18
Bulus di Kurintus
1 Awarni man aya ijja Bulus tandint n Atina, yusa-dd ɣar Kurintus.
2 Yufa din ijj n weryaz d Uday qqaren as Akwila. Wanita yiweḍ-dd din zi Punṭus, yusa-dd zi Iṭalya di řweqt nni, ak-d Priskilla, tamɣart nnes, minzi qayṣar Kludiyus tuɣa yumur maḥend marra Udayen ad ffɣen zi Ruma. Uca yusa-dd Bulus ɣarsen.
3 Umi tuɣa ɣares ṣṣenɛet d icten akidsen, iqqim ɣarsen, ixeddem akidsen, minzi nitni tuɣa aten di ṣṣenɛet nsen d imɛicwen, tteggen iqiḍan.
4 Tuɣa ittḥeddat kuř ssebt di temzida, yarezzu ad isseqneɛ Udayen d ikafriwen, maḥend ad amnen.
5 Umi dd-ihwa Sila d Timutiyu zi Makiduniya, ssbedden nitni Bulus zeg ubarreḥ n Wawař, minzi Udayen tuɣa ttḍaddan t, ttceqqfen dayes umi iched aqa Yasuɛ Netta d Lmasiḥ.
6 Izzerz taɛejjact zeg warruḍ nnes, inna asen: “Zi řexxu ttbariɣ ixef inu zzaywem, uca ad raḥeɣ ɣar řegnus.”
7 Iruḥ ssenni uca yusa-dd ɣar taddart n ijj n weryaz qqaren as Titus wenni tuɣa iɛebbden AREBBI. Tuɣa taddart nnes teřṣeq ak-d temzida.
8 U Krispus, ameqqran x temzida, yumen di Siditneɣ ak-d marra aytbab n taddart nnes, uřa d aṭṭas n Ikurintiyyen umi d as sřin, umnen di AREBBI, ttwassɣeḍṣen.
9 Xenni inna SIDI i Bulus deg ijj n řewḥiy: “War tteggʷed, siweř, war ttseqqara,
10 minzi Necc akidek uca uřa d ijj war izemmar ad cek iḍarr, minzi ɣari aṭṭas n iwdan di tendint-a!”
11 Uca iqqim ijj n useggʷas d setta n iyuren di Kurintus, isseřmad asen awař n AREBBI.
Bulus zzat i Ɣaliyun
12 Maca umi tuɣa Ɣaliyun lɛamil x Axaya, kkaren Wudayen am yijj n weryaz x Bulus uca iwyen t-i-dd ɣar řkursi n ccreɛ,
13 nnan: “Wa isseqnaɛ iwdan maḥend ad ɛebden AREBBI s řɛeks n Ccariɛa.”
14 Umi ittar Bulus ttesriḥ maḥend ad yarzem aqemmum nnes, inna Ɣaliyun i Wudayen: “Mařa tusim-dd da ak-d icetciyen zi ssibbet n ijj n ufturi niɣ n ijj n řɣecc niɣ n ijj n nnɛi n taɛeffant, a Udayen, xenni iři ad iřiq ad kenniw qebřeɣ s řḥeqq.
15 Maca mařa din ixarwiḍen di ssibbet n ijj n wawař, niɣ di ssibbet n n ca n ismawen, niɣ di ssibbet n Ccariɛa nwem, ḥḍam t kenniw s yixef nwem, minzi necc war xseɣ ad iřiɣ d řqaḍi x tmesřayin-a!”
16 Uca yuẓẓeř xasen zi řkursi n ccreɛ.
17 Řexdenni ṭṭfen marra lkuffar Sustinis, amɣar n temzida, wtin t qibač i řkursi n ccreɛ, maca Ɣaliyun war d as icqi man aya qaɛ.
Bulus iɛqeb-dd ɣar Antiyuxiya
18 Awarni řami iqqim Bulus din ɛad aṭṭas n wussan, iweddeɛ tawmat uca ibeḥḥar ɣar Suriya u Priskilla d Akwila ruḥen akides. Netta tuɣa iḥeff azeǧif nnes di Kinxriyus, minzi tuɣa ijjaǧ ict n tjaǧit.
19 Umi dd-iwḍen ɣar Afasus, yudef Bulus ɣar temzida, tuɣa ittḥeddat Udayen.
20 Řami zzayes ttaren ad kisen iqqim ktar, war ijji ad t ssqenɛen.
21 Netta inna: “Ittxeṣṣa nican ad ɛeyydeɣ Řɛid i dd ɣa yasen di Urcalim. Maca ad ɣarwem dd-ɛeqbeɣ ɛawed mařa ixs AREBBI!” Uca ijja Akwila d Priskilla di Afasus.
22 Icuq řebḥar uca yiweḍ-dd ɣar Qayṣariya, igeɛɛed ɣar Řɛid di Urcalim, iseǧem s řehna x tmesmunt, xenni isafar ɣar Antiyuxiya.
Asafar wiss třata n Bulus: Afasus, Makiduniya d Lyunan
23 Ařami din isseɛdu ijj n řmijař n ca n wussan, iffeɣ uca icuq di jjwayeh n Galaṭiya d Frixiya, issemḥeḍ marra imeḥḍaren.
24 Ijj n weryaz, qqaren as Apullus, ijj n weryaz d Uday i dd-ittwaxeřqen di Iskandariyya, yusa-dd ɣar Afasus. Netta tuɣa d ijj n weryaz issen ad issiweř, ittḥaka deg idlisen iqeddsen.
25 Wa tuɣa ittwasseřmed deg webrid n SIDI, tuɣa-t s arruḥ imeḥḍen. Issawař u isseřmad zi jjihet n Yasuɛ s cḍaret, waxxa netta war issin mɣir aseɣḍeṣ n Yuḥanna.
26 Ibda issawař s bṭayṭay di temzida. Řami d as sřin Akwila d Priskilla, iwyen t-i-dd ɣarsen uca ssfehmen as abrid n SIDI marra.
27 Ařami tuɣa ixs ad isafar ɣar Axaya, cejjɛen t wawmaten, urin ɣar imeḥḍaren ad t qebřen mliḥ. Umi dd-yiweḍ wa ɣar din, iɛawen s arḍa i d as iwcin marra inni tuɣa yumnen.
28 Minzi netta tuɣa ittqacaḥ s jjehd ḍidd n Wudayen zzat i ubarru n iwdan, issbeyyen asen zi Tira Iqeddsen belli Yasuɛ Netta d Lmasiḥ.