4
Tarjit n Nabuxadnaṣṣar
1 “Necc, Nabuxadnaṣṣar, tuɣa ayi di řaman di taddart inu u s ttisir di řeqṣar inu.
2 Xenni ẓriɣ ict n terjit, tessiggʷed ayi. Ssḥeyyaren ayi ixarriṣen nni ɣari di tassut, uřa d iweḥḥan deg uzeǧif inu.
3 S uyenni dd-iffeɣ zzayi řumur ḥima ad awyen zzati marra imiɣisen n Babil, maḥend nitni ad ayi ssargben afessar n terjit.
4 Řexdenni usin-dd tarwa n tseḥḥart d imesnawen n itran d Ikaldaniyyen d igezzanen u necc ɛawdeɣ asen tarjit, maca nitni war zemmaren ad ayi ssargben x ufessar nnes.
5 Ɣar uneggar yusa-dd ɣari Daniyal wenni umi qqaren Balṭacaṣṣar ɣar yisem n arebbi inu, di min di izeddeɣ buḥbeř n irebbiten imqeddasen u i netta umi ḥajiɣ tarjit uca nniɣ:
6 ‘Balṭacaṣṣar, cek, a arrays n tarwa n tseḥḥart, aqa ssneɣ belli buḥbeř n irebbiten imqeddasen i dayek izeddɣen, u war xak iwɛar uřa d ijj n ssir. Ini ayi iweḥḥan nni ẓriɣ d ufessar nnes.
7 Iweḥḥan nni ɣari deg uzeǧif inu řami d ayi tuɣa di tassut, aqa d tina: Necc ẓriɣ, u xzar, aqa din ict n tcejjart di řwest n temmurt, tuɣa tuɛřa aṭṭas.
8 Tacejjart temɣar tedweř tejhed u taqiccat nnes tiweḍ ɣar ujenna u tᵉttwaẓarr tcejjart deg uneggaru n temmurt marra.
9 Tifray nnes ṣebḥent u řɣiǧet nnes tuɣa-tt d aṭṭas u tuɣa dayes macca i marra. Imuddaren n řexřa ufin tiři sadu nnes u ijḍaḍ n ujenna zedɣen jar řefruɛ nnes u ittwassecc zzayes marra inni ɣarsen ict n arrimet n weysum.” ”
10 “Necc ẓriɣ iweḥḥan deg uzeǧif inu řami d ayi tuɣa di tassut, u xzar, ijj n uɛessas, ijj n umqeddas ihwa-dd zeg ujenna.
11 Iřaɣa-dd s jjehd, inna ammu: ‘Zdem tacejjart uca qessem řefruɛ nnes. Kksem zzayes tifray nnes u zeǧɛem řɣiǧet nnes maḥend imuddaren ad arewřen zi sadu nnes uřa d ijḍaḍ zi jar řefruɛ nnes,
12 maca ejj jjdeɛ n tcejjart s iẓewran nnes ad iqqim di temmurt u ejj i-t ad iqqim s ict n tsarrift n wuzzař d nnḥas jar arbiɛ aziza di řexřa, u ejj i-t ad issuff s nnda n ujenna u ad tiři tesɣart nnes ak-d řewḥuc jar cbarq n temmurt.
13 Ejj uř nnes ad ibeddeř maḥend war ittiři ɛad d uř n bnadem u ewc as uř n ijj n lḥayawan. Ammu xas i ɣa ɛdunt sebɛa n řmijařat n řweqt.
14 Tamesřact-a tbedd x řxaḍar n iɛessasen u tutra-ya aqa tusa-dd zeg imqeddasen, ḥima inni iddaren ad neɛmen aqa Amɛuǧi x kuřci ɣares tizemmar x tgelda n yewdan u ad tt iwc i wi ixs Netta, aqa igga xas uřa d wenni d amuqřiř qaɛ jar iwdan.’
15 Tarjit-a ẓriɣ tt necc, ajeǧid Nabuxadnaṣṣar. Cek, Balṭacaṣṣar, ini ayi afessar nnes, maɣar marra imiɣisen di tgeldit inu war zemmaren ad ayi wcen afessar nnes, maca cek wah tzemmared, minzi buḥbeř n irebbiten imqeddasen izeddeɣ dayek.”
16 Xenni tuɣa Daniyal, wenni umi qqaren Balṭacaṣṣar, yarjef ict n řweqt uca ixariṣṣen nnes ssḥeyyaren t. Iṭṭef ujeǧid deg wawař uca inna: “Balṭacaṣṣar, ejj tarjit d ufessar nnes war cek ssḥeyyaren!” Yarra-dd Balṭacaṣṣar, inna: “Sidi inu, ejj tarjit ad tiři x yinni cek icarrhen u afessar nnes x yinni iǧan ḍidd nnec!
17 Tacejjart nni teẓrid, tenni idewřen temɣar u tejhed, tenni umi tiweḍ taqiccat nnes ař ajenna u tenni dd-ittbanen zi marra ddunect,
18 - s tefray nnes iṣebḥen d řɣiǧet nnes i tuɣa deg waṭṭas, i dayes ittwafen macca i marra, u swadday nnes zeddɣen marra imuddaren n řexřa, uřa d ijḍaḍ n ujenna zeddɣen jar řefruɛ nnes -
19 aqa d cek, a ajeǧid, cek wenni idewřen d ameqqran u tjehded, maɣar řemɣaret nnec temmarni ařami tiweḍ ař ajenna u lmulk nnec ař ṭṭarf n ddunect.
