7
Taddart n řefraḥet d taddart n wecḍan
1 Isem iṣbeḥ iḥřa x zzect iṣebḥen, ass n řmewt iḥřa x wass n tarwa.
2 Teḥřa twaḥit ɣar taddart n wecḍan x twaḥit ɣar taddart mani ttqeddamen ict n zzardet, minzi din iǧa qeṭṭu n bnadem marra, u wenni iddaren ittegg i-tt deg wuř nnes.
3 Iḥřa wecḍan x tdeḥḥact, maɣar s ijj n uɣembub iceḍnen iddakkʷař wuř ḥsen.
4 Uř n imiɣisen aqa-t di taddart n wecḍan, maca uř n ibuhařiyyen aqa-t di taddart n řefraḥet.
5 Iḥřa ad tesřed ɣar uwebbex zeg imiɣisen x wesḥessi i yezři n ibuhařiyyen.
6 Maɣar am utartek n isennanen sadu umeqraj, ammu i tegga tḍeḥḥact n ubuhaři. Uřa d man aya aqa-t di řbaṭeř.
Iɛřamen
7 Maɣar řeḥṣaret ad tessbuhři amiɣis, u tarzeft n arrecwet tessexsara uř.
8 Aneggaru n tmesřact teḥřa x umezwaru nnes. Wenni ɣar iǧa ttasiɛ n řxaḍar aṭṭas iḥřa x umɛeffar.
9 War sexxeḍ deɣya di buḥbeř nnec, maɣar deg weḥsin n ibuhařiyyen izeddeɣ uxeyyeq.
10 War teqqar: “Min tuɣa din, aqa ussan n zic iḥřan x mammec ǧan wussan-a?” Maɣar aseqsi-ya war izemmar ad iffeɣ zi tiɣit.
11 Tiɣit i dd-ittasen ak-d tesɣart tecna, u tiɣit aqa d řefḍeř i yinni ittwařan tafuct.
12 Maɣar am mammec tiɣit teǧa d taseddart i useřqi, ammu uřa d tmenyat aqa atent d taseddart i useřqi. Řefḍeř n tussna aqa tiɣit tᵉttic tudart i aytbab nnes.
13 Xzar min igga AREBBI, maɣar wi izemmaren ad iseggem min issfarɣ Netta?
14 Arr meẓri s řxar deg wass n wefřaḥ, maca deg wass n arẓiyyet, xzar xenni, maɣar AREBBI igga wa uřa d ta, ḥima bnadem war izemmar ad yaf awarni as walu.
Uyur x webrid n řwest
15 Marra aya i ẓriɣ deg wussan n tudart inu ifennan. Aqa din amsegged nni ittwahellken di tsegda nnes uca aqa din aɛeffan nni isszuggarten ussan nnes di marra tuɛeffna nnes.
16 War ttegg ixef nnec d amsegged aṭṭas, u war ttegg ixef nnec d amiɣis aṭṭas. Mayemmi ɣa tareddǧed ixef nnec?
17 War ttiři d aɛeffan aṭṭas u war ttiři ɛawed d abuhaři aṭṭas. Mayemmi ɣa temmted mařa war dd-yiwiḍ ɛad řmijař nnec?
18 Mliḥ mařa cek tcebbared di ta, am war yarexxu ufus nnec di tin, maɣar wenni itteggʷeden AREBBI, ad ittwafekk zi marra aya.
19 Tiɣit tessejhed amiɣis x ɛecra n ayt n bu-ṣṣulṭa nni iǧan deg ict n tendint.
20 Wah nican, war iǧi uřa d ijj n bnadem d amsegged x temmurt, uřa d ijj ittegg řxar u war ixeṭṭi ca.
21 War ttic taynit nnec i marra awařen nni qqaren iwdan, ḥima ɛemmarṣ war tᵉttesřid aqa amsexxar nnec ad cek inɛeř.
22 Maɣar uř nnec yuca aṭṭas n twařawin, aqa uřa d cek tneɛřed inneɣni.
Tarezzut d tidett tiwi-dd bnadem ɣar Arebbi
23 Marra aya beqqceɣ t s tiɣit. Necc nniɣ: “Xseɣ ad kesbeɣ tiɣit!”, maca tiɣit teqqim ayi ɣar řaggʷaj.
24 Maɣar min iggʷejen d min yuǧɣen, wah, yuǧɣen, man wen izemmaren ad t yaf?
25 Nnqeřbeɣ, uřa d uř inu akidi, maḥend ad afeɣ tussna, maḥend ad beqqceɣ, ad arzuɣ tiɣit d wenway i dayes, maḥend ad ssneɣ s tidett aqa řɣar d taɣyuři u taɣyuři dayes aṭemmes aṭṭas.
26 Ufiɣ min iǧan d amerzag x řmewt: tamɣart tenni iǧan am traccawin u uř nnes amecnaw řefxux ineqqen u ifassen nnes amecnaw iceddiyyen. Wenni yarḍan zzat i wudem n AREBBI, izemmar ad zzayes infekk, maca amednub ad zzayes imxumber.
27 Xzar, aya i ufiɣ, iqqar Umbarreḥ, umi arenyeɣ ict n řḥajjet i yicten nneɣni maḥend ammu i ɣa yafeɣ řḥasuř nnes:
28 min tuɣa yarezzu řeɛmar inu ɛad, maca war t ufiɣ. Wah ufiɣ ijj n weryaz deg wařef, maca ict n temɣart war tt ufiɣ jar marra yina.
29 Xzar, ict waha i ufiɣ, aqa AREBBI igga bnadem nican, maca nitni arzun deg waṭṭas n yebriden iḥraymeyyen.