6
Daniyal deg weḥfur n iyraden
1 Dariyus, Amaday, iksi tagelda umi tuɣa ɣares ɛřaḥař tnayen u-settin n iseggʷusa.
2 Yarḍa Dariyus ḥima ad yařeqqem mya u-ɛicrin n ijeǧiden sadu ufus nnes inni i ɣa iḥekkmen mani ma di kuř tgeldit.
3 Netta igga xasen třata n řḥukkam imeqqranen. Tuɣa Daniyal ijjen zzaysen. Tuɣa ittxeṣṣa i ijeǧiden nni iǧan sadu ufus n ujeǧid, ad asen ggen řeḥsab, ḥima ajeǧid war t třeqqef txessart.
4 Xenni tuɣa Daniyal iɛeddu řḥukkam imeqqranen nni d ijeǧiden nni iǧan sadu ufus n ujeǧid, minzi tuɣa dayes ijj n buḥbeř icna aṭṭas, u ajeǧid tuɣa ittxarreṣ, ḥima ad t yegg x marra tageldit.
5 Xenni arzun řḥukkam imeqqranen d ijeǧiden nni ict n ssibbet maḥend ad ttahmen Daniyal di tmesřact n tgeldit, maca nitni war ufin uřa d ict n ssibbet niɣ řɣecc, maɣar netta tuɣa d amtiqqi u war dayes ittwif řeɛgez niɣ uřa d ict n jjuret n tmesřayin tiɛeffanin.
6 Xenni nnan iryazen nni: “War nettif uřa d ict n ssibbet i ttuhmet x Daniyal-a, mɣir mařa nufa i-tt di tmesřact n Ccariɛa n Arebbi nnes.”
7 Řexdenni munen řḥukkam imeqqranen d ijeǧiden nni iǧan sadu ufus n ujeǧid, usin-dd hajan i ujeǧid, nnan as: “A ajeǧid Dariyus, ddar i řebda!
8 Mcawaren marra řḥukkam imeqqranen n tgeldit: imḍebbaren d ijeǧiden nni iǧan sadu i ujeǧid d imcawaren d lwulat, ḥima ajeǧid ad dd-issuffeɣ ijj n řumur d ijj n řeḥkam inehhan marra wenni i ɣa iqeddmen ict n tutra i yijj n arebbi niɣ i yijj n bnadem mɣir i cek, a ajeǧid, di řmijař n třatin n wussan, ad ittwammenḍar di tesraft n wayraden.
9 Xenni řexxu, a ajeǧid, sekkar řumur u weqqeɛ tira, ḥima war ittwabeṭṭeř řumur u war ifenni am mammec kuř řqanun n ayt n Maday d ayt n Lfurs.”
10 S uyenni yura ujeǧid Dariyus tira d řumur nni s yisem nnes.
11 Umi issen Daniyal aqa tira-ya tᵉttwaweqqeɛ, yudef netta ɣar taddart nnes. Tuɣa tiburjatin n tɣurfet nnes arezment ɣar Urcalim. Netta isjed din x ifadden třata n twařawin deg wass, iẓẓuǧ u iqada Arebbi nnes am mammec tuɣa ittegg qbeř.
12 Řexdenni munen yeryazen nni s uhaji uca ufin Daniyal ittẓaǧa u ittzawag i Arebbi nnes.
13 Xenni udfen-dd ɣares u ssiwřen zzat i wudem n ujeǧid x řumur n ujeǧid: “Ma war tweqqɛed ca ijj n řumur belli kuř ijjen wenni, di řmijař n třatin n wussan, ɣa iqeddmen ict n tutra i yijj n arebbi niɣ i yijj n bnadem mɣir i cek, a ajeǧid, ad ittwammenḍar di tesraft n wayraden?” Yarra-dd ujeǧid, inna: “Tamesřact tbedd am yijj n řqanun n ayt n Maday d ayt n Lfurs nni war ifennin.”
14 Xenni arrin-dd, nnan zzat i wudem n ujeǧid: “Daniyal, ijjen zeg imenfiyyen zi Yahuda, aqa war cek ittweqqar, a ajeǧid, uřa d řumur nni tweqqɛed. Netta ittẓaǧa třata n twařawin deg wass.”
