13
X inabiyyen issxarriqen u x weɛbed n l’aṣnam
1 “Marra awař nni x kenniw weṣṣiɣ, ad t teḥḍam ad zzayes teggem. War ɣares arenni u war zzayes ttekkes.
2 Mařa ikkar ijj n unabi niɣ ijj n umerji n tirja di řwesṭ nnec uca igga ca n řeɛřamet niɣ s ca n lmuɛjiza ɣarek,
3 uca řeɛřamet nni niɣ lmuɛjiza nni x d ac issiweř temsar uca xenni inna: ‘Ejj ad nuyur awarni i irebbiten nneɣni!’, inni war tessined, uca: ‘Ejj aneɣ ad asen neɛbed!’,
4 xenni war ttesři i wawařen n unabi nni niɣ n umerji n tirja nni, minzi SIDI, AREBBI nwem, ittqeǧab kenniw, ḥima ad issen ma tᵉttexsem SIDI, AREBBI nwem s marra uř nwem u s marra řeɛmar nwem.
5 Ad tuyurem awarni i SIDI, AREBBI nwem, ad zzayes teggʷdem, ad tᵉṭṭfem di tweṣṣa nnes, ad tesřem i tmijja nnes, ad as tsexxarem u ad dayes třeṣqem.
6 Ittxeṣṣa ad ittwaneɣ unabi nni niɣ umerji nni n tirja, minzi issiweř x řaggʷajet x webrid n SIDI, AREBBI nwem - wenni kenniw issuffɣen zi temmurt n Miṣra, d wenni cek ifdin zi taddart n tesmuɣi - maḥend ad cek issuffeɣ zeg webrid nni x yumur SIDI, AREBBI nnec, ad dayes tuyured. Ittxeṣṣa ad tekksed řɣar zi řwesṭ nnec.
7 Mařa umac, mmis n yemmac, niɣ mmic niɣ yeǧic niɣ tamɣart n wuř nnec niɣ ameddukkeř nnec nni i iǧan am řeɛmar nnec, ad cek iɣar s tnuffra ad yini: ‘Ejj aneɣ ad nuyur ad nsexxar i irebbiten nneɣni!’ inni war tessined ca cek uřa d řejdud nnec,
8 inni iǧan zeg irebbiten n řegnus i d ac-dd innḍen, inni yudsen niɣ inni xak iggʷejen zi ṭṭarf n temmurt ař ṭṭarf nneɣni,
9 xenni war xas ttegg ca, war ɣares ttesři ca. War t areḥḥem ca, war d ac izziǧiz ca niɣ ad t teffared,
10 maca ittxeṣṣa ad t tenɣed nican. Afus nnec ad xas yiři d amezwaru, maḥend ad t tenɣed u xenni ad xas yiři ufus n řgens marra.
11 Ad t tḥejjarem s yeẓra ař ɣa immet, minzi tuɣa yarezzu ad cek issiggʷej x SIDI, AREBBI nnec, wenni i cek dd-issuffɣen zi temmurt n Miṣra, zi taddart n tesmuɣi.
12 Marra Israil ad sřen uca ad ggʷeden, ařami war dd-dikkʷiřen ad ggen řɣar-a di řwesṭ nnec.”
13 “Mařa tesřid aqa qqaren deg icten zi tneddam nni i d awem ɣa iwc SIDI ḥima ad daysent tzedɣed:
14 ‘Aqa ffɣen-dd zi řwesṭ nwem yeryazen, ayt i war isekkwin, uca ssɣekkwan imezdaɣ n tendint nsen, qqaren: Ejj ad nraḥ ad neɛbed irebbiten nneɣni, inni war tessinem!’,
15 xenni ad tarzud u ad tesseqsid mliḥ, u xzar, mařa tufid tamesřact nni tbedd x tidett, aqa jjɛifect nni tᵉttwagg di řwesṭ nnec,
16 řexdenni ad tegged ict n tecti i imezdaɣ n tendint s řeqḍeɛ n ssif. Ad tt tḥarrmed i uteḥḥi s marra min dayes, uřa d řebhayem nnes, s řeqḍeɛ n ssif.
17 Ad tessmuned marra takeccaḍt nnes ɣar řwesṭ n wazzay nnes, ad tessecmeḍ tandint s tmessi ak-d marra takeccaḍt i dayes, i SIDI, AREBBI nnec, uca ad tedweř tendint d ict n řxarbet i řebda, ɛemmarṣ ad tᵉttwabna ɛawed.
18 War ttejji min ittwaḥarrmen i uteḥḥi ad iqqim iřeṣṣeq jar ifassen nnec, ḥima SIDI ad xak issiggʷej řḥaduq n weɣḍab nnes uca ad ac iwc arreḥmet, ad cek yarḥem ad cek yarni, am mammec ijjuǧ i řejdud nnec,
19 xmi ɣa tesřed ɣar tmijja n SIDI, AREBBI nnec, ḥima ad teḥḍid marra tiweṣṣa nnes, tinni i x d ac weṣṣiɣ ass-a, u ḥima ad tegged min iseggden di tiṭṭawin n SIDI, AREBBI nnec.”