5
1 War tqeǧiq s uqemmum nnec u ḥḍa aqa uř nnec war ittemḥizwar ad inṭeq awař zzat i AREBBI. Maɣar AREBBI deg ujenna, maca cek di temmurt. X uya ejj ad iřin wawařen nnec udrusen.
2 Maɣar am tarjit tᵉttas-dd s waṭṭas n řehhu, ammu uřa d řhard n ubuhaři s waṭṭas n wawařen.
3 Mařa cek teggid i AREBBI ict n tjaǧit, war ttraja ca xenni maḥend ad tt tkemmřed, maɣar war d as tteɛjiben ibuhařiyyen. Min twaɛded, ittxeṣṣa ad t ttkemmřed.
4 Ihřa mařa war twaɛded x mařa cek twaɛded, maca war tkemmřed.
5 War ttejji aqa aqemmum nnec ad yarr arrimet nnec ad texḍa u war teqqar zzat i wudem n lmalak, aqa man aya d aweddar waha. Mayemmi ɣa iffugem AREBBI x min teqqared u ad yareddeǧ řxedmet n ifassen nnec?
6 Maɣar deg waṭṭas n tirja, aqa daysent min iǧan di řbaṭeř, ammu uřa deg waṭṭas n wawařen. S uya: Ggʷed AREBBI!
Řeḥṣaret d usfarɣ n řḥeqq
7 Mařa cek tḥekkared řeḥṣaret n imezřaḍ uřa d amnaɛ n řḥeqq d tsegda di lɛamala, war ttarjif ca aqa man aya yusa-dd asen s řxaḍar, maɣar x yijj n umeqqran aqa din wenni d ameqqran xas uca xasen bedden inni d imeqqranen ɛad.
8 Ijj n ujeǧid ittceṭṭaren i temmurt n tfeǧaḥt, aqa netta d řefḍeř i temmurt di marra iɣezdisen.
Ad ifna wagřa d bnadem
9 Wenni ittexsen tmenyat, war ittjiwin ɛemmarṣ tmenyat, u wenni ittexsen agřa, ɛemmarṣ war ittjiwin řmunet nnes. Uřa d man aya aqa-t di řbaṭeř.
10 Mani ittmarni wagřa, ammu ttmarnin uřa d inni t i ɣa iccen. Man řefḍeř i ɣa iqqimen i aytbab nnes mɣir tiṭṭawin nsen zemmarent ad xzarent aya?
11 Iḍeṣ n uxeddam d miẓid, ma netta ɣares drus niɣ aṭṭas n macca, maca i bu-wagřa afeyyeḍ nnes war t ittejji ad iṭṭeṣ.
12 Aqa din ijj n řɣar i ẓriɣ sadu tfuct, ijj n řɣar ittegg am řehřac: agřa ittɛess xas bab nnes i druct i ixef nnes.
13 Ifna zeɛma wagřa nnes s ict n temsart d taɛeffant uca netta tuɣa yejj-dd mmis, xenni war ɣares iqqim walu ɛad deg ufus nnes.
14 Am mammec dd-iffeɣ netta zeg uɛeddis n yemmas, ammu i ɣa iɛqeb d aɛaryan. Ad yuyur am mammec i dd-yusa. S marra amarret nnes i zi imarret, war izemmar ad kides iksi uřa d ict řḥajjet deg ufus nnes.
15 Uřa d ta d ict n tmesřact d taɛeffant: nican mammec i dd-yusa netta, ad yuyur. Man řefḍeř nnes xenni i wenni imarrten i usemmiḍ waha?
16 Ɛawed ittɣima ittett di taǧest marra ussan nnes am kemřen. Ittwamarret s řeḥřac nnes d uduqqez nnes n weɣḍab.
17 Xzar, min ttwařiɣ d man aya: aqa d lemliḥ u icna aqa ijj ad icc, ad isu u ad iẓar marra řxar i marra amarret nnes i umi ittmarrat bnadem sadu tafuct di řqedd n wussan n tudart i d as dd-yarzef AREBBI, maɣar ta d tasɣart nnes.
18 Ɛawed kuř bnadem i umi iwca AREBBI agřa d txubay u i umi iwca tizemmar maḥend ad zzayes icc u ad zzayes yarbu tasɣart nnes u ad zzayes ifarḥ ɣar umarret nnes, aqa-tt d tarzeft n AREBBI.
19 Maɣar netta war ittidar ɛad aṭṭas deg wussan n tudart nnes, minzi AREBBI isřa as umi d as iwca řefraḥet deg wuř nnes.