25
Tiweṣṣa nneɣni
1 “Mařa din ijj n umcubbec jar iryazen uca ittxeṣṣa asen ad uyuren ɣar řmeḥkama, ad xasen ḥekmen, xenni ad barrḥen x wenni ɣar iǧa řḥeqq uca ad ḥekmen x umednub.
2 Mařa amednub issdaheǧ tiyyita, xenni řqaḍi ad yejj ad t ɣeḍřen ɣar temmurt uca ad t farcen zzat i wudem nnes anect itturs di řeḥsab n řɣecc nnes.
3 Iɛeddeř ad as iwc arebɛin n teyyita, war ɣarsent yarenni ca, minzi mařa ad t ifarc ɛad ktar sennej i tiyyita-ya, aqa umac ad ac dd-iban d ameḥgur jar tiṭṭawin nnec.”
4 “War ttegg tacmant i ufunas xmi issarwat.”
5 “Xmi zeddɣen wawmaten ak-d wayawya uca immut ijj zzaysen, uca war dd-yejji ca mmis, xenni tamɣart n umettin war tmeǧec ca ak-d ca n weryaz barra familiya nnes. Ad xas yadef wařews uca ad tt igg d tamɣart nnes uca ad as yegg xenni lwajib n wařews.
6 Uca amenzu nni i dd ɣa taruw, ad ixřef isem n umas immuten, ḥima isem n wa war imeḥḥi ca zi Israil.
7 Maca mařa aryaz war ixs ad iksi tamɣart n umas, ad třah xenni temɣart n umas ɣar tewwart, ɣar imɣaren, ad tini: ‘Ařews inu yugi ad ixřef isem n umas di Israil, war ixs ad igg lwajib n wařews.’
8 Xenni imɣaren n tendint nni ad as dd-řaɣan uca ad akides ssiwřen. Mařa netta imneɛ deg wawař nnes uca inna: ‘War xseɣ ca ad tt awyeɣ!’,
9 ad ɣares dd-tqarreb xenni tařewst zzat i tiṭṭawin n imɣaren, ad as tekkes sandala nnes zeg uḍar uca ad xas tessusef x uɣembub, ad tbarreḥ, ad tini: ‘Ammu i ittwagg deg weryaz nni war ixsen ad ibna taddart n umas!’
10 Uca ad as řaɣan di Israil s yisem wanita: ‘Taddart n wenni umi ittwakkes sandala nnes!’ ”
11 “Mařa din iryazen mcubbucen uca treḥḥeg-dd temɣart n ca n ijj ḥima ad tfekk aryaz nnes zeg ufus n wi t iccaten uca nettat tesswiẓẓeḍ afus nnes uca tᵉṭṭef i-t zi tfulin n useḍḥi nnes,
12 ad as tqessed xenni afus nnes, war d am ttezziǧiz.”
13 “War ɣarek ittiři di txancet nnec ijj n weẓru n řewzen d ijj n weẓru nneɣni, ijj n weẓru d ameqqran uřa d ijj n weẓru d ameẓyan.
14 War ɣarek ittiři di taddart nnec, řmud n ijj n ifa uřa d ijj n ifa nneɣni, ijj n ifa d ameqqran uřa d ijj n ifa d ameẓyan.
15 Ijj n weẓru n řewzen iwaṭa, iseggem ad ɣarek yiři uřa d ij n řmud n yijj n ifa nican, iwaṭa, ḥima ussan nnec ad zzuggarten x wudem n temmurt nni i d ac ɣa iwc, SIDI, AREBBI nnec.
16 Minzi marra wi ɣa iggin man aya, marra wi ɣa iggin řɣecc, aqa netta d nnɛi ɣar SIDI, AREBBI nnec.”
Ateḥḥi n Ɛamaliq
17 “Idar min zzayek igga Ɛamaliq deg webrid, umi dd-teffɣed zi Miṣra,
18 mammec dd-iffeɣ ɣar umsagar akidek deg webrid uca ihjem xak zi ḍeffar mani ǧan marra inni iḍeɛfen, umi cek tuɣa tuḥřed, tefnid. Netta war iggʷid ca AREBBI.
19 Ad imsar, xmi SIDI, AREBBI nnec, ad cek issareyyeḥ zi marra řɛedyan i d ac-dd innḍen di temmurt i d ac ɣa iwc SIDI, AREBBI nnec, d řwart, ḥima ad tt teksid, aqa ad temḥid řidaret n Ɛamaliq zi sadu ujenna. War t ttᵉttu!”