8
X macca n weysum n tɣarṣin i l’aṣnam
1 Zi jjihet n tɣarṣin i l’aṣnam, aqa nessen, belli marra ɣarneɣ tussna. Tussna maca tᵉttegg tuffet, maca tayri tessyemma.
2 Mařa din ḥed ittɣiř as belli issen ca, ɛad war issin walu anect mammec ittxeṣṣa ad issen.
3 Maca mařa ittexs ḥed AREBBI, aqa d wa ittwassen zzayes.
4 X macca tenni ittwaɣarṣen i l’aṣnam, aqa nessen belli ṣṣanam war iǧi d walu di ddunect, u belli war din iǧi ca AREBBI nneɣni mɣir Ijjen.
5 Xenni, waxxa aqa din inni umi qqaren irebbiten, niɣ deg ujenna niɣ di temmurt - am mammec ǧan din aṭṭas n irebbiten d waṭṭas n isiditen -
6 i neccin aqa ɣarneɣ ijj n AREBBI, Babatneɣ, maɣar zzayes i dd-usint marra timesřayin u dayes i neǧa, u aqa ɣarneɣ ijj n SIDI, aqa-t d Yasuɛ Lmasiḥ, maɣar marra timesřayin ǧant s ufus nnes, uca uřa d neccin aqa s ifassen nnes i neǧa.
7 Maca tussna-ya war daysen teǧi marra, minzi din ca n yinni di tnefsect nsen ttᵉtten min ittwaɣarṣen i l’aṣnam, uca xenni tᵉttwassexmej tnefsect nsen s manayenni, minzi teḍɛef tnefsect nsen.
8 Maca macca war d aneɣ tessiwiḍ ca ɣar AREBBI, minzi mařa necca, aqa war dayneɣ yarenni ca, niɣ mařa war necci, aqa war dayneɣ bu řexṣeṣ.
9 Maca ɣarwem, aqa ttesriḥ nwem war dd-tusi ad tiři d taɛenkrift i yinni iḍeɛfen.
10 S minzi mařa ḥed ittwařa kenniw, inni ɣar teǧa tussna, tᵉttɣimam di zzawect mani ɛebbden l’aṣnam, ma tanefsect nnes, minzi netta iḍɛef, war tᵉttwajbed ca ad tekkar maḥend ad yecc min ɣarṣen i l’aṣnam?
11 Ammu s tussna nnec ad iweddar wenni iḍeɛfen, wenni i xef immut Lmasiḥ.
12 Xmi txeṭṭim ammu x wawmaten nwem uca tessyezzmem tuḍɛeft n tnefsect nsen, aqa txeṭṭim x Lmasiḥ.
13 S uyenni, mařa macca aqa tarra uma ad innedref, war ttᵉtteɣ aysum ɛemmarṣ, ḥima war ssendrifeɣ ca uma.