1 “Mařa teffɣed ɣar umenɣi ak-d řɛedyan nnec uca teẓrid iysan d ikarruten, ijj n řgens ktar zzayek, war zzaysen tteggʷed ca, s minzi SIDI, AREBBI nnec, wenni cek dd-issuffɣen zi temmurt n Miṣra, aqa-t akidek. 2 Xmi ɣa tadsem i umenɣi, ad dd-iqarreb ukehhan uca ad issiweř ɣar řgens, 3 ad asen yini: ‘Seř, Israil, kenniw qarrbem-dd ass-a ɣar umenɣi ak-d řɛedyan nwem. War ssemẓayem uř nwem, war tteggʷdem niɣ ad tarjijem, niɣ ɛawed ad tqefqifem zzat i wudem nsen, 4 minzi SIDI, AREBBI nwem, Netta aqa ad kiwem yuyur ḥima ad xawem immneɣ zzat i řɛedyan nwem maḥend ad kenniw issenjem.’ 5 Uca imeḥḍayen ad ssiwřen ak-d řgens ad inin: ‘Wi ibnan taddart n jdid uca war dayes izdiɣ ɛad? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad dd-yas ḥed nneɣni ad dayes izdeɣ. 6 Wi yeẓẓun tizayarin uca war iɣebbi ɛad zi řɣiǧet nnes? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad zzayes iɣebba ḥed nneɣni. ◘ 7 Wi ixeḍben tamɣart u war tt imřic ɛad? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad tt yawi weryaz nneɣni. ◘ 8 Imeḥḍayen ad arnin deg wawař ak-d řgens, ad inin: ‘Wi iǧan d aryaz d amaggʷad niɣ ittɣaca? Ejj i-t ad yuyur, ad dd-idweř ɣar taddart nnes, ḥima war tteɣnisen wuřawen n aytmas am wuř nnes.’ ◘ 9 Xmi ɣa kemmřen imeḥḍayen awař ak-d řgens, xenni ad ggen ikumandaren n řɛeskar ɣar uzeǧif n řgens.”

10 “Xmi ɣa tadsed ca n tendint ḥima ad kides temmenɣed, ittxeṣṣa ad as třaɣid i weṣřaḥ. 11 Mařa tarra-dd xak s weṣřaḥ, xenni marra řgens nni dayes ittwaf, ad cek isexxar s uɣiř uca ad cek ixdem. 12 Mařa war kik teggi řehna, maca d amenɣi i tarezzu, xenni ad as tennḍed. 13 SIDI, AREBBI nnec, ad ac tt iwc i cek deg ufus nnec u marra min iǧan d awtem dayes, ad t tewted s řeqḍeɛ n ssif. 14 Mɣir timeṭṭa d iḥenjiren d řebhayem d marra min dayes di tendint, marra takeccaḍt nnes, ad tt teksid i yixef nnec d tkeccaḍt uca ad tecced zi tkeccaḍt n řɛedyan nnec, inni d ac iwca SIDI, AREBBI nnec. 15 Amenni i ɣa tegged di marra tineddam nni xak iggʷejen aṭṭas, tinni war iǧin zi tneddam n řegnus-a.

16 Maca tineddam n řegnus nni d ac iwca SIDI, AREBBI nnec, d řwart, war zzaysent tejjid uřa d ca min ɣa yarren nnefs ad iqqim iddar. ◘ 17 Ad tent tḥarrmed i uteḥḥi: Iḥittiyyen, Imuriyyen, ayt n Kenɛan, Ifiriziyyen, Iḥiwiyyen d Iyabusiyyen, am mammec i d ac yumur SIDI, AREBBI nnec, 18 ḥima nitni war d awem ssřemmaden ad teḍfarem marra jjɛayef nni ggin nitni i irebbiten nsen uca xenni ad texḍam ak-d SIDI, AREBBI nwem.

19 Mařa tennḍed i yict n tendint aṭṭas n wussan řami temmenɣed akides maḥend ad tt tᵉṭṭfed, xenni war ttareddaǧ ca ticejjura s teyyita n ccaqur, minzi ad zzaysent tecced. S uya war tent ttqessid, minzi ma tacejjart n yeyyar am bnadem nni dd-ittbanen zzat i wudem nnec umi teḥṣared tandint? ◼ 20 Mɣir tacejjart nni tessned war teǧi d tacejjart i zi ɣa tecced, aqa tanita ad tt taredǧed, ad tt tqessed, ad zzayes tebnid ijj n ssur x tendint nni akidek ittmenɣan, ař ɣa tɣeḍřed tandint nni.”