12
Řewḥiy n Bulus
1 Mařa ittxeṣṣa ad din yiři usemɣar, waxxa man aya war ineffeɛ ca, meɛlik ufiɣ ad iwḍeɣ necc ɣar iweḥḥan d isargaben n Siditneɣ.
2 Aqa ssneɣ ijj n bnadem di Lmasiḥ, tuɣa ktar zeg arbeɛṭac n iseggʷusa zeg wami, ma tuɣa di arrimet niɣ barra i arrimet, war ssineɣ ca, AREBBI issen! Bnadem nni immeksi ɣar ujenna wiss třata.
3 Uca ssneɣ bnadem-a, ma tuɣa di arrimet niɣ břa arrimet, war ssineɣ ca, AREBBI issen.
4 Bnadem nni immeksi ɣar jjennet mani isřa awařen nni war izemmar ad ttwaneṭqen, inni war iḥeǧřen i bnadem ad ten inṭeq.
5 Zeg bnadem nni ad ssemɣareɣ, maca war ssemɣariɣ ca deg ixef inu, mɣir deg weḍɛaf inu.
6 Maca mařa xseɣ ad ssemɣareɣ, war ttiřiɣ d abuhaři, minzi ad iniɣ tidett. Maca ad t jjeɣ ḥima uřa d ijj war xafi ittxarraṣ mammec ǧiɣ sennej min zzayi iẓra niɣ sennej min zzayi isřa.
7 Ḥima war ssgiɛɛdeɣ ca ixef inu zi ssibbet n ṭṭbiɛet yuɛřan n isargaben nni, immewc ayi ijj n usennan deg weysum n arrimet, aqa-t ijj n lmalak n cciṭan i d ayi iccaten s řpuniyyat maḥend war ttesgeɛɛideɣ ca ixef inu.
8 Třata n twařawin ttareɣ Sidi inu, maḥend ad t xafi isseggʷej,
9 maca Netta inna ayi: “Aqa arḍa inu icfa, minzi jjehd inu ittwakemmeř di tuḍɛeft!” S uyenni aqa mliḥ mařa ssemɣareɣ di tuḍɛeft inu, ḥima ad xafi yarsa jjehd n Lmasiḥ.
10 S uyenni arḍiɣ s tuḍɛeft, s řefḍiḥet, di řeɣben, deg udarrec, di řeḥṣaret di ṭṭweɛ n Lmasiḥ, minzi xmi ttiřiɣ ḍeɛfeɣ, řexdenni ttiřiɣ jehhdeɣ.
Tayri n Bulus i řmuminin di Kurintus
11 Xzar, dewřeɣ d abuhaři umi ggiɣ ad ssemɣareɣ deg yixef inu, maca kenniw teḥṣarem ayi ɣares. Minzi tuɣa ittxeṣṣa i kenniw ad ayi tqeddarem, aqa war ǧiɣ qell uřa deg ict n řḥajjet zi rrusul nni ‘imɣaren aṭṭas’, waxxa necc d walu.
12 Ggiɣ jar awem řeɛřamat n rrasul s marra ṣṣbar, s tmegga ijjehden, s lmuɛjizat u s řeɛjayeb.
13 Maɣar min di tdewřem ɣar ḍeffar x tmesmunin inneɣni, mɣir di min di necc war xawem bessřeɣ waha? Samḥem ayi x řfarz-a!
14 Xzar, řexxu d twařa wiss třata aqa ayi wejdeɣ ḥima ad ɣarwem dd-aseɣ uca war xawem ttbessiřeɣ, minzi war arezzuɣ min nwem, maca arezzuɣ xawem kenniw. Minzi war dd-tusi i iḥenjiren ad xemmřen řeknuz i lwalidin nsen, maca lwalidin i iḥenjiren nsen.
15 Wejdeɣ s řefraḥet ad xeǧṣeɣ řeḥsab marra, u ad sebbřeɣ ixef inu di ṭṭweɛ n řeɛmur nwem, ɛad mařa ṭṭfeɣ zzaywem tayri qell mařa wciɣ awem tayri s waṭṭas.
16 Maca ad taɣ, waxxa necc war xawem ttbessiřeɣ, aqa ṭṭfeɣ kenniw s teḥraymect am yijj n weryaz aqeddac?
17 Niɣ ad taɣ meẓreɣ di ca zzaywem s ca n ijj nneɣni i tuɣa ɣarwem dd-ssekkeɣ?
18 Xmi ttareɣ Titus u ssekkeɣ-dd akides tawmat, ma yarzu Titus ca zzaywem di tizi nnes? Ma war nuyur ca s Arruḥ d ijjen d iṣuraf d ijjen?
19 Ma ittɣiř awem ɛawed belli neccin nesřeqqa x yixef nneɣ zzaywem? Aqa qibač i AREBBI di Lmasiḥ i nessawař uca man aya marra, a imɛizzen inu, di ṭṭweɛ n řebni nwem.
20 Minzi aqa tteggʷedeɣ, xmi dd ɣa yawḍeɣ ɣarwem, ad taɣ war kenniw ttifeɣ ca am mammec xseɣ, uřa war d ayi tᵉttifem ca am mammec texsem kenniw, balak ad iřin imcubbecen, řeḥsed, tafqeḥt, taɣennant, taxbarject, axewwej, nnfaxet uřa d ixarwiḍen,
21 xmi dd ɣa yawḍeɣ ɣarwem twařa nneɣni, ad taɣ AREBBI ad ayi isswaḍeɛ uca ad ceḍneɣ x waṭṭas n yinni ixḍan, war tuben ca zi řexmej d farq-ccɣeř d ufucceḥ i ggin.