15 Umi isřa ujeǧid awař-a, ixeyyeq aṭṭas x yixef nnes uca igga x wuř nnes maḥend ad ifekk Daniyal. Ař aɣeǧay n tfuct igga tizemmar nnes maḥend ad t issenjem.
16 Xenni munen-dd yeryazen nni s uhaji ɣar ujeǧid, nnan i ujeǧid: “A ajeǧid, tessned aqa-t d ijj n řqanun n ayt n Maday d ayt n Lfurs u war izemmar ad ittwabeddeř uřa d ijj řumur niɣ d řeḥkam nni dd-iffɣen zeg ujeǧid.”
17 Xenni yumur ujeǧid ad nedhen Daniyal zzates u nḍaren t di tesraft n wayraden. Ajeǧid iṭṭef deg wawař, inna i Daniyal: “Arebbi nnec, wenni i tweqqared řebda, ad cek ifekk!”
18 Iwyen-dd ijj n weẓru uca ssarsen t x uqemmum n tesraft uca icemmeɛ i-t ujeǧid s txadent nnes uřa s txadent n ayt n jjehd nnes, ḥima war ittbeddiř array x Daniyal.
19 Xenni yuyur ujeǧid ɣar řeqṣar nnes. Isseɛdu ǧiřet nni deg uẓummi u war yejji ad as dd-awyen afarrej uca iḍwa zzayes yiḍeṣ.
20 Zic ɣar ṣṣbeḥ ɣar wenqar n tfawt, ikkar-dd ujeǧid, ittaẓẓeř ɣar tesraft n wayraden.
21 Umi dd-iqarreb ɣar tesraft, iřaɣa s tmijja tecḍen x Daniyal. Ajeǧid issiweř, inna i Daniyal: “A Daniyal, cek d amsexxar n Arebbi iddaren! Ma Arebbi nnec, wenni i tweqqared řebda, ma tuɣa izemmar ad cek ifekk zeg iyraden?”
22 Xenni issiweř Daniyal ak-d ujeǧid “A ajeǧid, ddar i řebda!
23 Arebbi inu issekk lmalak nnes u ibelleɛ aqemmum n wayraden. Tuɣa war zemmaren ad ayi iyzmen maɣar yufa ayi d amezdag zzates. Uřa akidek, a ajeǧid, war ggiɣ uřa d ict n ljarima!”
24 Xenni ifarḥ ujeǧid aṭṭas, yumur ad dd-awyen Daniyal zi tesraft. Awarni řami t iwyen zi tesraft war dayes ufin uřa d ict n jjriḥect, maɣar netta tuɣa ittceř x Arebbi nnes.
25 Řexdenni yumur ujeǧid ad awyen iryazen nni tuɣa ittahmen Daniyal. Nḍaren ten di tesraft n wayraden, nitni d iḥenjiren nsen d temɣarin nsen. Nitni tuɣa ɛad war iwiḍen ca ɣar tisi n tesraft umi ten ṭṭfen wayraden uca mezzqen marra iɣsan nsen.
26 Xenni yura ujeǧid Dariyus i marra řegnus d ccuɛub d iřsawen: “Ad yiři řehna nwem d ameqqran aṭṭas.
27 Aqa ssuffɣeɣ-dd ijj n řumur ḥima imezdaɣ di marra tageldit inu, tenni x ṣellṭeɣ, ad arjijen u ad qefqfen zzat i wudem n Arebbi n Daniyal maɣar Netta d Arebbi iddaren u Netta ad iqqim i řebda qaɛ u Tagelda nnes war zemmaren ad tt ḍarren u ṣṣulṭa nnes ad teqqim ař aneggaru.
28 Netta ifekk u issenjem u ittegg řeɛřamat d lmuɛjizat deg ujenna u x temmurt. D Netta i ifekken u issenjmen Daniyal zeg waccaren n wayraden.”
29 Daniyal wanita tuɣa ifřeḥ umi tuɣa tagelda deg ufus n Dariyus u deg ufus n Kurac, Afarsi.