1 “Di řweqt nni ad ikkar Mixayil, řḥakem ameqqran. wenni ibedden ak-d řgens nnec. Ad tiři d ict n řweqt n řeḥṣaret am war teǧi zeg wami iǧa ijj n řgens ař řweqt nni. U di řweqt nni ad ittwassenjem řgens nnec, kuř ijjen i ɣa ittwafen aqa urin t deg Wedlis. ◘ 2 Aṭṭas zeg yinni iṭṭṣen di tɛejjajt n temmurt ad faqen, ina i Tudart ittduman u inneɣni ad faqen i ubehdeř u i yijj n uɛiffi i řebda. ◘ 3 Inni ɣar teǧa řefhamet ad arɣen am mammec yareqq ujenna u inni tuɣa ineddhen aṭṭas ɣar tsegda, am yitran, i řebda qaɛ.◘ 4 U cek, Daniyal, snuffar awařen-a u tcemmɛed adlis ař řweqt n uneggar. Aṭṭas ad arzun u tussna ad temɣar.”

5 U necc, Daniyal, ẓriɣ, u xzar, aqa din bedden tnayen nneɣni, ijj ɣar tma-ya n iɣzar u wenneɣni ɣar tma nneɣni n iɣzar. 6 U netta inna i Weryaz i tuɣa yarḍen řeqṭen azdad, wenni ibedden sennej i waman n iɣzar: “Mecḥař ɛad iqqimen ař aneggaru n řeɛjayeb-a?” ◘

7 U sřiɣ Aryaz nni tuɣa yarḍen řeqṭen azdad, wenni ibedden sennej i waman n iɣzar, u Netta issgeɛɛed afus nnes afusi d ufus nnes azeřmaḍ u ijjuǧ ɣar wenni iddaren i řebda, belli xmi i ɣa ittwaqḍa ufartek n ufus n řgens iqeddsen awarni yijj n řmijař n řweqt d řewqat d wezyen n yijj n řmijař n řweqt, ad yiři uqeṭṭu n marra timesřayin-a. ◘

8 Necc sřiɣ t, maca war d as fhimeɣ u nniɣ: “A Sidi inu, min ɣa yiřin d aneggaru n aya?”

9 Netta inna: “Uyur, Daniyal, maɣar awařen-a ad qqimen bellɛen, cemmɛen ař řweqt n uneggar. 10 Aṭṭas i ɣa ittwassizedgen, ad dewřen d icemřařen u ad ttwaṣeffan, maca iɛeffanen ad ggen tuɛeffna u marra iɛeffanen war d as fehhmen, maca imiɣisen ad fehmen. 11 Zi řweqt i di tᵉttwakkes tɣarṣt n řebda u immars nnɛi n uxarreb deg wemcan nnes, aqa-t ařef u-mitayn u-tesɛin n wussan. 12 Sseɛd n wenni ittrajan u ad yaweḍ ařef u-teřt-mya u-xemsa u-třatin n wussan.

13 U cek, uyur ař aneggar. Ad tareyyḥed u ad tekkared maḥend ad teksid taqedduḥt i d ac dd-ikkaren deg uneggar n wussan.”