9
Sebɛin n simanat
1 Deg useggʷas amezwaru n Dariyus, mmis n Aḥacwirus, wenni zeg ayt n Maday, wenni idewřen d ajeǧid x tgeldit n Ikaldaniyyen,
2 deg useggʷas amezwaru n tgelda nnes iban-ayi-dd, i necc Daniyal, zeg idlisen, belli řqedd n iseggʷusa i x tuɣa issiweř wawař n SIDI i unabi Irmiya i ukemmeř n řweqt n řxirbat n Urcalim, tuɣa-t sebɛin n iseggʷusa.
3 Necc arriɣ aɣembub inu ɣar Sidi AREBBI, ḥima ad xas arzuɣ s tẓaǧit d uzaweg, s uẓummi deg txancet n wecḍan d yiɣɣeḍ.
4 Necc ẓẓuǧeɣ i SIDI, AREBBI inu, u neɛmeɣ x ddnub nneɣ, nniɣ
“A Sidi inu, Cek d Arebbi ameqqran d issiggʷiden, wenni iḥeṭṭan Řɛahd nnes d tmexsiwt nnes icewwaren i yinni t ittexsen u i yinni iḥeṭṭan tiweṣṣa nnes.
5 Neccin nexḍa u negga řmuɛṣiyyet d řɣar u nɣewweɣ am neffeɣ zi tiweṣṣa d lfarayiḍ nnec.
6 War nesři i imsexxaren nnec, inabiyyen, inni tuɣa issawařen deg Yisem nnec i ijeǧiden nneɣ d řḥukkam nneɣ d řejdud nneɣ uřa i marra řgens n temmurt.
7 Cek, a Sidi inu, ɣarek tasegda, maca neccin ɣarneɣ řeḥya deg uɣembub, am mammec teǧa ass-a, ɣar iryazen n Yahuda d imezdaɣ n Urcalim d marra Israil, ɣar yinni yudsen d yinni iggʷejen di marra timmura mani xasen tuẓẓřed Cek di ssibbet n řeɣdar nsen i zi Cek ɣḍaren.
8 A SIDI, dayneɣ řeḥya deg uɣembub nneɣ, aqa-t deg ijeǧiden nneɣ di řḥukkam nneɣ deg ibabaten nneɣ maɣar neccin nexḍa akidek.
9 Ɣar Sidi inu, AREBBI nneɣ, arreḥmet d weɣfar, waxxa neccin nɣewweɣ xas.
10 War nesři i tmijja n SIDI, AREBBI nneɣ, maḥend ad nuyur di lqawanin nnes nni i d aneɣ iwca s ufus n imsexxaren nnes, inabiyyen.
11 Marra Israil tuɣa ittɛedda x Ccariɛa nnec u itteffeɣ zeg webrid maḥend war ittesři i tmijja nnec. U ammu i xaneɣ tᵉttwazeǧeɛ nneɛřet i ittwaḍemnen s tjaǧit i ittwarin di Ccariɛa n Musa, amsexxar n AREBBI, minzi neccin nexḍa akides.
12 Netta igga awařen nnes ttbeddan, awařen nni issiweř akidneɣ u ak-d řquḍat nneɣ nni tuɣa i xaneɣ iḥekkmen, am dayneɣ igga ijj n řɣar d ameqqran i war imsaren ɛemmarṣ sadu ujenna, am mammec i ittwagg i Urcalim.
13 Am mammec tura di Ccariɛa n Musa, ammu yusa-dd xaneɣ marra řɣar nni. U neccin xenni war nzaweg ca zzat i wudem n SIDI, AREBBI nneɣ, maḥend ad nḥeyyed x řmuɛṣiyyet nneɣ u maḥend ad narzu ad nefhem tidett nnec.
14 SIDI iḥḍa řɣar uca issars i-t-i-dd xaneɣ, maɣar SIDI, AREBBI nneɣ d amsegged di marra řefɛayeř nnes nni igga umi war nesři ɣar tmijja nnes.
15 U řexxu, a SIDI, AREBBI nneɣ, wenni issuffɣen řgens nnec zi temmurt n Miṣra s yijj n ufus ijehden u wenni iggin i yixef nnes ijj n Yisem, am mammec iǧa ař ass-a. Neccin nexḍa u negga řɣar.
