣari wawař n SIDI, inna:
2 “A mmis n bnadem, min iɛna ukeccuḍ n tzayart ktar zeg ukeccuḍ nneɣni, ktar zeg ukeccuḍ nni din iǧan jar tcejjura n wezɣar?
3 Ma izemmar bnadem ad zzayes iksi akeccuḍ maḥend ad zzayes igg ict n řqecɛet ineffɛen i řxedmet? Ma ittwakksi zzayes ict n řewted ḥima ad dayes tayřed ca n řqecɛet?
4 Xzar, ad immewc d macca i tmessi. Timessi ad tecc tnayen n ṭṭrufa nnes u aɣezdis n řwest ittwacemḍ. Ma ad iṣřeḥ ukeccuḍ nni ɛad i yict n řqecɛet i řxedmet?
5 Xzar, umi tuɣa ɛad imun, war zzayes tᵉttwagg ict n řqecɛet i řxedmet. Mecḥař qell ɛad umi t tecca timessi, icmeḍ ukeccuḍ. Ma ad zzayes ggen ɛad ca n řqecɛet i řxedmet?”
6 “S uya, ammu i iqqar Sidi inu, SIDI: ‘Mammec i wciɣ akeccuḍ n tzayart jar ukeccuḍ n wezɣar i timessi, ḥima ad ittwacc, ammu i ɣa sellmeɣ uřa d imezdaɣ n Urcalim i tmessi!
7 Maɣar Necc ad arreɣ udem inu ḍidd nsen. Xmi i ɣa xsen ad dd-ffɣen zi tmessi, ad ten tessecmeḍ tmessi u kenniw ad tessnem belli Necc d SIDI, umi ggiɣ udem inu ḍidd nsen.
8 Ad arreɣ tammurt d ict n temmurt ittwareddǧen, minzi nitni ɣdaren ayi s ict řeɣdaret iqesḥen, ammu i iqqar Sidi inu, SIDI.’ ”