9
1 Minzi ḥesbeɣ belli nhřa ma uriɣ awem-dd x twiza i imqeddasen,
2 minzi ssneɣ nneyyet nwem iṣebḥen mixef xawem ssemɣareɣ jar inni n Makiduniya, belli Axaya tuɣa tewjed zeg useggʷas iɛdun, uca cḍaret nwem aqa tesfaq azyen ameqqran.
3 Maca ssekkeɣ-dd awmaten, maḥend asemɣar nneɣ daywem war ittiři ca baṭeř di tmesřact-a, ḥima ad tiřim tḥezzmem am mammec nniɣ,
4 ḥima, xmi kidi i dd ɣa yasen Imakiduniyyen uca ad kenniw afen war tḥezzmem, neccin - maḥend war qqareɣ ca ‘kenniw’ - war nɣeṭṭer zeg usemɣar i zzaywem nessemɣar.
5 S uyenni ggiɣ ad ttareɣ awmaten nni, maḥend ad ɣarwem dd-asen d amezwaru uca ad ssewjden qbeř lbaraka n ṣṣdaqi tinni x ittwanna qbeř i kenniw, aqa ittxeṣṣa ad tiři ṣṣedqet nni ɣar ufus am yict n lbaraka, war iǧi axmi tt-i-dd-kksen zi teřmect nwem s ṭṭmeɛ.
6 Maca snem ddegga:
“Wenni i ɣa izarɛen s tceṭṭart,
ad imjar s taceṭṭart,
uca wenni i ɣa izarɛen s tecrimet,
ad imjar ɛawed s tecrimet.”
7 Ad igg kuř ijjen am mammec inwa deg wuř nnes, war iǧi s imeṭṭawen niɣ s uɣiř, minzi AREBBI ittexs wenni itticen s řefraḥet.
8 Minzi AREBBI aqa izemmar ad awem iwc kuř arḍa s ufeyyeḍ, ḥima řebda u di marra ad ɣarwem yiři min teḥdajem uca ad tarnim aṭṭas di marra řxedmet iṣebḥen,
9 am mammec tura:
“Aqa ibeṭṭa, iwca i imezřaḍ,
tasegda nnes tᵉttɣima i řebda.”
10 Maɣar wenni itticen zzariɛet i wenni izarɛen uřa d aɣrum i macca, ad awem iwc zzariɛet nwem, ad yarni dayes uca ad issegma řɣiǧet n tsegda nwem,
11 maḥend ad tiřim ttejjarem di marra i marra tacrimet nni i ɣa issegman aqadi i AREBBI s ufus nneɣ.
12 Minzi řxedmet n tsexxart tanita war teǧi waha di ṭṭweɛ n min ineqṣen i imqeddasen, maca tᵉttawi ɛawed ɣar waṭṭas n uqadi i AREBBI.
13 Minzi s tqeǧebt n tsexxart-a, aqa ssemɣaran di AREBBI minzi temmarsem ixef nwem i cchadet n Řexbar Aṣebḥan n Lmasiḥ, u minzi tcarcem s tecrimet akidsen u ak-d marra.
14 Nitni ad dd-qarrben ɣar AREBBI s tẓaǧitin i kenniw, s tayri aṭṭas x ssibbet n ufeyyeḍ n arḍa n AREBBI nni xawem iǧan.
15 Tqad as i AREBBI x tewhibt nnes i war nzemmar ad zzayes nenṭeq.