16 A Sidi inu, zi ssibbet n tsegda nnec, sḥeyyed aɣḍab nnec d wesɛar nnec x tendint nnec Urcalim, x wedrar nnec iqeddsen. Maɣar zi ssibbet n ddnub nneɣ d řmuɛṣiyyet n řejdud nneɣ tedweř Urcalim d řgens nnec d řɛar i marra inni d aneɣ dd-innḍen.
17 U řexxu, a AREBBI nneɣ, seř ɣar tẓaǧit n umsexxar nnec u ɣar uzaweg nnes, ejj udem nnec ad yegg tafawt di ṭṭweɛ nnec, a Sidi inu, x Zzawect nnec Iqeddsen, tenni idewřen d řxarbet.
18 Ewc amezzuɣ nnec, a AREBBI, seř. Arzem tiṭṭawin nnec u xzar řxirbat d tendint nni ittwařaɣan s Yisem nnec, minzi neccin war newḍi zzat i wudem nnec maḥend ad nzaweg x usdaheǧi n tsegda nneɣ, maca x usdaheǧi n arraḥmet nnec tameqqrant.
19 A Sidi inu, seř! A Sidi inu, ɣfar! A Sidi inu, ḥḍa uca egg, war tɛeṭṭař ca, di ṭṭweɛ n yixef nnec, a AREBBI inu, maɣar tandint nnec d řgens nnec ttwařaɣan s Yisem nnec.”
20 Am tuɣa ssawařeɣ ɛad u ttẓaǧiɣ u neɛɛmeɣ s ddnub inu d ddnub n řgens inu Israil u ttzeǧɛeɣ azaweg inu zzat i wudem n SIDI, AREBBI inu, di ṭṭweɛ n wedrar iqeddsen n AREBBI inu,
21 am tuɣa ssawařeɣ ɛad ammu, ttẓaǧiɣ, yusa-dd weryaz Jibril nni ẓriɣ deg umezwaru di řewḥiy, iḍwa-dd zeg ujenna ɣari. Iḥada ayi ɣar řweqt n tewhibt n tmeddit.
22 Netta issefhem u issiweř akidi, inna:
“Daniyal, necc ffɣeɣ-dd ɣar řweqt-a maḥend ad cek ssargbeɣ x řmeɛna.
23 Ɣar umezwaru n uzaweg nnec iffeɣ-dd yijj n wawař u necc usiɣ-dd ḥima ad ac t nniɣ, maɣar cek d ijj n weryaz iɛizzen aṭṭas. Fhem awař-a u arzu řefhamet di řewḥiy-a.
24 Ttwaggent sebɛin n ssimanat x řgens nnec u x tendint nnec iqeddsen, ḥima ad ittwassbedd uɛeddu u ad ittwacemmeɛ ddenb u ad tᵉttwaṣřeḥ i řmuɛṣiyyet u ḥima ad tᵉttwawi tsegda u ḥima ad ittwakemmeř řewḥiy d unabim u ḥima ad ittwadhen min iǧan Iqeddsen qaɛ.
25 Ssen u fhem, aqa zeg wami dd-iffeɣ wawař ḥima ad ɛedřen u ad bnan Urcalim ař amedhun, min ixs ad yini lmasiḥ, řḥakem, aqa sebɛa n ssimanat, u tnayen u-settin n simanat ad teqqim tendint tᵉtwaɛedeř u ad tᵉttwabna Urcalim ɛawed ak-d wazzay d wureɣ iqquren, ɛad di řeḥṣaret n řewqat yewɛaren.
26 Awarni tnayen u-settin n ssimanat nni ad ittwakkes umedhun u war ɣares ittiři walu. U tandint d Zzawect Iqeddsen ad ttwareddǧent s yijj n řgens n ijj n řḥakem wenni i dd ɣa yasen u taneggarut nnes ad tiři di sseḥřet uca ad din yiři umenɣi ař aneggar, areddeǧ nni aqa yura ad yiři.
27 Netta ad issedqeř řɛahd i waṭṭas i yijj n řmijař n ict n ssimana u deg wezyen n ssimana ad issbedd taɣarṣt d tewhibt n řɣiǧet u x wafriw n nnɛawat ad dd-yas ijj n umteḥḥay ař ɣa ittwafarreɣ řeḥkam i yurin x wenni ittwateḥḥan.