10
Ijj n weɛřem zeg umezruy n řgens n Israil
1 A aytma, xseɣ ad tessnem, belli řejdud nneɣ tuɣa aten marra sadu useynu uca marra cuqen di řebḥar,
2 uca marra ttwassɣeḍṣen di Musa deg useynu u di řebḥar,
3 uca marra ccin macca taruḥect d ict,
4 uca marra swin tisessit taruhect d ict, minzi nitni swin zeg weẓru n Arruḥ wenni tuɣa akidsen, u aẓru nni tuɣa-t d Lmasiḥ.
5 Maca AREBBI tuɣa war yarḍi x wezyen ameqqran zzaysen, minzi aqa aten wḍan di řexřa.
6 Man aya imsar d lmital i neccin, ḥima war dayneɣ ittiři mmeẓri di min iɛeffnen, am mammec tuɣa nitni daysen meẓri.
7 Ejj aneɣ war ndikkwiř ca ad neɛbed l’aṣnam, am ca zzaysen, am mammec tura:
“Řgens iqqim ḥima ad icc ad issu
uca kkaren ḥima ad iraren.”
8 War iɛeddeř ad nessefsad ixef nneɣ, am ca zzaysen. Aqa mmuten din třata u-ɛicrin-ařef deg ijj n wass.
9 War iɛeddeř ad njarreb Lmasiḥ, am mammec jarrben t ca zzaysen uca ttwahelken s ifiɣran.
10 War iɛeddeř ɛawed ad nessfixex am mammec ca zzaysen ssfixixen, uca xenni ttwahellken s ufus n umhellek.
11 Marra min d asen imsaren, aqa t d lmital i neccin, uca tura d aɛřam i neccin mixef dd-yusa uneggar n zzmanat.
12 S uyenni wenni umi ittɣiř aqa ibedd, ejj i-t ad iḥḍa war iweṭṭi.
13 War xawem ittekk ujarreb mɣir wenni i ɣa yawḍen ɣar iwdan. Maca AREBBI dayes řaman. Netta war kenniw ittejji ad tᵉttwajarrbem sennej i min tzemmarem, maca Netta ittic uffuɣ ak-d ujarreb nwem, ḥima ad tzemmarem ad tarbum aɣekkwi.
Tazewḍa n Siditneɣ
14 S uya, imɛizzen inu, arewřem zeg uɛbad i l’aṣnam.
15 Ssawařeɣ akidwem axmi ssawařeɣ ak-d imiɣisen. Ḥekmem kenniw xenni x min d awem qqareɣ.
16 Řkas n uqadi nni nettbarak, ma war iǧi d tamunt ak-d Idammen n Lmasiḥ? Aɣrum nni ntareẓẓa, ma war iǧi d tamunt ak-d Arrimet n Lmasiḥ?
17 Am mammec iǧa aɣrum d ijjen, ammu marra neccin d ict n Arrimet, minzi marra neccin neṭṭef zeg ijj n weɣrum.
18 Xzarem ɣar Israil ɛlaḥsab arrimet! Ma inni ittetten zi tɣarṣa war ɣarsen acrac ak-d uɛalṭar?
19 Min ɣa iniɣ di man aya? Ma belli min immewcen d taɣarṣt i l’aṣnam d ca, niɣ belli l’aṣnam d ca? Lla.
20 Min wcin lkuffar d taɣarṣt, wehhben tt i ccwaṭen, war iǧi i AREBBI. Uca necc war xseɣ ad tcarcem ak-d ccwaṭen.
21 War tzemmarem ad teswem řkas n Siditneɣ uřa d řkas n ccwaṭen, uca war tzemmarem ad tcarcem tazewḍa n Siditneɣ uřa d tazewḍa n ccwaṭen.
22 Niɣ ad nessekkar tusmi n Siditneɣ? Ma nejhed xas neccin?
Tiřelli n řmumen
23 Marra ittḥeǧeř ayi, maca marra war ineffeɛ. Marra ittheǧeř, maca marra war ibenni.
24 Uřa d ijj war yarezzu ca tizi nnes waha, maca ejj kuř ijj ad yarzu ɛawed tenni n wenni d as yudsen.
25 Marra min ittmenzan di ssuq n igezzaren, tzemmarem ad t teccem břa aseqsi di ṭṭweɛ n tnefsect,
26 minzi i SIDI umi ɣar teǧa temmurt d uɛemmar nnes.
27 Mařa ca n yijjen zeg lkuffar, iɛarḍ i kenniw u texsem ad traḥem, ccem zi marra min d awem i d ɣa issars, war tesseqsim ca x ssibbet n tnefsect.
28 Maca mařa ḥed inna awem: “Degga ittwaɣarṣ i l’aṣnam!”, war zzayes tᵉttettem di ṭṭweɛ n wenni d awem iɛeřmen uřa di ṭṭweɛ n tnefsect.
29 Mařa necc nniɣ di ṭṭweɛ n ‘tnefsect’, war ɛniɣ tanefsect nwem, maca tenni n wenneɣni. Minzi mayemmi ɣa tᵉttwaḥakem třelli inu s tnefsect n wenneɣni?
30 Mařa necc carceɣ s uweqqar ɣar umensi, mayemmi ɣa ttwaceqqfeɣ di ssibbet mixef ttqadiɣ?
31 Xenni mařa tᵉttettem niɣ tsessem niɣ tᵉtteggem ca n řḥajjet nneɣni, ggem tt marra i uɛuǧi n AREBBI.
32 War ttiřim d taɛenkrift i Wudayen niɣ i Iramiyyen uřa i tmesmunt n AREBBI,
33 am mammec uřa d necc arezzuɣ ad dd-aseɣ ak-d marra di kuřci, war arezzuɣ min iǧan i tizi inu, maca min iǧan i tizi n waṭṭas, ḥima ad ɣarsen tiři Tudart.