20 U řami iẓra ujeǧid, aqa ijj n uɛessas, ijj n umqeddas, ihwa-dd zeg ujenna, i innan: ‘Zdem tacejjart u ɣeḍřem i-tt, maca ejj jjdeɛ s iẓewran nnes deg ucař ak-d ict n tsarrift n wuzzař d nnḥas jar arbiɛ n řexřa u ejj i-t ad issuff s nnda n ujenna u ad tiři tesɣart nnes jar řewḥuc n řexřa ařami xas ɛdunt sebɛa n řmijařat n řweqt!’,
21 aqa ammu i yeǧa řmeɛna n marra man aya, a ajeǧid, u man aya d lqarar i dd-iffɣen zeg Umɛuǧi x kuřci, ijj n lqarar nni dd ɣa yas x sidi inu, ajeǧid.
22 Ad xak aẓẓřen zi řwest n iwdan u tazeddiɣt nnec ad tiři ak-d řmař n řexřa. Am řebhayem ad ak sseccen arbiɛ u nnda n ujenna ad cek issuff. Ammu i xak ɣa ɛdunt sebɛa n řmijařat n řweqt ař ɣa tneɛmed aqa Amɛuǧi x kuřci iḥekkem x tgelda n iwdan u ittic i-tt i wi ixs Netta.
23 Aqa nnan aqa ittxeṣṣa ad ittwajj jjdeɛ n tcejjart ak-d iẓewran nnes, ixs ad yini, aqa tagelda nnec ad teqqim xmi ɣa tneɛmed aqa ṣṣulta ɣar ujenna i teǧa.
24 S uyenni, a ajeǧid, iři ad yiři ccwar inu i řxaḍar nnec. Arẓ ddnub nnec s tsegda u řmuɛṣiyyet nnec umi teggid s uḥinni i řmusakin. Ad taɣ ad tᵉttwazzuggar ttisir nnec.”
25 Qaɛ man aya iwḍa-dd xenni x ujeǧid Nabuxadnaṣṣar.
26 Awarni řami ɛdun tenɛac n iyuren, řami tuɣa iggur x tzeqqa n řeqṣar n Babil,
27 issiweř ujeǧid, inna: “Ma man aya war iǧi d Babil ameqqran nni bniɣ s jjehd n tzemmar inu d taddart i tgelda u i uɛuǧi n lɛaḍama inu!”
28 Ɛad tuɣa wawař-a deg uqemmum n ujeǧid uca teffeɣ-dd ict n tmijja zeg ujenna tenna: “Ammu i d ac qqaren, a ajeǧid Nabuxadnaṣṣar: Tagelda tᵉttwakkes zzayek!
29 Ad xak aẓẓřen zi řwesṭ n iwdan u tazeddiɣt nnec ad tiři ak-d řmař n řexřa. Am řebhayem ad cek sseccen arbiɛ u ad xak ɛdunt sebɛa n řmijařat n řweqt ař ɣa tneɛmed aqa ṣṣulṭa x tgelda n iwdan ɣar Umɛuǧi x kuřci u Netta iwca i-tt i wi ixs Netta.”
30 Di tsaɛɛet nni iqfeř wawař-a x Nabuxadnaṣṣar, minzi uẓẓřen xas zi řwest n iwdan. Tuɣa ittett arbiɛ am řebhayem u arrimet nnes issuff i-tt nnda n ujenna, ařami idweř ucuwwaf nnes d azirar am wafriwen n igidaren u accaren nnes am yinni n ijḍaḍ.
31 Awarni ɛdun wussan-a, ssgeɛɛdeɣ nnec, Nabuxadnaṣṣar tiṭṭawin inu ɣar ujenna uca idweř-dd ɣari řeɛqeř inu. Necc ṣebḥeɣ Amɛuǧi x kuřci u ssemɣareɣ u ssɛuǧeɣ wenni iddaren i řebda, maɣar ṣṣulṭa nnes d ict n ṣṣulṭa n řebda u Tageldit nnes teqqim zi jjiř ař jjiř.
32 Marra imezdaɣ n temmurt ttwaḥesben d walu u Netta igga am mammec ixs s řɛeskar n ujenna u s imezdaɣ n ddunect. War din iǧi uřa d ijj nni izemmaren ad imneɛ afus nnes niɣ ad as yini: Min tᵉttegged?!
33 Di tsaɛɛet nni idweř ayi-dd řeɛqeř. Uřa d aɛuǧi n tgelda inu d lɛaḍama inu d ucewwar inu dewřen-dd xafi. Imcawaren inu d ayt n jjehd inu arzun ɛawed xafi u ttwassmetneɣ di tgelda inu u ɛad immarni ayi deg uɛuǧi inu.
34 Řexxu necc, Nabuxadnaṣṣar, ssɛuǧeɣ u ssemɣareɣ Ajeǧid n ujenna, minzi marra řefɛayeř nnes d tidett u imesraq nnes d tasegda. Netta ɣares ṣṣulṭa maḥend ad isswaḍeɛ inni iddaren di nnfaxet.”